YEREMIA 14:19 - KITTA' MATANGKASA'

¹⁹ Batara, maka Kisorongboko taba sikalimi Yehuda na Kikabirisi pandudu'na Sion? Angngapa nasarring kamma pannunrunTa ri kambe sa'genna takkulleamo ammolle ammotere' ikambe? Tena matu-matunna ikambe a'boya kaamangngang, tena bua'-bua'na a'boya pammolleang, nasaba' katerassang bawang nia'.

YEREMIA 14:19 Referans Kwoze

PIRAUNG 5:22

Yareka Kipela' tojeng-tojemmi ikambe? Maka tenamo sanggana larroTa mae ri kambe?

YEREMIA 8:15

Tena matu-matunta ma'minasa ri kaamangngang siagang ri pammolleang, nasaba' ia niaka sangnging katerassang.

1 TESALONIKA 5:3

Punna nakana taua, “Amang ngasenji siagang sannang ngasenji,” iaminjo wattua nati'ring natuju ke'nanga kapanrakang na tena manna sitau akkulle ta'lappasa'. Tena nanisanna-sannai nakajariang anjo passalaka; sanrapangi pa'risi'na se'rea baine ri wattunna lanalassukang ana'na.

YEREMIA 6:30

Lanigallaraki ke'nanga pera' nipela', nasaba' iNakke, Batara ampelaki ke'nanga.”

YEREMIA 30:13

Tena manna sitau ero' angngusahai sollannu ammolle battu ri garrinnu, tena pa'balle untu' lattannu, tena panrannuannu la'jari baji'.

YEREMIA 15:18

Angngapa kutulusu' sessa mamo? Angngapa nasanna' lokokku siagang tena le'bakai ammolle? Maka erokKi' ampakala'bai pa'maikku rapang binanga a'jari kalotoroka ri wattu timoro'?”

YEREMIA 12:8

Umma' nipileKu nabaliangA'; rapang singa ri romang lompoa, kammaminjo ammarrunna sa'ranna ke'nanga mae ri Nakke. Iaminjo saba'na naKubirisi' mae ri ke'nanga.

PAMMUJI 78:59

Nacini'na kammaya, tamaka larroNa Allata'ala, Natolla' tojeng-tojemmi ke'nanga.

AYUB 30:26

Kuminasai mate'nea siagang singaraka, mingka kasukkarrang siagang kasassangang battu.

PIRAUNG 4:17

Mangngammi matanna ikambe attayang pannulung tenaya nabattu-battu. Manrannuangi ikambe ri pannulunna senreang bansa, mingka tenaya nakkulle assare apa-apa.

PIRAUNG 2:13

O Yerusalem, Kota Sion ningaiku, rapangi tamparang lompoa sanna'na runtunnu. Apami kutadeng lakukana untu' assareko panynyaleori? Nasaba', tena niakkapa tau ballasa' sangkamma ikau. Sitojeng-tojenna tenamo tau akkulle assareko kabajikang.

YEREMIA 15:1

Nakana Batara ri nakke, “Tena nalaKukamaseang anne bansaya, manna pole nania' Musa siagang Samuel anrinni untu' ammenteng ampappalakkangi ke'nanga pangngamaseangKu. Suroi anne bansaya a'lampa, tena Kuero' anciniki ke'nanga!

YEREMIA 8:22

Apa kutadeng lanrinna nasa'genna kamma-kamma anne tena memampa nammolle bansaku? Maka tenamo dottoro' yareka pa'balle ri sikontu Gilead?

YEREMIA 7:29

Nakana Batara, “He pandudu' Yerusalem, susa mako! Polongi uu'nu nampa nupela'! Akkelongko kelong-kelong karru' irate ri coppo'-coppo' buluka, nasaba' iNakke, Batara larro siagang Kusorongboko ngasengko.

PAMMUJI 89:38

Tuli lania'na kakaraenganna sanrapang bulang, iami sa'bi tamamminra rate ri rammanga.”

2 PATTOTTORANG 36:16

Mingka napare' karek-karenanji anjo sikamma tunisuroNa Allata'ala, siagang nakakkali na'bi-na'biNa, kammayatompa tena najampangi kana-kananNa. Kale'bakkanna sanna'mi larrona Batara mae ri ke'nanga, siagang takkulleami ke'nanga ta'lappasa' battu ri hukkunganNa Batara.

YEREMIA 12:7

Nakana Batara, “Tampa' pammantangangKu tenamo naKujampangi; pa'rasangang Kupatanga Kubokoimi, siagang ummakKu Kukamaseanga Kupassareammi ri limanna musu-musunna.

MIKHA 1:12

Nia'mi battu ri dallekang pakke'bu' lompona Yerusalem bala battua ri Batara! Lanri kammana anjo, tena olona tu Marot anrannuang pannulung.

PANGNGEBARANG 29:1

Inai tulusu' tappilangngeria nipakainga', lapanraki ri se'reang wattu, na takkullea nipakabaji' poleang.

YEREMIA 30:12

Nakana Batara ri umma'Na: “Garrinnu teai sipato' sanna'na, untu' loko'nu tena pa'ballena.

YEREMIA 51:5

INakke, Batara, iamintu Allata'ala Kaminang Koasaya, Allata'ala Matangkasa'na Israel, tena nalaKubokoi Israel siagang Yehuda, manna pole nadorakamo ke'nanga ri Nakke.

PIRAUNG 2:22

Kikioki musu-musu nakamallakkanga ikambe untu' assua'-suara' ja'dala' ri tammulilina ikambe. Nabuno kabusuki ke'nanga sikontu le'baka naparakai siagang nasayanga ikambe. Ri wattu larroTa, tena manna sitau akkulle lari.