YEHEZKIEL 37:12 - KITTA' MATANGKASA'

¹² Lanri kammana a'boto mako mae ri ummakKu anjo bansa Israel, angkanaya iNakke, Batara Kaminang Tinggia, lassungkei jera'na ke'nanga. LaKupasuluki ke'nanga battu ri anjo jeraka nampa Kupoterang ke'nanga mange ri butta Israel.

YEHEZKIEL 37:12 Referans Kwoze

YESAYA 26:19

UmmatTa mateamo lattallasa' poleangi ammotere', sikamma maya'na ke'nanga lambangungi ammotere'. Tau le'bakamo nitarawang lalang ri buttaya lambangung poleangi siagang akkio' rannu. Rapang saliu' ampakkamalei buttaya, Kipattallasaki ummatTa salloamo le'ba'na mate.

HOSEA 13:14

Anne bansaya tena nalaKupasalamaki battu ri linona tau matea. He kamateanga, pa'la'bammi racunnu! Gaukammi anjo jama-jamannu angngancuruka! Tenamo naKukamaseangi anne bansaya.

1 TESALONIKA 4:16

Punna sallang naung KalenNa Isa battu ri suruga, lakkio' lompoi malaeka' lompoa siagang lanipasa'rai tarompe'Na Allata'ala untu' a'jari pammatei. Nampa nipabangung la'bi riolo tu Karistenga.

YESAYA 66:14

Nucini'na anjo kammaya, larannu mako, siagang a'jari gassing mako nukkamale kamma ruku' lolo. Nalanakasia'mo sikamma atangKu karannuangKu siagang lanakasia'mi kalarroangKu sikamma musu-musungKu.”

PAPPICINI' 20:13

Nampa napassareammo tamparanga sikamma tau matea, niaka lalang ri ia. Kamateanga siagang Linona Kamateanga napassareang ngaseng tommi sikamma tau mate niaka ri ia. Nanihukkung ngaseng tommo anjo tau matea situru' panggaukanna ke'nanga.

HOSEA 6:2

Lalang anne rua yareka tallungalloa laNapa'jari bajikki' ammotere', nakilattallasa'mo ammotere' irawa ri la'lanNa.

YEHEZKIEL 36:24

Battu ri tunggala' bansaya siagang pa'rasanganga, laKupa'rappungko nampa Kupoterangko mange ri butta kalennu.

YEHEZKIEL 37:21

Nampa paui mae ri ke'nanga angkanaya iNakke, Batara Kaminang Tinggia, angngallei sikontu bansaKu battu ri sikamma pa'rasangang napa'lampaia ke'nanga. LaKupasse'rei ke'nanga siagang Kuerangi ammotere' mange ri pa'rasangang kalenna.

YEHEZKIEL 28:25

Nakana Batara Kaminang Tinggia, “LaKupasse'rei tu Israel battu ri sikamma pa'rasangang bella tampa'na ke'nanga Kupasiara', siagang sikontu bansaya lanaassengi angkanaya matangkasakKa'. Bansa Israel lammantangi ammotere' ri butta kalenna ke'nanga, iamintu butta le'baka Kupassareang mae ri atangKu Yakub.

PAOLE 32:39

Ciniki, iNakke Allata'ala Tenaya Ruanna, pantaranganna iNakke tena maraeng. INakke ammuno siagang iNakke appakatallasa', allokoki siagang appamolle. PungKu angngalle tindakang, tena manna sitau akkulle angngewa.

1 SAMUEL 2:6

Batara appamate, Ia todong appatallasa'. Mange ri lino tumatea Napanaung rupataua. Na Ia todong angngangkaki taua battu anjoreng.

YEHEZKIEL 37:4

Nampa Nasuroma' Batara ampabattui pasanNa mae ri anjo buku-buku kalotoroka angkana,

YEHEZKIEL 37:13

Punna le'ba' Kugaukang sikammaya anjo, lanaassemmi ummakKu angkanaya iNakke Batara.

DANIEL 12:2

Jai ri ke'nanga mateamo lattallasa' poleangi; sipa'gang lanakasiaki katallassang mannannunganga na sipa'gang pole lanakasiaki tunaya siagang kapa'risanga sa'genna todong satunggu-tungguna.

ZEFANYA 3:20

Labattui wattunna, pandudu'nu tassiaraka Kururungangi ammotere'. Kupa'jari masahorokko ri sikontu linoa, siagang laKupoterangi kakalumanynyangngannu.” Le'ba'mi akkana Batara.

YESAYA 11:11

Anjo alloa laNapakei pole sikalipa kakoasanNa Batara siagang Naerang umma'Na niaka tassesa battu ri Asyur siagang battu ri Mesir, ri pa'rasangang-pa'rasangang Patros, Sudan siagang Elam, ri Babel, Hamat siagang pulo-pulo bellaya.

YO"EL 3:5

Le'ba'mi nuella' bulaengKu siagang perakKu, siagang barang-barang ka'jalakKu nulalingi mange ri balla' rewatanu.