YEHEZKIEL 43:7 - KITTA' MATANGKASA'

⁷ “He tau, iaminne empoang kakaraengang kala'birangKu. AnrinniA' lammantang ri tangnga-tangngana umma' Israel siagang ammarenta mae ri ke'nanga sa'genna satunggu-tungguna. Baji' nake'nanga, kammayatompa sikamma karaenna ke'nanga, tenamo nalanara'massi areng matangkasakKu lanri anynyombana barhala yareka natarawanna maya'na sikamma karaenna ke'nanga anrinni ri tampaka.

YEHEZKIEL 43:7 Referans Kwoze

YEHEZKIEL 43:9

Mingka appakkaramula kamma-kamma anne musti napammari ke'nanga anynyomba ri barhala siagang napaletteki sikamma maya'na karaenna ke'nanga. Le'baki anjo, lammantamMa' ri tangnga-tangngana ke'nanga sa'genna satunggu-tungguna.”

PAMMUJI 47:8

Allata'ala Karaeng ri sikontu linoa, pujimi siagang kelong mabaji'!

KAIMANGNGANG 26:30

LaKuancuruki sikamma tampa' panynyombannu ri bulu'-buluka, Kurumbangi sikamma tampa' pakkoro'bangngannu untu' attunu dupa, nampa Kupasambila sikamma maya'nu mae ri rumbanna anjo sikamma barhalanu. ErokKa' Kusa'ring ta'langnge

PAPPICINI' 22:3

Tena sikali lalang ri anjo kotaya apa-apa akkullea nataba pangngalarroiNa Allata'ala. Anjo empoang kala'biranNa Allata'ala siagang Ana' Gimbalaka niaki lalang ri anjo kotaya. Lanynyombami sikamma atanNa Allata'ala mae ri Allata'ala;

YEHEZKIEL 20:39

Nakana Batara Kaminang Tinggia, “He tu Israel, kamma-kamma anne battu ri kau tommami. Patulusu'mi a'gau' dosa anynyomba ri barhala-barhalanu! Mingka u'rangi angkanaya punna le'baki anjo musti mannurukiko ri Nakke siagang tenamo nanura'massi areng matangkasakKu lanri angngerannu passare mae ri anjo barhala-barhalanu.

YEHEZKIEL 1:26

Irate ri anjo pattongkoka nia' kucini' kamma empoang karaeng nipareka battu ri batu nilang, nampa irate ri anjo empoanga nia'mo kucini' ammempo sangkamma tau.

PAMMUJI 99:1

Batarami Karaeng; annekkereki bansa-bansaya. Ammempoi ri empoang kala'biranNa irate ri malaeka' akka'nyi', ta'goccangi buttaya.

1 PATTOTTORANG 28:2

Ammentemmi Daud ri dallekanna ke'nanga nampa nakana, “Sikamma sari'battang julu bansaku, pilangngeri anne kanangku! Salloma' ero' ambangung se're balla' attantu untu' Patti Parjanjiang, pattuppuang bangkenNa Karaeng Allata'alata. Le'ba'ma' appare' parsadiaang untu' ambangung se're balla' untu' a'jari tampa' anynyomba mae ri Ia.

2 KORINTUS 6:16

Apa passisambunganna Balla'Na Batara siagang balla'na barhalaya? Ikattemi anne sanrapang Balla'Na Batara, iamintu Allata'ala attallasaka. KalenNa Allata'ala angkana, “LammantangA' ri tangnga-tangngana ke'nanga, na Kusikatallassang siagang ke'nanga. La'jariMa' Allata'ala mae ri ke'nanga, na la'jarimo ke'nanga ummakKu.

YOHANES 14:23

Appialimi Isa Nakana, “Inai-nai angkamaseangA', lanaturuki ajarangKu. Lanikamaseangi ri ManggeKu. LaniakKa' siagang Manggea battu mae ri ia, ammantang anrurungangi.

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.

MATIUS 28:20

Ajaraki ke'nanga anggaukangi sikontu le'baka Kupassuroang ri kau ngaseng. Na u'rangimi angkanaya laniakKa' anrurungangko sa'genna kala'busang jammanga.”

ZAKHARIA 13:2

Ri anjo alloa laKupattaenami areng-arenna barhala-barhalaya battu ri anne buttaya, sa'genna tenamo manna sitau angngu'rangi. Sikontu tau nakanaya kalenna na'bi siagang tau a'balle-ballea nakana kalenna napantamakki roh, laKubongka kabusuki.

YO"EL 3:17

“He Israel, kamma-kamma anne lanuassemmi, angkanaya iNakke Karaeng Allata'alanu. AmmantangA' ri Sion, bulu' matangkasakKu. Na Yerusalem a'jari tongi kota matangkasa', talantamakkami bansa maraenga.

HOSEA 14:8

Lammotereki ke'nanga mae ri Nakke nammamtang lalang ri la'langKu. Lintaki ke'nanga katambang kalumanynyanna, rapang gandung a'bakka' ri koko copponga buttana siagang rapang koko anggoro'. Rapang je'ne' anggoro' Libanon lamasahoroki arenna ke'nanga.

YEHEZKIEL 48:35

Sikontu anjo temboka la'buna 9 kilometere'. Na appakkaramula anjo wattua anjo kotaya naaremmi taua: “BATARA NIAKI ANJORENG!”

