YEREMIA 32:39 - KITTA' MATANGKASA'

³⁹ LaKusarei ke'nanga poro se're bawang oloang mange ri katallassanga: iamintu, napakalompoA' satunggu-tungguna; anjo kammaya langngerangi kabajikang mae ri kalenna ke'nanga, siagang mae ri jari-jarina.

YEREMIA 32:39 Referans Kwoze

LAMPA-LAMPANA 4:32

A'julu atimi siagang a'julu nyawa ngasemmi anjo sikontu tau tappaka. Punna nia' apa-apanna ke'nanga, tena manna sitau langkana anjo apa-apaya ia bawang pata. Sikontu apa niaka ri ke'nanga, napassama-samaimi napake.

YOHANES 17:21

Kupalaki ri Katte Bapa', sollanna a'jari se're ngaseng anne ke'nanga, sangkamma iKatte siagang iNakke yareka iNakke siagang iKatte se're tonjaKi'. Poro asse're ngasengi ke'nanga mae ri Katte, sollanna akkulle tappa' linoa angkana iKatte assuroA' battu ri lino.

YEHEZKIEL 36:26

Jari laKusare mako ati beru siagang pikkirang beru. Anjo atinnu terasa' kammaya batu laKusambei siagang ati mannuruki.

IBRANI 10:20

Le'ba' maki' Nasungkeang Isa se're oloang beru, iamintu oloang assarea katallassang. Anjo oloanga iamintu battu ri gordenga, iamintu BatangkalenNa Isa.

YOHANES 14:6

Appialimi Isa Nakana, “INakkemi oloanga untu' angngassengi Allata'ala, siagang untu' anggappai katallassanga. Tenanniakka tau akkulle battu mae ri Manggea punna tena nangngolo ri Nakke.

YEREMIA 32:40

LapparekKa' parjanjiang mannannungang siagang ke'nanga. Tena Kulammari a'gau' baji' mae ri ke'nanga. LaKupa'jari mallaki ke'nanga siagang mappakalompoi ri Nakke lalang sikontu nyawana sollanna tena nabella ke'nanga ri Nakke.

PANGNGEBARANG 23:17

Teako angngiri matai mae ri tau dorakaya. Tuli mannurukiko ri Allata'ala,

2 PATTOTTORANG 30:12

Manna ri Yehuda Napagio' tonji Allata'ala siagang Napa'julu ati ra'yaka untu' attojeng-tojeng mannuruki ri ero'Na Allata'ala, sa'genna naturuki parentana karaenga siagang pagawe-pagawena.

1 KORINTUS 7:14

Nasaba' bura'ne tenaya natappa' a'jari nipassiratangi ri Allata'ala, a'jari umma'Na Allata'ala lanri pa'buntinganna siagang anjo baine a'jariamo umma'Na Allata'ala. Kammayatompa, anjo baine tenayapa natappa', akkullei a'jari nipassiratang a'jari umma'Na Allata'ala, lanri pa'buntinganna siagang anjo bura'ne a'jariamo umma'Na Allata'ala. Punna takammaya, anjo ana'-ana'na ke'nanga tantu la'jari sangkammai ana'-ana' kapereka, padahala' anjo ana'-anaka nipasanrapangi anggota umma'Na Allata'ala.

LAMPA-LAMPANA 13:33

Napa'rupami mae ri katte lanri attallasa'Na ammotere' Isa battu ri kamateanga. Nasaba' ilalang ri Kitta' Pammuji-muji passala' rua nia' tattulisi' angkana, ‘Ikaumi AnakKu, anne alloa iNakkemi a'jari ManggeNu.’

YESAYA 35:8

Anjoreng lania' agang lompo, “Oloang mangea ri kasalamakkang” arenna. Tau dorakaya talammaloai anjoreng, tau toloa talanapa'linguai tau angngoloa anjoreng.

2 KORINTUS 13:11

Kala'busang kana, sari'battangku ngaseng, paralluko a'rannu-rannu, siagang usahakangi nu'jari sukku'. Tarima ngasemmi pappakaingakku. Paralluko a'julu ati siagang assiama' lalang tallasa'nu. Allata'ala Kaminang Mangngarimangngia siagang mappasiamaka lanrurungangko.

ROMA 11:16

Punna sikere' roti uru-urua nipassareammi mae ri Allata'ala, battuanna anjo roti sibatua nipassareang tommi mae ri Allata'ala. Na punna Allata'ala pata anjo aka'na poko' kayua, battuanna anjo tangke-tangkenna Ia todong pata.

LAMPA-LAMPANA 9:31

A'jari sannammi sikontu jama'aka ri Yudea, Galilea, siagang Samaria. Na lanri malla'na ri Batara siagang pannulunNa RohNa Allata'ala, pila' jarre'mi siagang pila' katambammi jaina ke'nanga.

LAMPA-LAMPANA 3:26

Iaminjo saba'na naNapattantumo Ana'Na Nasuro rolong battu mae ri kau, sollanna naNabarakkakiko. Ia bateNa ambarakkakiko, iamintu Napa'jari tobakko battu ri kaja'dallanga lalang ri katallassannu.”

