YEREMIA 2:20 - KITTA' MATANGKASA'

²⁰ Nakana Batara, “Sallo mako taeroka anynyomba ri Nakke; taeroka mannuruki yareka mappilangngeri ri Nakke Irate ri tunggala' bulu' tinggia nai', siagang irawanganna poko' kayu lompoa anjorengko anynyomba ri rewata-rewata kacopponganga.

YEREMIA 2:20 Referans Kwoze

PAOLE 12:2

Punna antama' mako ri anjo pa'rasanganga, musti nuancuru' ngasengi sikamma tampa'-tampa' panynyombanga irate ri moncong-moncong tinggia, ri bulu'-buluka siagang irawanganna poko'-poko' kayu copponga leko'na, tampa'na bansa niaka ammantang anjoreng untu' anynyomba ri rewata-rewatana ke'nanga.

KAIMANGNGANG 26:13

INakke, Karaeng Allata'alanu, angngerangko assulu' battu ri butta Mesir sollanna tenamo nu'jari ata. Le'ba'mi Kutepoki kakoasang anjallakkangako, siagang Kupa'jari mako tau maradeka.”

YEREMIA 17:2

Sikamma taunnu assambayangi ri tampa'-tampa' pakkoro'bangnganga siagang benteng-benteng barhala le'baka nabangung untu' rewata niarenga Dewi Asyera ri tunggala' poko' kayu copponga, ri coppo'-coppo'na buluka,

HOSEA 3:3

Kukanamo ri ia angkanaya musti salloi antayanga'. Lalang anjo wattu attayanna takkulleai a'gau' bawang yareka assundala', na inakke tena todong kula'reppese' mae ri ia.

YEREMIA 30:8

Nakana pole Batara Kaminang Koasaya ri umma'Na, “Punna battu sallang anjo alloa, laKutepoki anjo lembarang Kupatabaya ri salanggannu, siagang Kulappassangi passikko'nu. Tenamo nula'jari ata pole mae ri bansa maraenga.

YESAYA 1:21

Kota tamamminraya tappa'na riolo taunna, kamma-kamma anne sanrapammi baine pagau' sala! Riolo yangaseng pandudu'na adeleki, lambusuki, mingka kamma-kamma anne sangnging pabuno-buno pandudu'na.

NAHUM 1:13

Kamma-kamma anne laKupa'le'ba'mi koasana Asyur mae ri kau ngaseng, siagang Kutappu' rante ansikkokai kalennu.”

HOSEA 2:5

Amma'nu pasundala' tena siri'na. Angkanai, ‘Erokka' a'lampa mange ri tanring-tanringku, assarea' kanre-kanreang siagang inung-inungang, kaeng wol siagang kaeng lenang, minynya' zaitun siagang anggoro'.’

YEHEZKIEL 23:5

Manna pole nakubaineammo anjo Ohola, mingka tuli nagaukanna assundalaka, siagang sanna' lompona nyawana allayani sikamma tanrinna battu ri Asyur.

YEHEZKIEL 20:28

Kuerangi ke'nanga mange ri butta le'baka Kupa'janjiang mae ri ke'nanga. Ri wattunna nacini' ke'nanga bulu'-bulu' tinggia siagang poko'-poko' kayu copponga leko'na, assaremi ke'nanga koro'bang anjoreng ri sikamma anjo tampaka. NapakanassuA' ke'nanga lanri assarena ke'nanga koro'bang-koro'bang nitunu siagang anggoro'.

YEHEZKIEL 16:41

Lanatunui ke'nanga sikamma balla'nu nampa nasuro sikamma tubai'-bainea anciniki anjo hukkunganga. Kammami anjo bateKu lampamariko ri gau' bawannu. Tenamo nula'bage-bage hadia mae ri sikamma tanrinnu.

YEHEZKIEL 16:31

Ri tana lapanna kotaya siagang ri biring-biring aganga appaentengko tampa'-tampa' untu' anynyomba barhala siagang assundala'. Mingka ikau tena nusangkamma pasundala' samaraka parallua ri doe'.

YEHEZKIEL 16:28

Mingka tenapa nasangga nusa'ring pakkasia'nu; lanri kammana anjo, nuondang-ondangi pole tu Asyur. A'jariko pasundala'na ke'nanga, mingka tena tompa nasangga nusa'ring pakkasia'nu mae ri ke'nanga.

YESAYA 14:25

Tu Asyur niaka ri Israel pa'rasangangKu, laKupanraki, na ia niaka ri moncong-moncongKu laKuonjo'-onjokangi. LaKupakabebasaki bansaKu battu ri panjallakkanga siagang battu ri erangngang battala' napassakanga bansa Asyur.

YESAYA 10:27

Anjo wattua laKulappassangko battu ri panjallakkanna Asyur, nampa tenamo nakoasa ke'nanga mae ri kau.”

YESAYA 9:4

A'lappe'-lappeki sa'ra sapatuna tantaraya na bajunna rassi cera', lala'busu' nikanre ri pepe'.

