YEREMIA 39:4 - KITTA' MATANGKASA'

⁴ Ri wattunna Karaeng Zedekia siagang sikontu tantarana naciniki anjo sikontu apa kajarianga, ero'mi ke'nanga lari mange ri Lappara'na Yordan ia memang anjo bangngia. Anjorengi ke'nanga ri koko balla' karaenga angngalle oloang, nampa assulu' battu ri pakke'bu' lompo ampasisambungai ruaya tembo' ri anjo tampaka.

YEREMIA 39:4 Referans Kwoze

AMOS 2:14

Manna tau gassinga lari tena todong nakkulle lata'lappasa'; tau gassinga latappelaki kagassinganna, siagang tau porea takkulleai napasalama' kalenna.

2 PATTOTTORANG 32:5

Nampa nakassakki karaenga pattahanganna kotaya; napakabajiki tembo'na, appaentengi menara-menara irateanna siagang ambangungi tembo' maraeng pantarang. Pantaranganna anjo napakabaji' tongi pattahangngang nibangunga irate ri butta pannambunganga ri bageang rayana kota sallona Yerusalem. Assuro pare' tongi sanna' jaina poke siagang pannangkisi'.

YEHEZKIEL 12:12

Lalang ri sassanna bangngia karaenna ke'nanga lanapisangi pa'roko'na irate ri salangganna nampa a'lampa. Lappareki taua so'bolo' ri temboka sollanna akkulle assulu'. Lanatongkoki matanna sa'genna tanacinika agang naoloa.

PAOLE 28:25

Punna tena numannuruki mae ri Karaeng Allata'alanu, laNalappassangko nibeta ri musu-musunnu. Lanuatoro' bajiki batenu a'bundu', mingka lalariko tassimbung-simbung. Sikontu bansa-bansaya lamalla'-malla' ngasengi anciniki cilaka antujuako.

KAIMANGNGANG 26:36

Sikamma taunnu ia niaka ri pammelakkang ri pa'rasangang maraenga, laKupa'jari teai sipato' malla'na, sa'genna manna sa'ra leko' kayu nairi'ja bawang anging nalangngere' nalarimo napakamma malla'. Lalariko sanrapang tau niondanga lalang ri pa'bundukanga, nampa tu'gurukko manna natenaja musu ri ampi'nu.

KAIMANGNGANG 26:17

LaKuhukkungko, sa'gennu nibeta ri musu-musunnu siagang nikoasai ri tau angkabirisiako. La'jari teai sipato' malla'nu sa'gennu lari, manna natenaja tau angngondangko.

YESAYA 22:11

appare' mako kollang lalang ri kotaya nampa nupasse're je'ne' battua ri kollang salloa. Mingka tena ngaseng nuparhatikangi Allata'ala, Ia salloamo le'ba' anrancanakang ngasengi sikammaya anjo, siagang a'jaria passabakkang nakajariang anjo kammaya.

YEREMIA 32:4

kammayatompa Karaeng Zedekia tena nalata'lappasa'. Lanipassareangi mae ri karaeng Babel, nampa andallekang ri anjo karaenga kammayatompa a'bicara kalenna siagang ia.

YESAYA 22:3

Sikontu panglima tantaranu lari ngasengi siagang tenapa nalappassangi panana napatemba' na nitahang memammo ke'nanga. Sikontu tau kassa'nu nitahang ngasengi manna pole nabellamo larina.

YESAYA 29:2

Mingka laNapabattui Allata'ala balaya irate ri anjo kotaya, sa'genna ammarrang siagang akkunrareng taua. Kabusu'na kotaya lasangkammai tampa' pakkoro'bangngang attalaka cera'.

YEREMIA 32:5

Nampa laniengka' Zedekia mange ri Babel siagang ammantang anjoreng sa'genna Kuhukkung. Manna pole nanabunduki tu Babel, mingka tena nakkulle lambetai. INakke, Batara, anne akkana.”