YEREMIA 30:19 - KITTA' MATANGKASA'

¹⁹ Pandudu'na lanapujiA' siagang kelong-kelong, siagang akkio' a'rannu-rannu pa'mai'. LaKupa'jari ke'nanga nipakalompo siagang tenamo nanihinai, siagang jaina ke'nanga pila' laKutambai.

YEREMIA 30:19 Referans Kwoze

YEREMIA 33:22

LaKutambai jari-jarina atangKu Daud siagang imang-imang suku Lewi, sa'genna anjo ke'nanga a'jari rapangi kassi' ri biring tamparanga jaina siagang bintoenga ri langika tenaya nakkulle nirekeng jaina.”

YESAYA 51:11

Nalammotere'mo sikamma tau Nalappassanga Batara akkio' rannui ke'nanga antama' ri Yerusalem corai rupanna ke'nanga lanri karannuang mannannungang. Rannui siagang ma'reja-rejai ke'nanga, lanynya'mi susaya siagang kunrarenga.

YESAYA 60:22

Ba'lalo manna kaluarga ca'dia siagang tunaya la'jari bansa lompo siagang kassa'. INakke Batara langngalle tindakang linta', ri wattu kaminang bajika.”

YESAYA 35:10

Sikamma tau Nipakabebasaka ri Batara lammotereki; antamaki ke'nanga ri Yerusalem akkio' rannu, corai rupanna ke'nanga lanri karannuang mannannunganga. Larannui siagang lama'reja-rejai ke'nanga; lanynya'mi susaya siagang kunrarenga.

YEHEZKIEL 36:37

Nakana Batara Kaminang Tinggia, “He bansa Israel, Kupa'biang mako ammotere' appala' tulung mae ri Nakke; laKutambai jainu, sanrapang pa'rappungang gimbalaka jaina.

ZAKHARIA 10:8

LaKukioki ummakKu siagang Kupa'rappungi ke'nanga a'jari se're. LaKupakabebasaki ke'nanga siagang laKupa'jari jai sangkamma riolo jaina.

YEREMIA 31:4

Bansanu laKupa'jari porei sangkamma riolo. Sikalipi pole langngalleko rabana, siagang a'jogekko napakamma rannu.

ZAKHARIA 12:8

Anjo alloa iNakke lalla'langngi pandudu'na Yerusalem; siagang manna kaminang lammaya ri alla'na ke'nanga la'jari kammai gassinna Daud. Laniului ke'nanga ri jari-jarina Daud sanrapang niulu ri malaekakKu, ba'lalo sanrapang KalengKu angngului.

ZAKHARIA 8:19

“Puasa nigaukang lalang bulang makaappa', makalima, makatuju, siagang makasampulo la'jari passua'-suarrang appakarannua siagang appakasannanga mae ri pandudu'na Yehuda. Mangngaiko ri katojengang siagang passiamakkang!”

YEHEZKIEL 37:26

LapparekKa' parjanjiang siagang ke'nanga untu' ampattantui kaamangnganna ke'nanga sa'genna satunggu-tungguna. LaKubarakkaki ke'nanga siagang laKutambai jaina ke'nanga. LaKubangungi ri pa'rasanganna ke'nanga BallakKu, lammentenga anjoreng satunggu-tungguna.

YESAYA 12:1

Lania' sallang se're wattu nukkelong: “O, Batara, appala' sukkurukka' mae ri Katte lanri Kisaleoringku. Riolo larroKi' mae ri nakke, mingka kamma-kamma anne ammarimi larroTa.

NEHEMIA 8:12

Jari ammotere'mi sikontu ra'yaka untu' angnganre, angnginung, siagang a'bage-bage kanre mae ri tau maraenga. Rannumi pa'mai'na ke'nanga lanri napahammi battuanna anjo nalangngereka ke'nanga nibaca.

EZRA 6:22

Tuju allo sallona ke'nanga a'rannu-rannu assuarri Passua'-suarrang Roti Tenaya nammake Pa'gambang. Sannang sikali nyawana ke'nanga lanri Napagio'na Batara nyawana karaeng Asyur, sa'genna a'jari lammoro' pa'mai'mo anjo karaeng Asyur mae ri ke'nanga, nampa nabantumo ke'nanga lalang anjo jama-jamang pambangunanna Balla'Na Batara, Allata'alana Israel ri Yerusalem.

1 PETRUS 1:7

Matu-matunna ngaseng anjo iamintu sollanna akkulle a'butti katappakkang tojeng-tojennu mae ri Batara yareka tena. Manna bulaeng akkullea panra' niuji tonji siagang pepe'. Jari, anjo katappakkannu la'bi lompoangangi anggaranna na bulaenga; jari musti niuji tongi sollanna a'jari jarre'. Siagang lanri kammana, lanipuji mako siagang lanipakala'biri' mako, kammayatompa lanipakatinggi mako sallang ri allo kabattuanNa ammotere' Isa Almasi.

