YEREMIA 2:30 - KITTA' MATANGKASA'

³⁰ Tena matu-matunnu Kuhukkung, lanri teanu appilangngeri pappakainga'. Rapang singa a'jalloka, sangkamma tomminjo batenu ambunoi sikamma na'binu.

YEREMIA 2:30 Referans Kwoze

NEHEMIA 9:26

Mingka apparicui ummatTa na tamannurukia, nabawang-bawangngangi hukkunTa siagang paratoranTa, nabunoi na'bi-na'bi ampakaingakai ke'nanga, assuroai ke'nanga ammotere' ri Katte, Allata'alana. O, Batara, a'mole-mole tongKi' nihina ri ke'nanga.

1 TESALONIKA 2:15

Iaminjo ke'nanga ambunoi Batara Isa siagang na'bi-na'bia, kammayatompa assessai ikambe. Namusu ngasengi rupataua, nanicallamo ke'nanga ri Allata'ala.

LAMPA-LAMPANA 7:52

Maka nia' na'bi tanisessaya ri boe-boenu? Nabunoi ke'nanga tunisuroNa Allata'ala, le'baka ampabattui riolo dudu angkanaya labattui anjo Ata matojenNa Allata'ala. Na kamma-kamma anne le'ba'mi nupasikongkolang siagang nubuno anjo Ana'Na Allata'ala.

YEREMIA 5:3

Sikontutojenna ia Natuntuka Batara iamintu pa'mai' tamamminraya. Natunrungko Batara, mingka tena nujampangi. Nalicakko, mingka taerokako niajara'. Kapala batuko, siagang taerokako toba' battu ri dosa-dosanu.

YESAYA 1:5

Angngapa natuli nubali-baliA'? Erokko nihukkung la'bi battallangngang pole? Rassimi ulunnu puru-puru lompo, garrimmi atinnu siagang pikkirannu.

MATIUS 23:29

Nakana pole Isa, “Cilaka ngaseng mako ikau guru-guru agamaya siagang tu Farisia, lanri nungaina assara-saraia! Nuga'gai pare'na jera'na na'bi-na'bia. Siagang numode bajiki mesanna tau baji'-bajika katallassanna.

YEREMIA 7:28

Jari, pauangi ke'nanga angkanaya anjo ke'nanga bansa taero' mappilangngeri ri Nakke, Batara, Allata'alana ke'nanga. Taerokai ke'nanga appilajara' battu ri hukkungang le'baka nakasia' ke'nanga. Lanynya'mi kajarrekanna ke'nanga mae ri Nakke, ba'lalo tenamo nanibicarai.”

YESAYA 9:13

Lanri kammana anjo lalang sialloji bawang Nahukkung Batara sikamma pamimpinna siagang ra'ya'na Israel. Napolongi ulunna nampa Napela' ulunna siagang ingkonna.

PAPPICINI' 16:9

Ammutummi rupataua napakamma bambanna, sa'genna natunraimo arenNa Allata'ala, Makoasaya mae ri sikamma anjo balaya. Manna nakamma tena todong naero' toba' ke'nanga battu ri dosa-dosana siagang tena naero' ke'nanga ammuji ri kalompoanNa Allata'ala.

ZEFANYA 3:2

Cilakai kota tenaya naero' antarimai pappakainga'Na Batara, siagang tenaya todong naero' anjampangi pangngajara'Na, tenaya naero' ampappirannuangi sarenna mae ri Batara, siagang tenaya nappala' tulung mae ri Ia!

YEHEZKIEL 24:13

He Yerusalem, anjo panggaukang-panggaukang kodinu nara'massimi kalennu. Kucobami antangkasiko, mingka tena matu-matunna, lanri tuli ra'masa'nu. Tena nulatangkasa' ammotere' sa'genna ammari pangngalarroingKu mae ri kau.

