YEHEZKIEL 39:17 - KITTA' MATANGKASA'

¹⁷ Nakana Batara Kaminang Tinggia ri nakke, “He tau, kioki sikontu jangang-janganga siagang olo'-olo' maraengannaya, sollanna nia' battu ri kere-keremae untu' angkanrei koro'bang Kupasadiakangi ke'nanga. LapparekKa' passua'-suarrang lompo ri daera moncong-monconna Israel; anjorengi ke'nanga akkulle angnganre dageng siagang angnginung cera'.

YEHEZKIEL 39:17 Referans Kwoze

ZEFANYA 1:7

A'reppese'mi allonNa Batara; anjo alloa langngallemi tindakang Allata'ala. Lanri kammana anjo a'mereki mako ri dallekanNa. Sadia-sadiami Batara untu' ambunoi umma'Na rapang koro'bang lanipassareang siagang le'ba'mi Nakio' battu musu-musunna Yehuda. Nakana Batara,

YEHEZKIEL 39:4

Irate ri daera moncong-monconna Israel, lamate Gog siagang sikontu tantarana kammayatompa sikontu naaganga sita'gala'; nampa maya'-maya'na ke'nanga laKupassareangi mae ri jangang-janganga siagang olo'-olo' sekkeka untu' nakanre.

YEREMIA 12:9

Rapangi ke'nanga jangang-jangang nibuccuka ri balangkoa' battu ri kere-keremae. Kioki sikontu olo'-olo' niaka ri romanga untu' amminawang ampaccappuki ke'nanga.

YESAYA 34:6

Lattalaka ceraki pa'danNa Batara siagang larassi jannana ke'nanga, rapang cera'na siagang jannana olo'-olo' nikoro'bangkanga. Saba' appasadiai Batara koro'bang ri Bozra, siagang lajai tau Nabuno ri butta Edom.

YESAYA 56:9

Nasuroi Batara bansa-bansa maraenga battu rapang olo'-olo' sekke' untu' ambakkai nakokko' umma'Na.

YEREMIA 46:10

Mingka inakke, Yeremia kukanamo, iaminne allonNa Karaeng Allata'ala Kaminang Tinggia siagang Kaminang Koasaya; ri anjo alloa Napa'balassi sikontu musu-musunNa. Pa'danNa bassoroki angnganre tau siagang angnginung cera'. Anne alloa Batara Kaminang Koasaya, Nasamballei koro'bang-koro'banga wara', ri anjo birinna Binanga Efrat.

YESAYA 18:6

Lanibokoi sikamma maya'na tantarana, a'jari kanrena jangang-janganga ri wattu timoro', siagang kanrena olo'-olo' sekkeka ri wattu dinginga.”

1 SAMUEL 17:46

Anne memang alloa naNapassareangko Batara mae ri nakke. Lakubetako, siagang lakusamballei kallonnu nampa kualle ulunnu. Kalennu siagang kalenna ngaseng tantara Filistin lakupassareangi ri jangang-janganga siagang olo'-oloka sollanna nakanrei. Nampa sikontu linoa lanaassemmi angkanaya ikambe bansa Israel nia' Allata'alata nisomba.

1 SAMUEL 16:3

Undang tongi Isai mange ri anjo pa'gaukang koro'banga. Sallang laKupauangko apa musti nugaukang. Tau Kujo'jokangako, musti numinynyaki na nuangka' a'jari karaeng.”

PA'JARIANG 31:54

Anynyamballemi sikayu olo'-olo' nampa napassareang a'jari koro'bang irate ri anjo buluka. Nampa naundammo sikamma taunna untu' angnganre assama-sama. Le'baki angnganre, a'bangngimi ke'nanga irate ri anjo buluka.

MATIUS 24:28

Kemae nia' maya', anjoreng tommi nia' jangang-jangang pakanre mayaka.”

YESAYA 34:7

Lamatei taua rapang sapi liara' siagang sapi rungka. Laejai pa'rasanganna ke'nanga napakamma cera' siagang larassi siagang janna.

YEREMIA 25:33

Ri anjo alloa maya' tunibunoa ri Batara latassiaraki ri sikontu tompo'na buttaya. Tena nalanikarruki ke'nanga, tena todong nalaniangka' untu' nitarawang, passangalinna lanibalang parekangi bawang ri buttaya sangkamma pa'gompoang loro.

YEHEZKIEL 39:16

Kammami anjo carana nanitangkasi anjo pa'rasanganga battu ri kara'massanga. (Ri allo ri boko, anjoreng ri ka'bunga lania' kota niarenga sangkamma Pasukang Gog.)”

YESAYA 29:2

Mingka laNapabattui Allata'ala balaya irate ri anjo kotaya, sa'genna ammarrang siagang akkunrareng taua. Kabusu'na kotaya lasangkammai tampa' pakkoro'bangngang attalaka cera'.

YEHEZKIEL 29:5

Nampa ikau siagang sikontu anjo jukuka Kupasambilako mange ri parang kassika. Latattappasaki kalennu naung ri buttaya siagang ammonrang mako anjoreng. Tena manna sitau lantarawangko. Tubunu laKupassareangi mae ri jangang-janganga siagang olo'-olo' maraenga untu' nakanre.