YEHEZKIEL 39:7

Mingka ri tangnga-tangngana tu Israel, laKupa'nyatai arengKu matangkasaka, siagang tenamo nalanira'massi arengKu. Jari naassemmi bansa-bansaya angkanaya iNakkemi Batara, iamintu Allata'ala matangkasaka ri Israel.”

YEHEZKIEL 10:1

Nampa accinika' mae ri pattongko' niaka irateanna ulunna anjo sikamma malaeka' akka'nyika, na nia'mo kucini' apa sangkamma empoang kakaraengang nipareka battu ri batu nilang.

YEREMIA 17:12

Balla'Na Batara rapangi empoang karaeng kala'birang, ri moncong tinggia battu riolo.

YEREMIA 16:18

LaKubalasaki dosana siagang kaja'dallanna ke'nanga siagang hukkungang a'lappi rua, lanri narantassimi pa'rasangangKu siagang jai barhala. Anjo barhala-barhalaya tena na'nyawa, sangkammai maya'.”

YEREMIA 14:21

Kiu'rangi janjinTa, teaKi' pakatunai ikambe; teaKi' kaluppai janjinTa siagang ikambe. Yerusalem tampa' empoang kala'biranTa, teaKi' pakatunai.

YEREMIA 3:17

Anjo wattua kota Yerusalem laniarengi ‘Empoang Kala'biranNa Batara’, siagang sikontu bansaya la'rappungi ri anjo kotaya untu' anynyomba ri Nakke. Tenamo nalanaturuki ero' kalenna ke'nanga ja'dalaka siagang kapala batua anjo.

YESAYA 66:1

Nakana Batara, “Langika empoang kala'birangKu, na buttaya pattuppuang bangkengKu. Jari balla' antekammaya ero' nubangungangA' siagang tampa' apaya lanupa'jariangA' pammantangangKu?

YESAYA 6:1

Ri taung kamateanna Karaeng Uzia, kuciniki Batara. Ammempoi rate ri empoang kala'biranNa, irate tampa' tinggia siagang mala'birika. JubaNa natongkoki sikontu Balla'Na Batara ri Yerusalem.

PAMMUJI 132:14

Nakana, “Anrinnimi pammantangangKu sa'genna satunggu-tungguna, erokKa' ammarenta ri anne tampaka.

PAMMUJI 99:5

Pakala'biriki Batara Allata'alata, su'jukki' ri dallekang empoang kala'biranNa, Iami matangkasa'!

PAMMUJI 68:18

Appulo sa'bu kareta kassa' Napake ammumba Allata'ala siagang sanna' mala'biri'Na ri alla'na ke'nanga.

KALAPPASSANG 29:45

LammantangA' ri tangnga-tangngana bansa Israel, siagang iNakke a'jari Allata'alana ke'nanga.

PAMMUJI 46:5

Nia' lo'lorang je'ne' binanga ampakarannui KotaNa Allata'ala, tampa' pammantanganNa Allata'ala Kaminang Tinggia.

YEHEZKIEL 6:5

Lakupatassiaraki maya'-maya'na tu Israel; siagang buku-bukunna ke'nanga laKupabene-benei ri tammulilina anjo tampa'-tampa' pakkoro'bangnganga.

YEHEZKIEL 6:13

Sikamma maya'-maya'na latassiaraki ri alla'-alla'na barhalaya siagang ri tammulilina tampa'-tampa' koro'banga, ta'lapara' ri tunggala' bulu' tinggia, ri coppo'na monconga, irawanganna poko'-poko' kayu copponga leko'na siagang poko'-poko' kayu lompoa; bodona kana, kemae-kemae ke'nanga attunu koro'bang untu' barhalana ke'nanga. Jari tunggala' taua lanaassengi angkanaya iNakkemi Batara.

KALAPPASSANG 25:8

Suroi anjo bansaya appare' se're kema untu' iNakke, sollangKu akkulle ammantang ri tangnga-tangngana ke'nanga.

1 KARAENG-KARAENG 8:13

Kamma-kamma anne kupambangungangKi' balla' gammara', untu' a'jari pammantanganTa satunggu-tungguna.”

2 KARAENG-KARAENG 16:4

Assarei koro'bang Ahas siagang attunui dupa ri tampa'-tampa' panynyombanga mae ri rewataya irate ri moncong-monconga kammayatompa irawanganna poko'-poko' kayu lompoa.

PAMMUJI 68:17

Angngapa nabattu ri anjo coppo' jainu akkimburu anciniki Bulu' Sion Napilea Allata'ala untu' a'jari pammantanganNa? Lammantangi Batara anjoreng sa'genna satunggu-tungguna.

MIKHA 4:7

Nipa'jarimi ke'nanga rapang tau peso' siagang bella battu ri butta passolongang cera'na. Mingka, battu ri anjo sikamma tau tassesaya laKupakaramulai se're turungang beru. La'jari ke'nanga bansa lompo siagang kassa'. INakke lammarenta ri ke'nanga ri Bonto Sion sa'genna satunggu-tungguna.”

ZAKHARIA 13:3

Na punna nia' ija tau nakana kalenna appabattui pasang, kalenna anrong manggena langkana ri ia angkana musti nihukkung matei lanri appauna kana balle-balle. Punna tuli nakana ija kalenna na'bi, lanicokai sa'genna mate ri manggena siagang amma' kalenna.