YEREMIA 23:16 - KITTA' MATANGKASA'

¹⁶ Mae ri pandudu'na Yerusalem, Nakana Batara Kaminang Koasaya, “Teako pilangngeri kana-kananna sikamma na'bia, tuli ampabattuangko panrannuang kosong bawang. Pikkirang napare' kalenna bawang ke'nanga anjo napabattua, teai pasangKu.

YEREMIA 23:16 Referans Kwoze

YEREMIA 14:14

Mingka appialimi Batara angkana, “Anjo na'bi-na'bia kabara' balle-balle naerang na nabalukang arengKu; tena naKusuroi ke'nanga, siagang tena todong Kuparentakangi ke'nanga yareka a'bicara mae ri ke'nanga. Anjo sikamma paccini' nacaritaya ke'nanga teai battu ri Nakke; nabotoi ke'nanga apa-apa tenaya matu-matunna siagang napare'-pare' kalennai ke'nanga.

YEHEZKIEL 13:6

Sikamma paccini'na ke'nanga sangnging tena nakontutojeng siagang sikamma botona ke'nanga sangnging balle-balle. Naani ke'nanga kalenna angngerang pasang battu ri Nakke, padahala' iNakke tena le'bakai Kusuro ke'nanga. Antekamma lakkulle ke'nanga manrannuang ri botona ke'nanga anjo angkana la'rupai?

MATIUS 7:15

“Tutuko mae ri na'bi-na'bi palassua. Sanrapangi nicini' gimbala' ke'nanga, mingka sikontutojenna sanrapangi kongkong nye'nyereka lalang nyawana ke'nanga.

YEHEZKIEL 13:3

Nakana Batara Kaminang Tinggia, “Cilakai anjo na'bi-na'bi toloa! Anjo panggappana sangnging pikkirang napare'-pare', siagang anjo paccini'na sangnging balle-balle bawang.

1 YOHANES 4:1

Sikamma sari'battangku sannaka kukarimangnginna! Teako patappa' ngasengi tau nakanaya niaki RohNa Allata'ala ri kalenna; mingka pilajari rolong baji'-baji' sollanna akkulle nuasseng angkanaya roh battu kemae anjo niaka ri ke'nanga: Roh battuka ri Allata'ala yareka teai. Nasaba' kamma-kamma anne jai na'bi balle-balle a'jappa mange-mange.

YEREMIA 23:21

Nakana Batara, “Attojeng-tojeng sikali anjama anjo na'bi-na'bia, padahala' tena naKusuroi ke'nanga. ArengKu napau ke'nanga appabattu kabara', padahala' tena pasang Kupassareang mae ri ke'nanga.

2 KARAENG-KARAENG 17:15

Taerokai tu Israel siagang tu Yehuda anturuki parenta-parentaNa Batara siagang tena namajarre' ri parjanjiang le'baka napare' siagang boe-boena ke'nanga. Tena najampangi sikamma pappakainga'Na, passangalinna anynyombai ke'nanga mae ri barhala-barhala tenaya matu-matunna, sa'genna manna kalenna ke'nanga tena tommo matu-matunna. Naturuki ke'nanga panggaukanna bansa-bansa niaka ri ampi'na ke'nanga, manna pole nale'ba'mo nipisangkai ke'nanga ri Batara.

MIKHA 2:11

Erokko ri na'bi nangaia a'balle-balle siagang annipu kammayatompa ambotoai angkanaya langgappako anggoro' siagang inungang terasa' sa'genna alla'bi-la'bi.”

YEREMIA 23:26

Sa'ge kemae anjo na'bi-na'bia ero' ampa'lingui ummakKu siagang kabara' napare'-pareka kalenna ke'nanga?

YEHEZKIEL 22:28

Sikamma na'bia nacokkoi anjo dosa-dosaya; rapangi ke'nanga tau appa'leoki tembo' ra'masa'. Paccini'-paccini'na ke'nanga sangnging tena nakontutojeng; kammayatompa sikamma botona ke'nanga sangnging balle-balle. Naani ke'nanga angkanaya anjo pasang napabattua ke'nanga iamintu pasang natarima battu ri Batara Kaminang Tinggia, padahala' tena sikali-kali Kule'ba' a'bicara mae ri ke'nanga.

