YEREMIA 30:18 - KITTA' MATANGKASA'

¹⁸ Nakana pole Batara: “Ikau, ummakKu laKukamaseangko siagang laKupakabajiki ammotere' katallassannu ri butta passolongang cera' kalennu. Lanibangungi ammotere' Yerusalem, siagang lanipakabajiki balla' karaenna.

YEREMIA 30:18 Referans Kwoze

PAMMUJI 102:13

Mingka iKatte, o, Batara, Karaeng satunggu-tunggua, tuli niu'rangiKi' ri sikontu turungang.

YEREMIA 30:3

Nasaba' lanarapiki sallang wattunna nalaKupa'jari baji' ammotere' katallassanna ummakKu Israel siagang Yehuda. LaKuerangi ammotere' ke'nanga mange ri pa'rasangang le'baka Kupassareang mae ri boe-boena ke'nanga. Anjo pa'rasanganga lanapatangi ammotere' ke'nanga. INakke, Batara, anne akkana.”

YEREMIA 33:7

Yehuda siagang Israel laKupa'jari porei sangkamma riolo siagang lammentengi ammotere' salaku ummakKu.

YEREMIA 49:39

Mingka sallang, laKupa'jari bajiki ammotere' katallassanna Elam. INakke, Batara, anne akkana.”

YEREMIA 23:3

Mingka sesa-sesanna ummakKu laKupasse'rei battu ri sikamma pa'rasangang tampa'na ke'nanga Kupela'. LaKuerangi ke'nanga ammotere' mange ri butta passolongang cera'na, siagang jari-jarina ke'nanga lakatambangi jaina.

ZAKHARIA 1:16

Kamma-kamma anne ammoterekKa' mae ri Yerusalem untu' ampamopporangi anjo kotaya. Lanibangungi ammotere' BallakKu siagang lanipakabajiki ammotere' kota Yerusalem.”

YEREMIA 46:27

“UmmakKu, Israel, teako mallakki! AtangKu Yakub, teako annekkereki! Ikau siagang jari-jarinu laKupasalamakko battu ri pa'rasangang bella, ri tampa'nu nitahang. Lammoterekko nummantang ri pa'rasangannu siagang amang. Lattallasakko siagang sannang; tena parallu nukamallakkang.

YEREMIA 49:6

Mingka sallang, katallassanna bansa Amon laKupa'jari bajiki ammotere'. INakke, Batara, anne akkana.”

YESAYA 44:26

INakke ampakajarreki kananna atangKu, siagang anggaukangi rancana napa'nyataya tunisuroKu, iNakke angkana lanipammantangngi poleammi Yerusalem, siagang kota-kota Yehuda laKubangung poleangi ammotere'; laKupakabajiki sikamma rumbanganna.

YEREMIA 31:4

Bansanu laKupa'jari porei sangkamma riolo. Sikalipi pole langngalleko rabana, siagang a'jogekko napakamma rannu.

YEREMIA 33:11

Mingka anjoreng ri tampaka lania' pole kalangngerang sa'ra karannuang siagang kalompoang pa'mai' kammayatompa sa'ra passua'-suarrang pa'gaukang pa'buntingang. Lania' todong kalangngerang kelong-kelong tau angngerang koro'bang kasukkurang mange ri BallakKu. Lanakana ke'nanga, ‘Appala' sukkurukko mae ri Batara Kaminang Koasaya, lanri Ia bajiki siagang pangngamaseanNa sa'genna satunggu-tungguna.’ Anne pa'rasanganga laKupa'jari kalumanynyangi sangkamma riolo. INakke, Batara, anne akkana.”

1 PATTOTTORANG 29:19

Kisarei Salomo, ana' bura'neku, kaerokang attojeng-tojenga untu' anturuki sikontu parentaTa, siagang untu' ambangungi anjo balla' sambayanga, ia le'bakamo kupa'nia' parsadiaanna.”

YEREMIA 29:14

Tojeng, lanubuntulukKa'. LaKupasse'reko battu ri tangnga-tangngana tunggala' bansaya siagang battu ri pa'rasangang tampa'nu nipasisa'la'-sala' nipela'. LaKuerangko ammotere' mange ri pa'rasangang kabattuannu anne, siagang laKupakabajiki ammotere' katallassannu. INakke, Batara, anne akkana.’

YESAYA 44:28

INakke angkana mae ri Kores, ‘Ikau lammarenta untu' iNakke, siagang langgaukangi sikontu erokKu. Parentakangi sollanna nibangung ammotere' Yerusalem, siagang na nipadongko' batu pundasina Balla'Na Batara.’ ”

YEREMIA 31:38

Nakana Batara, “Lanarapiki sallang wattunna sikontu Yerusalem lanibangungi ammotere' a'jari kotaKu, battu ri Menara Hananeel sa'genna Pakke'bu' Lompo Panyingkuluka.

YEREMIA 31:23

Batara Kaminang Koasaya, iamintu Allata'alana Israel, nakana, “Punna le'ba'mi Kupa'jari pore ummakKu sangkamma riolo, ri pa'rasangang Yehuda siagang ri desa-desana nia' nilangngere' tau lakkana, ‘Dasi-dasi naNabarakkaki Batara bulu' matangkasaka ri Yerusalem tampa' pammantangngang matangkasaka untu' KalenNa.’

