YEHEZKIEL 48:15 - KITTA' MATANGKASA'

¹⁵ Bageang timboro'na anjo butta nisa'laka, nia' ija tassesa 12,5 kilometere' la'buna, siagang 2,5 kilometere' sangkara'na. Anjo bageanga tena natangkasa' siagang akkullei napake ra'yaka untu' tampa' pammantangngang siagang untu' parang ruku'; ri bageang tangngana musti nibangungi se're kota.

YEHEZKIEL 48:15 Referans Kwoze

YEHEZKIEL 45:6

Pantaranganna anjo tampa' matangkasaka, musti nia' todong nisa'la' tampa' 12,5 kilometere' la'buna siagang 2,5 kilometere' sangkara'na untu' se're kota akkullea napammantangngi inai-nai mamo battua ri bansa Israel.

YEHEZKIEL 42:20

Jari, tampa' antamaya ri daerana Balla'Na Batara, iamintu appa' pasagi, 250 metere' ri tunggala' sa'rinna. Anjo tampaka nikulilingi ri se'reang tembo' untu' ansimbangi daera nisa'laka untu' Batara battu ri daerana tau jaia.

1 TIMOTIUS 3:15

sollanna punna tenapa nakulinta' battu, nuasseng memammi angkana antekamma bateta musti attallasa' salaku ana'-ana'Na Allata'ala, iamintu jama'aNa Allata'ala mattallasaka. Iaminne jama'aka a'jari sanrapang benteng panjarrekinna siagang pattumpa'na katojengang battua ri Allata'ala.

YEHEZKIEL 44:23

Sikamma imanga musti naajaraki ummakKu untu' angngassengi angkanaya kereanga nisa'la' untu' iNakke siagang kereanga tena, kereanga matangkasa' situru' agamaya siagang kereanga ra'masa'.

YEHEZKIEL 22:26

Sikamma imanna tu Israel nadakkai hukkung-hukkungKu siagang nara'massi apa-apa le'baka nisa'la' untu' iNakke. Tena napasimmaraengi ke'nanga angkanaya kereanga hallala' siagang kereanga harang. Tena todong naajaraki ke'nanga ra'yaka untu' ampasimmaraengi angkanaya kereanga tangkasa' siagang ra'masa' manuru' paratorang agamaya. Tena najampangi ke'nanga allo Pammari-marianga. Lanri kammanami anjo nanahinaMa' bansa Israel.