PAMMUJI 78:58

Napa'ngarai ke'nanga Allata'ala ri tampa' panynyombang barhalaya, napassereati Allata'ala siagang patung-patunna ke'nanga.

1 KARAENG-KARAENG 12:32

Nampa natampakkang Yerobeam anjo imang-imanga ri Betel untu' anggaukangi tugasa'na anjoreng, nampa ia kalenna assare koro'bang mae ri anjo sapi-sapi bulaeng napareka. Nampa napattantu angkana tanggala' sampulo allima bulang sagantuju allo lompo untu' Israel, sangkamma allo lompoa ri Yehuda. Anjo alloa a'lampai Yerobeam mange ri Betel siagang assare koro'bang untu' ansuarri anjo allo lompo le'baka napattantu.

1 SAMUEL 12:10

Nampa appala' doang ke'nanga mae ri Batara siagang namangakuimi dosa-dosana ke'nanga, angkana, ‘Dorakami ikambe lanri nabokoinTa, o Batara, siagang anynyombami ikambe mae ri patung-patunna Rewata Asytoret siagang Baal. Mingka kamma-kamma anne, Kipasalamaki ikambe battu ri musunna ikambe, nampa anynyomba ikambe mae ri Katte!’

YOSUA 24:26

Sikontu anjo hukkunga siagang paratorang-paratoranga natulisiki lalang ri Kitta' HukkunNa Allata'ala. Nampa angngalle se're batu lompo, na napaenteng irawanganna poko' kayu lompoa ri tampa' nisa'laka untu' Batara.

YOSUA 24:24

Nampa nakanamo anjo taua mae ri Yosua, “Ikambe Batara Allata'alata bawang lanisomba. Lanaturuki ikambe parenta-parentaNa.”

YOSUA 1:16

Jari appialimi suku Ruben, Gad siagang bageruanna suku Manasye, angkana, “Apa-apa mamo nuparentakang mae ri kambe, tena tanagaukanna ikambe; siagang manna kemae nusuro a'lampa ikambe, tena ta'lampana ikambe.

PAOLE 26:17

Anne alloa nuakui Batara salaku Allata'alanu. A'janjiko untu' mannuruki mae ri Ia, siagang anggaukangi sikontu hukkunNa kammayatompa parentaNa.

PAOLE 15:15

U'rangi angkanaya ikau ata tonjako riolo ri Mesir nampa nipakabebasakko ri Karaeng Allata'alanu; iaminjo saba'na nakupassareang anne parentaya mae ri kau.

PAOLE 5:27

Lanri kammana anjo, a'lampa mako Musa, pilangngeri sikontu apa Napaua Karaeng Allata'alata, nampa pabattui sallang mae ri kambe anjo apa Napaua mae ri kau. Lanapilangngeri ikambe siagang mannuruki ikambe.’

PAOLE 4:34

Le'bakika nia' rewata barani angngalle se'reang bansa battu ri bansa-bansaya nampa napa'jari ke'nanga umma' kalenna, sangkamma Nagaukanga Karaeng Allata'alanu untu' ikau ri Mesir? Kalennu anciniki antekamma bateNa Allata'ala appabattu kagassingang lompo, angngeranga bala siagang pa'bundukang, anggaukangai gau'-gau' appakalannasaka siagang apa-apa hebaka.

PAOLE 4:20

Mingka ikaumi bansa Napasalamaka battu ri butta Mesir, tampa'nu sessa dudu riolo. Naerangko assulu' battu ri anjo pa'rasanganga, sollannu a'jari bansa KalenNa sangkamma kaadaannu kamma-kamma anne.

KALAPPASSANG 24:3

Jari a'lampami Musa siagang napa'la'bammi napauang anjo bansaya sikontu parentaNa siagang paratoranNa Batara. Appadami appiali ngaseng ke'nanga angkana, “Sadiami ikambe langgaukangi sikontu Nakanaya Batara.”

KALAPPASSANG 19:8

Appada-pada ngasemmi ke'nanga appiali angkana, “Sadiai ikambe untu' anggaukangi sikontu kananNa Batara.” Anjo pappialinna ke'nanga napabattui Musa mae ri Batara. Nampa Nakanamo Batara ri Musa, “LabattuA' mae ri kau nikalimbuki ri rammang kapalaka; lanalangngereki taua punna a'bicarA' mae ri kau, nappakkaramula anjo wattua tuli latappa'mi ke'nanga mae ri kau.

KALAPPASSANG 3:8

Lanri kammana anjo, erokKa' naung untu' allappassangi ke'nanga battu ri limanna tu Mesirka, nampa Kuerang ke'nanga assulu' battu ri anjo pa'rasanganga naKuerang mange ri pa'rasangang luaraka. Buttana coppongi siagang akkalumanynyangi. Kamma-kamma anne anjo pa'rasanganga napammantangi bansa Kanaan, bansa Het, Amori, Feris, Hewi siagang Yebus.

PAPPICINI' 17:1

Le'baki anjo battumi mae ri nakke kalase'renna anjo tujua malaeka' anna'galaka pammoneang na nakana, “Maeko, lakupicinikiangko antekamma batena lanihukkung anjo pasundala' lompoa, iamintu anjo kota lompoa, nibangunga ri ampi'na binanga-binangaya.

