YEHEZKIEL 46:2 - KITTA' MATANGKASA'

² Ri anjo allo-allo kammaya patugasaka musti antamaki battu ri paranglakkeng bageang pantarang angngolo ri kamara' lompoa nampa ammenteng ri sa'rinna pakke'bu' lompoa, lalang assarena koro'bang sikamma imanga, iamintu koro'bang nitunu siagang koro'bang passiamakkang battu ri sikamma patugasaka. Anjoreng ri pakke'bu' lompoa musti su'juki siagang anynyomba ri Batara, nampa a'lampa. Nampa takkullea nitongko' anjo pakke'bu' lompoa sa'genna bangngi.

YEHEZKIEL 46:2 Referans Kwoze

YEHEZKIEL 44:3

Mingka pamarenta anna'galaka koasa akkullei a'lampa mange ri anjo pakke'bu' lompoa untu' angkanrei kanre matangkasaka ri dallekangKu. Musti antamaki angngolo ri kamara' lompoa siagang punna ammotereki ia todong anjo naolo.”

YEHEZKIEL 46:8

Punna ero' patugasa' pamarentaya anggaukangi ibadaya ri BallakKu, musti anjorengi ri kamara' lompoa angngolo antama, kammayatompa punna ammotereki ia todong anjo naolo.

KOLOSE 1:28

Iaminjo Almasi nabirittakanga ikambe mae ri sikontu rupataua. Kipakainga'mi siagang kiajara' ngasemmi ke'nanga siagang baji'-baji'. Pattujunna ikambe iamintu sollanna akkulle ngaseng nierang rupataua mae ri Allata'ala, salaku tau baji'mo katallassang rohanina, lanri asse'renamo siagang Almasi.

MATIUS 26:39

A'lampa bella-bellami Isa sike'de' mange ri dallekang, nampa su'ju' naung ri buttaya appala' doang angkana, “O, ManggeKu, ka'de' nia' kulleanna, pabellami anne passessaya ri Nakke. Mingka teaKi' naerokKu anjari, passangalinna erotTamo anjari.”

YEHEZKIEL 46:12

Punna ero' patugasa' pamarentaya angngerang passare ri ero' kalenna mae ri Batara, baji' a'rupa koro'bang nitunu kammayatompa koro'bang passiamakkang, musti nisungkeangi pakke'bu' lompo bageang iraya a'lampa mangea ri paranglakkeng bageang lalang. Carana ampassareangi anjo koro'banga musti sangkammai cara nagaukanga ri allo Pammari-marianga, mingka punna ammotere'mi musti nitongkoki linta' anjo pakke'bu' lompoa.”

YEHEZKIEL 45:19

Imanga musti naallei cera'na anjo koro'bang pannangkasi dosaya, nampa napasapu ri sikamma pakke'bu'na BallakKu, kammayatompa ri appa' panyingkulu'na tampa' pakkoro'bangnganga siagang ri benteng-benteng pakke'bu' lompo a'lampa mangea ri paranglakkeng bageang lalanga.

2 PATTOTTORANG 23:13

Naciniki anjo karaeng berua ammenteng ri pakke'bu' antamaya ri Balla'Na Batara, ri tampa'na nilanti' a'jari karaeng, nitammulili ri perwira-perwiraya siagang tau appasa'raya tarompe'. Sikontu ra'yaka akkio' rannu kabusuki nirurungang ri sa'ra tarompe' siagang ri pakarena musi' niaka ri Balla'Na Batara, untu' ampakasuaraki anjo gau' lompoa siagang pakkakasa' musi'na ke'nanga. Lussa'mi Atalya siagang nakae-kaemi pakeanna, nampa ammarrang angkana, “Pasikongkolang! Pasikongkolang!”

1 PATTOTTORANG 17:16

Antama'mi Karaeng Daud ri KemaNa Batara. Nampa ammempo nappala' doang angkana, “O, Karaeng Allata'ala, inakke siagang kaluargaku tena kusiratang antarimai sikamma kabajikang Kipappicinikanga anne siapa sallona.

1 PATTOTTORANG 9:18

Sa'genna anne alloa battu ri bija-bijannami anne ke'nanga nisare tugasa' anjagai Pakke'bu' Lompona Karaenga ri bageang rayaya. Riolo bija-bijanna ke'nanga nisarei tugasa' anjagai sikamma pakke'bu' lompo mangea ri pa'ballakkanna tu Lewi.

YEHEZKIEL 40:19

Anjoreng nia' pakke'bu' lompo maraeng, tinggiangnganga pammantanganna siagang a'lampa mangea ri paranglakkeng bageang lalanga. Naukkuru' tongi anjo tu bura'nea bellana battu ri anjo ruaya pakke'bu' lompo, iamintu 50 metere'.

YEHEZKIEL 40:39

Ri anjo kamara' lompoa, nia' appa' mejang, ta'ruai ri sa'rinna. Irate ri anjo mejanga nipolong olo'-olo' koro'bang nitunua, yareka koro'bang pannangkasi dosaya yareka koro'bang untu' sambe karugiang.