YEREMIA 44:3 - KITTA' MATANGKASA'

³ Nakajariang ngaseng anjo sikammaya lanri dorakai pandudu'na, sa'genna napakallaroA'. Assarei ke'nanga koro'bang siagang anynyombai mae ri rewata-rewata tenaya nale'ba' nasomba ke'nanga, tenaya nale'ba' nusomba yareka nasomba boe-boenu.

YEREMIA 44:3 Referans Kwoze

PAOLE 29:26

Napare' atai kalenna ke'nanga mae ri rewata-rewata maraeng, tenaya naassengi ke'nanga, nampa sitojenna nipisangkai ke'nanga anynyomba ri anjo rewata-rewataya.

PAOLE 32:17

Assarei ke'nanga koro'bang mae ri roh-roh ja'dalaka teai mae ri Allata'ala, mae ri rewata-rewata takontutojeng, taniassenga siagang tanipakala'biri'ka ri boe-boena riolo.

PAOLE 13:6

Punna nia' sari'battannu, yareka ana' bura'nenu yareka ana' bainenu yareka bainennu nukamaseanga, yareka agang baji'nu anynyonyo' cokko-cokkoko untu' anynyomba mae ri rewata-rewata maraeng tenaya nuassengi siagang tenaya naassengi boe-boenu, rewata-rewata battua ri bansa-bansa ambania siagang bellaya ammantang,

DANIEL 9:5

Dorakami ikambe, a'gau' ja'dala'mi ikambe, siagang nagaukammi ikambe kasalanga. Pabali-balimi ikambe siagang nadakkai ikambe parentaTa, kammayatompa ammengkai ikambe battu ri paratorang-paratoranTa.

YEREMIA 44:8

Apa saba'na nanugaukang apa-apa ampabattuai larroKu? Battuko mae siagang ammantangko ri Mesir, pa'rasangang tenaya nuassengi, nampa anynyombako barhala siagang assareko koro'bang mae ri anjo rewata-rewataya! Apaka erokko angngancuruki kalennu sollannu nihina ri sikontu bansaya ri lino siagang nipake arennu salaku pattunra?

NEHEMIA 9:33

Adeleki tindakanTa, Kihukkungi anne ikambe dorakaya; tuli majarrekKi', manna jai callanna ikambe.

YEHEZKIEL 9:9

Appiali Allata'ala angkana, “Tu Israel siagang tu Yehuda le'baki nagaukang dosa lompo dudua. Nagaukangi ke'nanga pammunoanga ri sikontu tampaka, siagang nara'massi Yerusalem lanri kaja'dallanna ke'nanga. Nakana ke'nanga angkana iNakke, Batara, Kubokoimi anne pa'rasanganga, sa'genna takkulleami Kucini' panggaukanna ke'nanga.

PIRAUNG 4:13

Mingka kajariang tojemmi anjo kammaya, lanri dosana sikamma imanga siagang na'bia. Le'baki napasolong cera'na tau tenaya salana.

PIRAUNG 1:8

Nara'massi kalenna Yerusalem lanri gau' dosa majaina. Sikontu tumappakalompoa riolo mae ri kalenna, anne kamma mappakatunami anciniki ri assolara'na. Makkunrareng mami nagaukang napakamma siri'-siri'.

YEREMIA 22:9

Nampa lappialimo taua angkanaya nakajariang ngaseng anjo sikammaya lanri nudakkaina parjanjiannu siagang iNakke, Allata'alanu, kammayatompa lanri anynyomba mako siagang assambayang mako mae ri rewata-rewata maraenga.”

YEREMIA 11:17

INakke ampaentengi Israel siagang Yehuda, iNakke, Batara Kaminang Koasaya. Mingka, kamma-kamma anne le'ba'mi Kurancanakang laKupabattu balaya mae ri ke'nanga. Kalenna tonji ke'nanga a'jari passabakkang mae ri anjo sikammaya bala, lanri nagaukanna kaja'dallanga, iamintu assarena koro'bang mae ri Rewata Baal, sa'gengKu larro.”

YEREMIA 7:19

Mingka sikontutojenna, teai iNakke napa'risi ke'nanga, passangalinna kalenna tonji ke'nanga, sa'genna siri'-siri' nakasia' ke'nanga.

YEREMIA 5:29

Mingka iNakke, Batara, langhukkungi ke'nanga lanri yangasenna anjo sikammaya; laKubalasaki sikamma panggaukanna anne bansaya.

YEREMIA 5:19

Mingka punna akkuta'nang ke'nanga angkana angngapa naKugaukang ngaseng anjo sikammaya mae ri ke'nanga, pauangi Yeremia, angkanaya antekamma batena ke'nanga ambokoiA' ri pa'rasangang kalenna ke'nanga untu' anynyomba ri rewata-rewatana bansa maraenga, kamma tomminjo la'jari atai ke'nanga ri bansa-bansa maraeng ri pa'rasangang maraeng.”

IBRANI 3:16

Jari, inaika anjo tau allangngerekai sa'ranNa Allata'ala nampa nabali Allata'ala? Sai yangasemmi anjo tau le'baka napimping Musa assulu' battu ri butta Mesir?

YESAYA 3:8

Tojeng, tu'guru'mi Yerusalem! Runtummi Yehuda! Saba' sikontu kana-kananna siagang panggaukanna naewai Batara siagang nabaliangi kakoasanNa.

YEREMIA 32:30

Appakkaramula ri riwaya'na ke'nanga, iamintu tu Israel siagang tu Yehuda tena napakasannangi pa'maikKu. Napanaiki larroKu lanri ri panggaukang-panggaukang ja'dala'na ke'nanga.

PAOLE 29:25

Na pialinna iamintu, ‘Lanri takkaluppana ke'nanga ri parjanjianNa Batara, Allata'alana boe-boena ke'nanga; parjanjiang Napareka siagang ke'nanga ri wattunna nierang ke'nanga assulu' battu ri Mesir.

YEREMIA 16:10

Punna nupabattu ngasengi anne mae ri ke'nanga, gassingka akkuta'nangi ke'nanga angkana angngapa naKuero' anghukkung terasa' kammai anjo ke'nanga. Lakkuta'nangi ke'nanga angkana apa kasalanna siagang dosana ke'nanga mae ri Nakke, Karaeng Allata'alana ke'nanga.

YEREMIA 29:19

Yangasenna anjo kammaya kajariangi mae ri ke'nanga, lanri tena naturuki pasangKu tenaya ammari-marina Kupabattu mae ri ke'nanga tete ri atangKu na'bi-na'bia. Taerokai ke'nanga amparhatikangi anjo pasangKu.