1 KARAENG-KARAENG 14:23

Irate ri bulu'-buluka siagang irawanganna poko'-poko' kayu lompoa, ambangummi ke'nanga tampa'-tampa' panynyombang mae ri barhalaya, siagang appaentemmi ke'nanga bangunang-bangunang kammayatompa patung-patung rewata baine Asyera untu' nasomba ke'nanga.

PAMMUJI 107:14

Naerangi ke'nanga assulu' battu ri kasassangnganga, nampa Natepo' rante bassi passikko'na ke'nanga.

YEREMIA 2:31

He umma' Israel, pilangngeri anne kana-kanangKu. Maka le'bakKa' a'jari rapang parang lompo mae ri kau yareka rapang butta masassanga? Mingka angngapa nanukana erokko bebasa', siagang taeroka mako ammotere' mae ri Nakke?

YEREMIA 3:13

Akuimi angkanaya salako siagang anjari baliko mae ri Batara, Allata'alanu. Akuimi angkanaya le'baki nupassareang pangngainnu mae ri rewata-rewatana bansa maraenga irawanganna poko'-poko' kayu lompoa, siagang tena numannuruki ri parenta-parentaKu. INakke, Batara, anne a'bicara.”

YEREMIA 5:5

Baji'mi nakua'lampa mae ri sikamma tumalompoa, nampa a'bicara siagang ke'nanga. Mattantu naassengi ke'nanga apa Nakaerokia siagang Natuntuka Karaeng Allata'ala battu ri ke'nanga.” Mingka, yangasenna anjo ke'nanga tena todong naero' Niparenta ri Batara; taerokai ke'nanga mannuruki ri Ia.

YEREMIA 13:27

Le'ba'mi Kucini' nugaukang sikamma apa-apa tenaya naKungai. Kucini'mi nuondang rewata-rewata maraenga ri buluka siagang ri kokoa, rapang sitau bura'ne a'lingu-lingu ero' mae ri bainenna taua, yareka jarang laki balere' dudua mae ri jarang ganaya. He pandudu'na Yerusalem, cilaka mako! Angngapapi nulata'lappasa' battu ri sikontu kaja'dallanga?”

HOSEA 4:13

Ri tampa'-tampa' panynyombang barhalaya ri coppo'-coppo' buluka siagang monconga, anjoreng ngaseng mako assare koro'bang siagang attunu dupa irawanganna poko'-poko' kayu lompoa siagang copponga leko'na lanri dinging-dinginna anjo tampaka. Mingka apa kale'bakkanna? Sikamma tulolonnu a'jari pasundala'mi siagang sikamma mintunnu bainea a'gau' bawammi!

HAKING-HAKING 2:11

Nampa dorakamo bansa Israel mae ri Batara. Tenamo nanynyomba ke'nanga mae ri Batara, Allata'alana boe-boena ke'nanga, iamintu Allata'ala le'baka angngerangi ke'nanga assulu' battu ri butta Mesir. Appakkaramulami ke'nanga anynyomba mae ri rewata niarenga Baal siagang Asytoret kammayatompa rewata-rewata maraengannaya, nasombaya bansa-bansa niaka ri tammulilina ke'nanga. Jari larromi Batara mae ri ke'nanga. Na Nalappassammo garombolanga ambunduki siagang anrampoki ke'nanga. Natena sikali pakkullena ke'nanga andallekangi anjo musu-musu battua ri tammulilina ke'nanga.

HAKING-HAKING 10:6

Dorakami pole umma' Israel mae ri Batara. Tenamo namangngu'rangi ke'nanga ri Batara, siagang tenamo nanynyomba mae ri Ia. Rewata-rewata Baal siagang Asytoret a'giling nasomba ke'nanga. Kammayatompa rewata-rewata bansa Siria, Sidon, Moab, Amon siagang Filistin, yangasemminjo nasomba ke'nanga.

PAMMUJI 2:3

Nakanamo anjo pinggawa-pinggawaya, “Umba nita'bangi koasana ke'nanga na nire'bu' kabebasanta!”

HOSEA 1:2

Ri wattunna uru a'bicara Batara mae ri bansa Israel tete ri nakke, Nakana Batara, “Hosea, a'buntingko siagang sitau baine nangaia assundala' nampa ana'-ana'nu la'jari sangkamma tongi anjo bainennu. UmmakKu sangkammai anjo bainennu; tena namajarre' pa'mai'na ke'nanga mae ri Nakke, siagang nabokoiA'.”

HOSEA 9:1

He bansa Israel, tea' mako pakalompoi pole allo-allo lomponu sangkamma bansa-bansa maraenga. Nubokoimi Allata'alanu siagang tenamo namajarre' pa'mai'nu mae ri Ia. Ri tampa'-tampa' panggilingang gandunga nubalukangi kalennu a'jari rapang pasundala' mae ri Rewata Baal, siagang sannangi nyawanu antarimai gandung nukanaya sawala' nugappa battu ri anjo rewataya!