YEREMIA 44:22 - KITTA' MATANGKASA'

^22-23 Tenamo Natahangi Batara ancinikko assare koro'bang mae ri rewata-rewata maraenga. Anjo panggaukannu ja'dalaki siagang tunai. Doraka mako mae ri Batara siagang tenamo numannuruki ri parenta-parentaNa. Lanri kammana anjo, kamma-kamma memang anne ancuru'mi pa'rasangannu sa'genna tenamo nakkulle nipammantangngi, siagang arenna nipakemi a'jari kana pattunra. Tau ancinikai a'jari sanna'mi malla'na.”

YEREMIA 44:22 Referans Kwoze

YEREMIA 25:18

Yerusalem siagang sikontu kotaya ri Yehuda, siagang sikamma karaenga kammayatompa pagawe-pagawena, kusarei angnginungi anjo anggoroka, sa'genna a'jari ke'nanga rapang parang kalotoro' appakamallaka. Sa'genna anne alloa arenna ke'nanga nipakei untu' pattunra.

MALEAKHI 2:17

Nupakalanrei Allata'ala lanri bicarannu. Mingka akkuta'nangko angkana, “Antekamma batena ikambe ampakalanrei Batara?” Iamintu lalang nukanana, “Sikontu tau a'gau' kodia nibilang bajiki ri Batara, siagang mangngellai mae ri ke'nanga.” Yareka akkuta'nangko angkana, “Kemae anjo Allata'ala nikanaya adele'?”

YEREMIA 44:12

Siagang punna nia' battu ri tu Yehuda ammantanga tassesa, tuli ero'na a'lampa mange ri Mesir untu' ammantang anjoreng, lapanra' kabusuki ke'nanga. Kabusu'na ke'nanga, lompo ca'di, lamatei ri Mesir lalang pa'bundukang yareka lanri kacipurang. Lamallaki taua anciniki ke'nanga, siagang lanihinai ke'nanga ri taua. Arenna ke'nanga lanipakei a'jari pattunra.

YEREMIA 25:38

Rapang singa assuluka battu ri leanna, kamma tomminjo Batara assuluki untu' anghukkungi umma'Na. Palla'na pa'bundukanga siagang kalarroanNa Batara ampinrai anne pa'rasanganga a'jari parang lompo.

YEREMIA 25:11

Sikontu anne pa'rasanganga laKubalang parekangi ancuru' siagang a'jari sino. Bansa-bansa niaka ri tammulilina la'jari atai mae ri karaeng Babel tujupulo taung sallona.

YEREMIA 18:16

Anne pa'rasanganga napa'jarimi ke'nanga tampa' appakaringi'-ringi', siagang tuli a'jari pa'rasangang nicau-cau. Sikontu tau allaloa ammenggong ngaseng ulunna lanri ringi'-ringi'na.

YESAYA 43:24

Tena nummalli dupa mabau' untu' iNakke, tena nupassukkuki pa'maikKu siagang janna koro'bang nupolonga. Kabalekanna iNakke ba'lalo nubattalli siagang dosa-dosanu, nususaiA' siagang sikamma kasalannu.

YESAYA 7:13

Nampa nakanamo Na'bi Yesaya, “Punna kamma, pilangngeri he turunganna Daud! Tenaka nangganna' le'ba'na nuso'ri kasa'barranna rupataua, sa'genna nuso'ri todong kasa'barranNa Allata'alaku?

ROMA 9:22

Kamma tomminjo ri apa Napareka Allata'ala. Eroki ampappicinikangi pangngalarroinNa siagang kakoasanNa. Mingka sa'baraki Allata'ala mae ri anjo tau siratanga nihukkung lanri napakalarro-larrona Allata'ala.

AMOS 2:13

Kamma-kamma anne laKujallakkang kabusukko sa'genna naung ri buttaya, sa'gennu akkunrareng kontu sa'ranna kareta rassi dudua gandung luranna.

DANIEL 9:12

TindakanTa sicoco' le'baki apa le'baka Kipa'janjiang mae ri kambe siagang mae ri pamarentana ikambe. Le'ba'mi Kihukkung kota Yerusalem la'bi sannakkangngang nakota maraenga ri anne linoa.

YEHEZKIEL 5:13

Lanupisa'ringi antekamma lompona pangngalarroingKu siagang pa'jallokangKu sa'genna sukku' Kusa'ring. Punna le'ba' ngasemmo kajariang anjo sikammaya, nampa mako latappa' angkanaya iNakke, Batara, anne a'bicara mae ri kau lanri larroKu mae ri sipa' tenana namattantu pa'mai'nu.

YEREMIA 44:6

Iaminjo saba'na naKutumpa lussakKu siagang pangngalarroingKu mae ri kota-kota Yehuda siagang agang-aganga ri Yerusalem. Yangasenna Kutunui sa'genna a'jari loro-loro siagang kalotoro' sangkamma akkullea nicini' kamma-kamma anne.

YEREMIA 44:2

Iaminne pasanNa Batara Kaminang Koasaya, iamintu Allata'alana Israel, mae ri ke'nanga, angkana, “Kalennu ngaseng le'ba' anciniki bala le'baka Kupabattu mae ri Yerusalem siagang kota maraenga ri Yehuda. Sa'genna pole kamma-kamma anne anjo kota-kotaya ancuru' ngasengiji siagang tena nanipammantangngi.