ZAKHARIA 12:6

Anjo alloa sikamma kaluarga Yehuda laKupa'jari rapang pepe' lalang ri pa'gompoang kayu tunua yareka sulo a'rinraya irawanganna gandung-gandung nikawarranga; lanaancuruki ke'nanga sikamma bansa-bansa niaka ri tammulilina. Mingka pandudu'na Yerusalem tuli ammantangi lalang ri kotaya siagang amang.

PAMMUJI 78:69

Nabangungi Balla'Na sanrapang pammantanganNa ri suruga, sanrapang lino, kassaka sa'genna satunggu-tungguna.

NEHEMIA 7:4

Anjo kota Yerusalem luaraki, mingka sike'de'ji pandudu'na, siagang tenapa najai balla' nibangung.

PAMMUJI 85:1

Untu' pamimping pakelong. Pammujina golongang Korah.

ZAKHARIA 14:10

Sikontu pa'rasanganga appakkaramula battu ri Geba bageang wara' sa'genna Rimon ri bageang timboro', la'jari lappara' ngasengi. Mingka Yerusalem lammenteng tinggi nai', la'bi tinggiangngang nabutta niaka ri tammulilina; anjo kotaya la'la'baki appakkaramula battu ri Pakke'bu' Lompo Benyamin sa'genna mange ri Pakke'bu' Lompo Panyingkulu', iamintu tampa'na pakke'bu' lompo Makase'rea siagang battu ri Menara Hananel sa'genna mange ri tampa' pammaccokang anggoro'na karaenga.

YEREMIA 31:40

Sikontu anjo ka'bung lapparaka, nipakea a'jari pa'jerakkang siagang tampa' pammelakkang loro, kammayatompa sikontu kokoa ri birinna Binanga Kidron sa'genna mange ri Pakke'bu' Lompo Jarang a'lampa anrai', lanisa'laki untu' iNakke. Kota Yerusalem tenamo nalaniruntungi yareka tenamo nalaniancuruki.”

1 PATTOTTORANG 29:1

Nampa nakana Karaeng Daud mae ri sikontu tau a'rappunganga anjoreng, “Battu ri sikontu ana' bura'neku, Salomomi Napile Allata'ala. Mingka rungka dudu iji siagang kurang iji pangalamanna, naanne jama-jamanga sanna' lompona. Nampa pole anjo lanibangunga teai balla' karaeng rupatau, passangalinna balla' untu' Karaeng Allata'ala.

PAMMUJI 48:3

Sion, bulu'Na Allata'ala, ammenteng sassa' sanna' ga'gana kotaNa Karaeng Malompoa ampakarannui sikontu linoa.

PAMMUJI 48:13

Inroimi Sion, nujappai akkuliling, siagang rekemmi menarana.

PAMMUJI 122:7

Poro nia' lalo passiamakkang lalang ri daeranu, na kasannangngang lalang ri tampa'-tampa' pattahangngannu.”

YEREMIA 29:11

Sai iNakke KalengKu angngassengi rancana-rancanaKu mae ri kau ngaseng? Anjo rancana-rancanaya tena nalanaerangko mae ri kapanrakanga, mingka untu' kasalewangannu siagang untu' ansareko panrannuang baji' untu' allo nudallekanga.

YEREMIA 32:15

Batara Kaminang Koasaya, iamintu Allata'alana Israel, Nakana angkanaya, balla', tampa', siagang koko anggoro' lanipare' balukangi sallang.”

YEHEZKIEL 36:11

Pandudu'nu siagang olo'-olo'nu laKutambai sa'genna a'jari sanna' jaina, la'bi jaiangngangi narioloa, siagang lammana'-manaki naccucu ke'nanga sanna' jaina. Lattallasaki ke'nanga anjoreng sangkamma riolo, siagang Kupa'jari kalumanynyangi, kamma tenayapa nale'ba' nukasia' rioloanganna. Jari lanaassemmi ke'nanga angkanaya iNakkemi Batara.

AMOS 9:14

LaKupa'jari kalumanynyangi ammotere' ummakKu Israel. Lanabangungi ammotere' kota-kotana ke'nanga le'baka runtung, nampa ammantang ke'nanga anjoreng. Lanalamungi koko-koko anggoro'na ke'nanga, siagang nainung je'ne'na. La'lamung-lamungi ke'nanga, nampa nakanre wassele'na.

ZAKHARIA 1:12

Nampa nakanamo anjo malaekaka, “O, Batara Kaminang Koasaya, tujupulo taummi salloTa larro mae ri kota Yerusalem siagang kota-kota niaka ri Yehuda. Siapapi salloTa tuli lalarro siagang tena naKipammopporangi ke'nanga?”

ZAKHARIA 12:7

INakke, Batara, lauru-uru assarei pammetang tantara Yehuda, sollanna tena nalompoangngang kala'birang natarimaya jari-jarina Daud siagang pandudu' Yerusalem, nakala'birang natarimaya pandudu'na Yehuda maraenga.

PAMMUJI 102:14

LambangungKi' na Kikamaseang Sion, narapi'mi wattunTa untu' mangngamaseang ri ia.

YEREMIA 32:44

sura' pammallina lanitekengi, nisarei segele', siagang nitekengi ri sa'bi-sa'bi. Anjo kammaya lakajariangi ri daerana Benyamin, ri desa-desa tammulilina Yerusalem, ri kota-kota Yehuda, ri kota-kota ri daera monconga, ri daera bangkeng buluka, siagang ri Yehuda bageang timboro'. Anne bansaya laKupakabajiki ammotere' katallassanna ri anne pa'rasanganga. INakke, Batara, anne akkana.”