YEREMIA 27:19 - KITTA' MATANGKASA'

^19-22 Nasaba' iNakke, Batara Kaminang Koasaya, Allata'alana Israel, le'ba'mi Kutappuki angkanaya sikontu anjo barang-baranga laniengkaki mange ri Babel, siagang tuli lania'na anjoreng sa'genna Kuparhatikang ammotere'. Anjo wattua nampami laKuerang ammotere' mae anrinni ri tampaka. INakke, Batara anne akkana.” Barang-barang niaka ija ri Balla'Na Batara iamintu: benteng-benteng, bongki tambaga, kareta-kareta, siagang siapa are barang maraenna Balla'Na Batara. Anjo barang-baranga tena natappinawang nierang mange ri Babel, ri wattunna Yoyakhin ana' bura'nena Yoyakim karaeng Yehuda siagang pamimping-pamimpinna tu Yehuda siagang Yerusalem niengkaki mange ri Babel ri Karaeng Nebukadnezar.

YEREMIA 27:19 Referans Kwoze

2 KARAENG-KARAENG 25:13

Sikamma benteng tambaga siagang kareta-kareta niaka ri Balla'Na Batara kammayatompa guci tambagaya nireppe'-reppeki ri tu Babel, nampa naerang kabusu' anjo tambagaya mange ri pa'rasanganna ke'nanga.

2 KARAENG-KARAENG 25:17

Anjo ruaya benteng tambaga sangkamma-kammai; tinggina massing 8 metere' siagang se're ulu benteng 1,3 metere' tinggina. Ri tammulilina anjo tunggala' ulu bentenga nianyangi siagang rappo delima battu ri tambaga.

DANIEL 1:2

Nisaremi pangngellai ri Batara untu' ambetai Karaeng Yoyakim, kammayatompa anrampasaki siapa are jaina barang-barang tinggia anggaranna ri Balla'Na Batara. Sikamma tau nitahanga, naerangi mange ri balla' rewatana ri Babel, nampa sikamma barang-barang tinggia anggaranna narampasaka, naboliki lalang ri gudang-gudanna anjo balla' rewataya.

1 KARAENG-KARAENG 7:23

Nampa appare' Huram se're bongki tambaga a'bundala', ia ukkuranna iamintu: lantanna 2,2 metere', la'buna garisi' tangngana 4,4 metere', siagang kalu'na 13,2 metere'.

1 KARAENG-KARAENG 7:27

Appare' tommi Huram sampulo kareta tambaga, massing-massing la'buna 1,8 metere', sangkara'na 1,8 metere', tinggina 1,3 metere'.

2 PATTOTTORANG 36:18

Sikamma pakkakasa' niaka ri Balla'Na Batara, barang-barang lompoa anggaranna, kammayatompa barang-baranna karaenga siagang pagawe-pagawena nirampasa' kabusuki ri karaeng Babel nampa nierang mange ri Babel.

PIRAUNG 1:10

Sikontu barang-baranna niallemi ri musu-musunna. Ba'lalo musti nacini'mi ke'nanga antama ri Balla'Na Allata'ala, panggaukang tenaya Nikellai ri Batara punna teai umma'Na.