LAMPA-LAMPANA 2:39

Nasaba' anjo Napa'janjianga Allata'ala untu' ikau ngaseng siagang sossorannu, kammayatompa untu' tau battua ri pammantangang bellaya – iamintu sikontu tau Nakioka Allata'ala Batarata battu mae ri Ia.”

YEHEZKIEL 37:22

LaKupa'jari se'rei ke'nanga bansa anjoreng pa'rasanganga, ri daera monconna Israel. Laniparentai ke'nanga ri se're karaeng, siagang tenamo nalata'bage pole ke'nanga a'jari rua bansa yareka kakaraengang.

YEREMIA 6:16

Nakana Batara ri umma'Na, “Ammentengko ri sikamma panyingkulu'na aganga, siagang parhatikangi baji'-baji'! Pakkuta'nangngangi sikamma agang-agang riolo-rioloa, siagang kereanga kaminang baji' anjo aganga. Pinawammi anjo aganga, sollanna sannang katallassannu.” Mingka angkanai ke'nanga, “Tena, tena naero' ikambe ampinawangi anjo aganga!”

YESAYA 52:8

Pilangngeri pakkio' rannuna pangawala'na kotaya, para ma'rannu-rannui ke'nanga! Saba' mata kalenna ke'nanga anciniki ammotere' Batara mange ri Sion.

PAMMUJI 128:6

Poro la'bu lalo umuru'nu, na nucini' ana'-cucunnu! Poro salewangang ummatTa!

PAMMUJI 112:1

Pujimi Batara! Mate'nei tau mappilangngeria, mangngaia ri sikamma parentaNa Batara.

PAOLE 5:29

Ka'de' natuli kammana anjo pa'mai'na ke'nanga! Ka'de' natuli napakalompoA' siagang naturuki sikontu parentaKu, sa'genna salewangang ke'nanga siagang jari-jarina sa'genna satunggu-tungguna!

PA'JARIANG 22:12

Nakanamo Batara tete ri anjo malaekaka, “Teako pa'risi antu anaka yareka teako apa-apai. Kamma-kamma anne Kuassemmi angkanaya nupakalompoA' siagang mannurukiko ri Nakke, nasaba' tena nanutollaki untu' ampassareangi ana' sitau-taunu mae ri Nakke.”

PA'JARIANG 18:19

Ia le'ba'mi Kupile sollanna naparentakang mae ri sikamma ana'-ana'na siagang turunganna untu' amminawang turu' ri Nakke kammayatompa nagaukang panggaukang bajika siagang adeleka. Punna nagaukangi ke'nanga anjo passalaka, sikontu janjingKu mae ri Abraham laKurupai ngasengi.”

PA'JARIANG 17:7

LaKurupai janjingKu mae ri kau siagang mae ri turungannu sa'genna a'lapi'-lapisi', siagang anjo parjanjianga lamannannungangi. INakke la'jari Allata'alanu siagang Allata'alana turungannu.

PAOLE 6:24

Nasuroki' Karaeng Allata'alata anturuki siagang anggaukangi sikontu anjo parentaya kammayatompa mappakala'biri' mae ri Ia. Punna nigaukangi kammaya anjo, latuli Naparakai bansata sollanta tuli salewangang lalang tallasatta.

PAMMUJI 86:11

Kiajarakka' mae ri erotTa, o, Batara, sollanna kupinawang siagang majarre'; Kiajaria' a'jari tumappilangngeri sibatu pa'mai'.

YESAYA 65:23

Sikontu apa nagaukanga ke'nanga lania' wassele'na, siagang tena nalamate silalonna ana'-ana'na ke'nanga. Ke'nanga siagang turunganna ke'nanga laKubarakkaki satunggu-tungguna.

YEREMIA 31:33

Iaminne parjanjiang beru laKupareka siagang umma' Israel: Hukkung-hukkungKu laKuboliki ri ati mailalanna ke'nanga, Kutulisiki ri pa'mai'na ke'nanga. INakke la'jari Allata'alana ke'nanga, siagang ke'nanga la'jari ummakKu.

PAOLE 6:2

Paralluko ikau siagang jari-jarinu ampakala'biriki karaeng Allata'alanu lalang sikontu tallasa'nu siagang nuturuki sikontu hukkung kupabattua mae ri kau, sollanna la'bu umuru'nu ri anjo pa'rasanganga. Lanri kammana anjo, pilangngeri

YEREMIA 24:7

LaKusarei ke'nanga kaerokang untu' ampahangi angkanaya iNakkemi Batara. Na la'jarimo ke'nanga ummakKu, siagang iNakke a'jari Allata'alana ke'nanga, lanri lammotereki ke'nanga mae ri Nakke lalang sikontu pa'mai'na.

YEHEZKIEL 37:24

Lanipa'jari se'rei ke'nanga irawangang parentana se'rea karaeng sangkammaya Karaeng Daud, ammarentaya satunggu-tungguna. Lamajarreki ke'nanga anturuki hukkung-hukkungKu. Nampa sa'genna satunggu-tungguna ke'nanga siagang jari-jarina ke'nanga lanapammantangngi anjo pa'rasanganga, iamintu pa'rasangang Kupassareanga mae ri Yakub siagang napammantangngia boe-boena ke'nanga.