YEREMIA 29:19

Yangasenna anjo kammaya kajariangi mae ri ke'nanga, lanri tena naturuki pasangKu tenaya ammari-marina Kupabattu mae ri ke'nanga tete ri atangKu na'bi-na'bia. Taerokai ke'nanga amparhatikangi anjo pasangKu.

YEREMIA 26:6

Punna tuli teanu mappilangngeri, anne balla' sambayanga laKupa'jari sangkamma Silo, sa'genna sikontu bansaya ri lino napakei arenna kota Yerusalem anne salaku kana pattunra.”

YEREMIA 24:9

LaKupa'jari cilakai ke'nanga sa'genna sikontu bansaya ri sikontu linoa a'jari malla' ngasengi. Kemae-kemae ke'nanga Kupasiara', lanicau-caui ke'nanga, dipa'jari kakkallang siagang nicalla-calla. Arenna ke'nanga lanipakei a'jari pattunra.

YEREMIA 15:6

Le'ba'Ma' nusorongboko siagang nubokoi, lanri kammanami anjo naKuangka' limangKu untu' angngancurukko, lanri lanreMa' antahangi larroKu.

YESAYA 1:24

Lanri kammana anjo Nakanamo Batara Kaminang Koasaya, Allata'alana Israel: “He, musu-musungKu, la'balasakA' mae ri kau, sa'genna tenamo nanususaiA' pole.

PA'JARIANG 19:13

nasaba' anne kotaya lanipanraki ri kambe. Nalangngere'mi Batara sikamma tuduhang battalaka mae ri sikamma tau ammantanga ri anne kotaya, na ikambemi anne nisuro battu untu' antumpasaki anne kota Sodom.”

PA'JARIANG 6:3

Nakanamo Batara, “Tena naKupa'biangi rupataua attallasa' satunggu-tungguna; musti matei ke'nanga. Appakkaramula ri kamma-kammaya anne tenamo nakkulle la'bi ri 120 taung umuru'na.”

YEREMIA 4:4

Ta'gala' jarreki janjinnu siagang iNakke, Batara, siagang sa'laki kalennu untu' iNakke, he pandudu' Yehuda siagang Yerusalem. Punna tena, lallumpai larroKu siagang la'rinrai rapang pepe' tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja'dala'nu.”

YEREMIA 29:18

LaKuondang tojengi ke'nanga siagang pa'bundukang, kacipurang, siagang garring sa'genna sikontu bansaya ri sikontu linoa la'jari mallaki anciniki ke'nanga. Kemae-kemae Kupasisa'la'-sa'la' ke'nanga, anjorengi lamalla' siagang lannekkere' taua anciniki apa kajarianga mae ri ke'nanga. Lanicau-caui ke'nanga, siagang arenna ke'nanga lanipakei a'jari kana pattunra.

YEREMIA 30:14

Sikontu tumangngainu takkaluppami ri kau; taerokami ampikkiriki kalennu. Kamma musu le'baka a'bakka na nahukkungko siagang palla', lanri jaina dosanu siagang lompona kasalannu.

YEREMIA 34:22

LaKusuroi ke'nanga sollanna ammotere' mae ri anne kotaya, nampa nabunduki, nabeta, siagang natunui. Kota-kota Yehuda laKupa'jari sangkamma parang lompo tenaya nipammantangngi ri tau. INakke, Batara, anne akkana.”

YEREMIA 42:18

Sangkamma iNakke, Karaeng Allata'alana Israel Kutumpai kalarroangKu siagang kalussakkangKu mae ri pandudu'na Yerusalem, kamma tomminjo laKutumpai kalussakkangKu mae ri kau ngaseng a'lampaya mange ri Mesir. Lamallaki taua ancinikko; lanihinako, siagang lanipakei arennu a'jari kana pattunra. Tenamo nalanucini' pole butta passolongang cera'nu.”

YEREMIA 48:9

Attannangko batu nisang untu' Moab, lanri tasalloami anjo pa'rasanganga nanipanraki taba sikali. Kota-kotana laruntungi siagang tena manna sitau lammantang anjoreng.”

YEHEZKIEL 39:23

Siagang sikontu bansaya lasadara' ngasemmi angkanaya tu Israel nikiringi mae ri butta pammelakkanga lanri dorakai ke'nanga mae ri Nakke. Kubokoimi ke'nanga siagang Kubalang parekangi nibeta ri musunna kammayatompa nibuno lalang pa'bundukang.

2 KARAENG-KARAENG 17:15

Taerokai tu Israel siagang tu Yehuda anturuki parenta-parentaNa Batara siagang tena namajarre' ri parjanjiang le'baka napare' siagang boe-boena ke'nanga. Tena najampangi sikamma pappakainga'Na, passangalinna anynyombai ke'nanga mae ri barhala-barhala tenaya matu-matunna, sa'genna manna kalenna ke'nanga tena tommo matu-matunna. Naturuki ke'nanga panggaukanna bansa-bansa niaka ri ampi'na ke'nanga, manna pole nale'ba'mo nipisangkai ke'nanga ri Batara.

YEREMIA 5:9

Maka tena namusti Kuhukkung bansa kammaya anjo siagang Kubalasa' apa le'baka nagaukang ke'nanga?

DANIEL 9:11

Sikontu tu Israel nadakkaimi hukkung-hukkunTa siagang taerokami ampilangngeri kananTa. Dorakami ikambe mae ri Katte. Lanri kammanami anjo naKipabattu mae ri kambe pangngalarroinTa, ia niaka tattulisi' lalang ri kitta'na Musa, atanTa.