YEREMIA 31:18

Kulangngereki umma' Israel a'bicara lalang kapacceang, angkana, ‘O Batara, ikambe rapammi olo'-olo' tenayapa nipa'jari annabai mingka Kilati ummatTa untu' mannuruki, na kamma-kamma anne sadiami ikambe untu' ammotere' mae ri Katte. Jari, erammi ikambe ammotere', o Batara, Allata'alana ikambe.

2 PATTOTTORANG 36:16

Mingka napare' karek-karenanji anjo sikamma tunisuroNa Allata'ala, siagang nakakkali na'bi-na'biNa, kammayatompa tena najampangi kana-kananNa. Kale'bakkanna sanna'mi larrona Batara mae ri ke'nanga, siagang takkulleami ke'nanga ta'lappasa' battu ri hukkunganNa Batara.

2 PATTOTTORANG 28:22

Lalang ri wattu anjo kasukkaranga, ba'lalo pila' dorakaji Ahas mae ri Batara.

2 PATTOTTORANG 24:21

Mingka assikongkolo'mi ra'yaka untu' angngewai Zakharia, siagang Karaeng Yoas amminawang tongi lalang ri anjo passikongkolanga. Tenamo nau'rangi jasa-jasana siagang pa'mai' tamamminrana Yoyada, manggena Zakharia. Naparentakangi karaenga sollanna nisambilai batu Zakharia sa'genna mate ri paranglakkeng Balla'Na Batara. Ri wattunna lamatemo Zakharia, akkio'mi angkana, “Dasi-dasi naNacini' Batara anne panggaukannu nampa Nabalasa' mae ri kau!”

1 KARAENG-KARAENG 19:14

Appialimi Elia angkana, “O Batara, Allata'ala Kaminang Koasaya, tulusu' anjamaku untu' iKatte. Mingka umma' Israel nadakkai parjanjianna ke'nanga siagang iKatte. Narumbangi tampa'-tampa' pakkoro'bangnganTa siagang nabunoi na'bi-na'biTa. Inakke mami bawang tassesa, siagang kamma-kamma anne eroki ke'nanga ambunoa'!”

1 KARAENG-KARAENG 19:10

Appialimi Elia angkana, “O Batara, Allata'ala Kaminang Koasaya, tulusu' anjamaku untu' iKatte. Mingka umma' Israel nadakkai parjanjianna ke'nanga siagang iKatte. Nabongkaraki ke'nanga tampa'-tampa' pakkoro'bangnganga untu' iKatte nampa nabuno sikamma na'bi-na'biTa. Inakke mami bawang tassesa, nampa kamma-kamma anne eroki ke'nanga ambunoa'!”

YESAYA 59:3

Salako lanri a'balle-balleko siagang a'gau' jekkongko, lanri nugaukanna gau' katerassanga kammayatompa ammunoko.

YEREMIA 46:14

“Yeremia, pa'la'bangi nupau anne kabaraka mae ri kota-kota Mesir, iamintu ri Memfis, Migdol siagang Tahpanhes, angkana, ‘Pasadiai kalennu untu' attahang, lanri sikontu apa-apa niaka ri kau lanipanraki lalang pa'bundukang!

PIRAUNG 4:13

Mingka kajariang tojemmi anjo kammaya, lanri dosana sikamma imanga siagang na'bia. Le'baki napasolong cera'na tau tenaya salana.

YEHEZKIEL 22:24

“He tau, paui mae ri tu Israel angkanaya ra'masaki buttana ke'nanga, siagang lanri kammanami anjo naKularro siagang Kuhukkungi ke'nanga.

DANIEL 9:13

Sikontu anjo bala niaka tattulisi' lalang ri Hukkung napabattua Musa le'ba'mi Kipitujui ikambe. Mingka manna nakamma mamo, o Karaeng Allata'alana ikambe, tuli teana ija ikambe ampakasannangi atinTa. Tuli tenana naero' ikambe ambokoi dosa-dosana ikambe siagang taerokai ikambe amparhatikangi ajarang-ajaranTa.