YEHEZKIEL 13:23

Kamma-kamma anne kala'busammi sikamma paccini' balle-ballenu siagang boto takontu tojennu. Kupasalamaki ummakKu battu ri pangaru ja'dala'nu. Na nuassemmo angkanaya iNakke Batara.”

YEHEZKIEL 13:16

he na'bi-na'bi takontutojenga! Nutappui angkana Yerusalem amangi siagang tangngapa-apayai, padahala' tena sikali nakamma!” Kammami anjo kananNa Batara Kaminang Tinggia.

YEREMIA 29:8

INakke Batara Kaminang Koasaya, Allata'alana Israel, ampakaingakko sollanna tena nupassareangi kalennu nitipu ri na'bi-na'bi niaka ammantang ri tangnga-tangnganu yareka ri nai-nai mamo nakanaya kalenna akkullei ke'nanga natappu apa lakajarianga ri allo labattua. Teako parhatikangngi so'na-so'nana ke'nanga.

YEREMIA 9:20

Kukana, “Pilangngeri kana-kananNa Batara he ikau ngaseng tubainea! Pangngajarrangi mae sikamma tulolonnu kelong-kelong karruka, mange ri agang-agannu kelong-kelong kasusaanga.

YEREMIA 2:5

Nakana Batara, “Kasalang apa nacini' boe-boenu ri Nakke, sa'genna a'boko mae ri Nakke? Naondangi ke'nanga barhala tenaya anggaranna na kale'bakkanna kalenna tonji ke'nanga a'jari tuna.

PANGNGEBARANG 19:27

Ana', punna taeroka mako appilajara', lanukaluppai apa le'baka nupappilajari.

ROMA 1:21

Naassengi rupataua Allata'ala, mingka taerokai rupataua ampakala'biriki salaku Allata'ala, siagang tena todong nappala' sukkuru' ri Ia. Ba'lalo apa-apa tenayaji matu-matunna nanawa-nawa rupataua; a'jari sassammi nawa-nawanna ke'nanga.

YEREMIA 9:12

Akkuta'nanga' angkana, “Batara, angngapa nanibalang parekang anne pa'rasanganga a'jari roso' siagang kalotoro', sangkamma parang luara' tenaya ampanumaloi? Maka nia' akkulle cara'de' untu' ampahangi apa battuanna yangasenna anne? Inai tau le'ba' Kipisingariang sollanna akkulle napatulusu' anjo kasingaranga mae ri tau maraenga?”

PIRAUNG 2:9

Sikamma pakke'bu' lompona nitambungi kabusu'mi ri butta, sikontu panjolina tepo' kabusu'mi; karaenga siagang pagawe-pagawe pamarentaya nia'mi ri pammelakkanga. Tenamo nanipangngajarrangi HukkunNa Batara; na'bia tena tommo nannarima pangngunju' battu ri Batara.

1 KARAENG-KARAENG 22:11

Kalase'renna battu ri anjo na'bi-na'bia, ia niarenga Zedekia ana'na Kenaana, appareki tanru'-tanru' bassi nampa nakana ri Ahab, “Iaminne Nakananga Batara, ‘Tanru'-tanru' sangkammaya minne lakitunrungangi Siria sa'genna ancuru' ke'nanga.’ ”

2 PATTOTTORANG 18:5

Jari appasse'remi Ahab kira-kira nia' 400 na'bi, nampa akkuta'nang ri ke'nanga angkana, “Maka akkulleja' mange ambunduki Ramot yareka tena?” Appialimi ke'nanga angkana, “Akkullei! LaNapassareangi Allata'ala anjo kotaya mae ri katte.”

YEREMIA 29:23

Kammami anjo sarenna ke'nanga, lanri le'ba'na nagaukang dosa-dosa lompoa ri Israel, iamintu: a'gau' bawangi ke'nanga, siagang napakei arenNa Batara untu' ancaritai apa-apa tenaya natojeng. Anjo kammaya sisalai siagang ero'Na Batara. Naassengi apa nagaukanga ke'nanga, siagang ia KalenNa a'jari sa'bi angngewai ke'nanga. Kammami anjo le'baka Nakana Batara.”