YESAYA 60:19

Tena nuparallu nisingari ri allo ri wattu singaraka, siagang tena nuparallu nisingari ri bulang punna bangngi. Saba' iNakke Batara, la'jari singara' mannannungang mae ri kau, Kusingariko siagang kala'birangKu.

YESAYA 52:9

Akkio' rannuko, he sikamma rumbanna Yerusalem, saba' Nasaleori Batara umma'Na na Napakabebasa' Yerusalem.

ZAKHARIA 2:4

Nakana malaeka' makase'rea mae ri malaeka' makaruaya, “A'lampako linta' mange ri anjo tau rungkaya, siagang pauangi angkanaya lateai sipato' rassina kota Yerusalem napakamma tau siagang olo'-olo' niparakai, sa'genna tena olona lakkulle nibangung tembo' pakkallika ri tammulilina.

YEREMIA 31:27

INakke, Batara, angkana labattui wattunna pa'rasangang Israel siagang Yehuda laKupirassi tau siagang olo'-olo'.

YESAYA 51:3

Ikau Yerusalem, laKusaleoriko, siagang sikontu niaka ammantang ri alla'na rumbangannu. Sikamma parang kalotoro'nu Kupa'jari koko ga'ga, rapang Eden, koko coppongKu. Anjoreng taua larannui siagang ma'reja-rejai siagang appala' sukkuru' lalang kelong-kelong.

YESAYA 27:6

Ri wattu labattua sallang, bansa Israel lasanrapangi poko' kayu angngaka' siagang a'bakka', siagang napirassi tompo'na buttaya siagang rappo-rapponna.

PAMMUJI 53:6

Tau ja'dalaka lasanna' malla'na, natenaja apa appakamalla', saba' Napasiaraki Allata'ala buku-bukunna tau angkatulungiako; nitolla'mi ke'nanga ri Allata'ala, jari lanubetami ke'nanga.

NEHEMIA 8:17

Sikontu anjo ra'ya' ammotereka battu ri pa'rasangang pammelakkanga appare' ngasengi anjo balla'-ballaka, nampa ammantang ke'nanga anjoreng. Iaminne uru-uruna nigaukang appakkaramula ri jammanna Yosua ana'na Nun, nasanna' ngasemmo sungguna siagang sannanna nyawana ke'nanga.

YOHANES 17:22

Le'ba'mi Kusare kala'birang le'baka Kipassareang mae ri Nakke, sollanna a'jari se're ke'nanga, sangkamma iKatte siagang iNakke se're tonjaKi';

YESAYA 60:9

Iaminjo sikamma kappala' battua a'labu angngerangi umma'Na Batara ammotere' battu ri pa'rasangang bella. Angngerang tongi pera' siagang bulaeng untu' mammuji ri Karaeng Allata'alanu; mae ri Allata'alana Israel Kaminang matangkasaka, ampa'jariai umma'Na nipakalompo.

YESAYA 55:5

Lanukioki bansa-bansa maraenga, na battu linta' ke'nanga mae ri kau, lanri iNakke, Karaeng Allata'alanu, Allata'ala matangkasa'na Israel, lanri le'ba' mako Kupakalompo.”

YEREMIA 17:26

Sikamma tau niaka battu ri kota-kota Yehuda, kammayatompa battu ri desa-desa niaka ri tammulilina Yerusalem; laniaki ke'nanga battu ri daera Benyamin, battu ri daera bangkeng buluka, battu ri daera monconga siagang battu ri daera Yehuda bageang timboro'. Langngerangi ke'nanga mange ri BallakKu iamintu olo'-olo' lanipare' koro'bang, baji' lanitunua kammayatompa tenaya, kammayatompa gandung passare, kamanynyang, siagang passare kasukkurang.

YEHEZKIEL 37:10

Jari a'bicarama' situru' Naparentanga Batara, siagang napappatuikammo anginga anjo nappasaka antama' ri sikamma anjo tubua sa'genna attallasa'mo siagang ammentemmo ke'nanga. Teai sipato' jaina, sa'genna anggannaki a'jari se're pasukang tantara lompo.

YESAYA 26:15

Le'ba'mi Kipa'lappi-lappi jaina ummatTa, o Batara, Kipa'jari luara' daerana ikambe, lanri kammana anjo iKattemi nipakala'biri'.

YEREMIA 3:16

Nampa punna pila' katambammi jainu ri anne pa'rasanganga, tenamo nalanabicara pole taua ri passala'na Patti ParjanjiangKu. Tenamo nalanawa-nawa yareka nau'rangi ke'nanga, ba'lalo tenamo nalanaparalluangi yareka tenamo nalappare' pole ke'nanga Patti Parjanjiang maraeng.