YEREMIA 28:11 - KITTA' MATANGKASA'

¹¹ Ri dallekanna sikontu ra'ya' niaka hadere' anjoreng, nakanamo, “Nakana Batara, kammaminne carana laNatepo' lembarang napatabaya Nebukadnezar mae ri salangganna sikontu bansaya; laNagaukangi Batara anjo kammaya lalang ruan taung anne labattua.” Le'baki anjo a'lampami Hananya.

YEREMIA 28:11 Referans Kwoze

YEREMIA 14:14

Mingka appialimi Batara angkana, “Anjo na'bi-na'bia kabara' balle-balle naerang na nabalukang arengKu; tena naKusuroi ke'nanga, siagang tena todong Kuparentakangi ke'nanga yareka a'bicara mae ri ke'nanga. Anjo sikamma paccini' nacaritaya ke'nanga teai battu ri Nakke; nabotoi ke'nanga apa-apa tenaya matu-matunna siagang napare'-pare' kalennai ke'nanga.

PANGNGEBARANG 14:7

Teako agangi siagang tau dongoka'; tena apa-apa lakkulle naajarrangko.

YEREMIA 29:9

Napakei ke'nanga arengKu untu' ancaritai mae ri kau apa-apa tenaya natojeng. Tena naKusuroi ke'nanga. INakke, Batara, anne akkana.’

YEREMIA 23:17

Mae ri sikamma tau taeroka ampilangngeri kana-kanangKu, tuli nakana ke'nanga, ‘Lasalamakko.’ Nampa mae ri sikamma tau kapala batua, nakana ke'nanga, ‘Tena nulanggappa bala.’ ”

2 PATTOTTORANG 18:10

Kalase'renna anjo na'bi-na'bia, iamintu niarenga Zedekia ana'na Kenaana, appareki tanru'-tanru' bassi nampa nakana ri Ahab, “Iaminne kananNa Batara, ‘Iaminne tanru'-tanru' kammaya lakipake andengkai tu Siria nampa kiancuru' ke'nanga.’ ”

1 KARAENG-KARAENG 22:6

Jari napa'rappungammi Ahab kira-kira nia' 400 na'bi, nampa akkuta'nang ri ke'nanga angkana, “Maka akkulleja' mange ambunduki Ramot yareka tena?” Appialimi ke'nanga angkana, “Akkullei! LaNapassareangi Batara anjo kotaya mae ri katte.”

1 KARAENG-KARAENG 13:18

Jari a'balle-ballemi anjo na'bi toa battua ri Betel angkana ri ia, “Inakke na'bi tonja' sangkamma ikatte. Lanri parentaNa todong Batara na Nasuro malaeka'Na ampauanga' sollanna kubuntuliki' siagang kutoanaki' ri ballakku.”

YEHEZKIEL 13:7

INakke, Batara Kaminang Tinggia angkana ri ke'nanga, ‘Anjo sikamma paccini'nu sangnging tena nakontutojeng siagang anjo sikamma botonu sangnging balle-balle. Nupaui angkanaya yangasenna anjo pasangKu, padahala' iNakke tena le'bakKa' a'bicara mae ri kau! Lanri kammana anjo iNakke la'jari balinnu.

YEREMIA 28:15

Yangasenna anjo kupabattui mae ri Hananya, nampa kukana pole, “Pilangngeri he Hananya! Tena naNasuroko Batara; nupa'jari tappa'mi anne bansaya ri bicara balle-ballea.