YEHEZKIEL 36:27 - KITTA' MATANGKASA'

²⁷ LaKupantamaki RohKu antama' ri atinnu, siagang laKujagaiko sollannu attallasaka' situru' hukkung-hukkungKu kammayatompa nugaukang sikamma parentaKu.

YEHEZKIEL 36:27 Referans Kwoze

IBRANI 13:21

Poro Allata'ala, iamintu kabattuanna barakka' kasalewanganga ampassukku' ngasengko siagang sikontu apa-apa baji', nuparalluanga untu' anggaukangi ero'Na. Poro tete ri Isa Almasi, naNagaukang Allata'ala lalang ri kalenta apa Nakaerokia. Poro tuli nipuji-puji Almasi sa'genna satunggu-tungguna! Aming.

1 KORINTUS 3:16

Maka nuassenji angkanaya ikau antu sanrapangko balla'Na Allata'ala? Siagang angkanaya niaki RohNa Allata'ala ammantang lalang ri kalennu?

YEHEZKIEL 39:29

LaKupantamaki RohKu antama ri bansa Israel, siagang tenamo nalanibokoi pole ke'nanga. INakke, Batara Kaminang Tinggia, anne akkana.”

YEREMIA 31:33

Iaminne parjanjiang beru laKupareka siagang umma' Israel: Hukkung-hukkungKu laKuboliki ri ati mailalanna ke'nanga, Kutulisiki ri pa'mai'na ke'nanga. INakke la'jari Allata'alana ke'nanga, siagang ke'nanga la'jari ummakKu.

PANGNGEBARANG 1:23

Pilangngeria' punna kupasaileko, na lakupa'nyata bonena atingku, siagang kuajarrangko pangngassengangku.

1 YOHANES 3:24

Sikontu tau mappilangngeria mae ri sikamma parentaNa Allata'ala, asse'rei mae ri Allata'ala lalang ri katallassanna, siagang asse're tongi Allata'ala mae ri katallassanna. Na niasseng angkanaya asse'rei Allata'ala mae ri katallassanta, lanri le'ba'mi Napassareang RohNa mae ri katte.

YEHEZKIEL 37:14

LaKupatuiki nappasaka antama' ri kalenna ke'nanga untu' ampakatallasaki ke'nanga, nampa Kusare pakkulle ke'nanga ammantang ri pa'rasangang kalenna. Jari naassemmi ke'nanga angkanaya iNakke Batara. INakke Batara anne akkana, siagang mattantu la'rupana kanangKu.”

2 YOHANES 1:6

Battuanna nikanaya mangngamaseang, iamintu nipilangngeri sikamma parentaNa Allata'ala. Na anjo parenta le'bakamo nulangngere' battu ri pakkaramulanna, iamintu angkanaya musti massing sikamaseangko lalang ri katallassannu.

YEHEZKIEL 37:24

Lanipa'jari se'rei ke'nanga irawangang parentana se'rea karaeng sangkammaya Karaeng Daud, ammarentaya satunggu-tungguna. Lamajarreki ke'nanga anturuki hukkung-hukkungKu. Nampa sa'genna satunggu-tungguna ke'nanga siagang jari-jarina ke'nanga lanapammantangngi anjo pa'rasanganga, iamintu pa'rasangang Kupassareanga mae ri Yakub siagang napammantangngia boe-boena ke'nanga.

GALATIA 5:16

Kamma anne natabaya kanangku: Boli'mi kamma naNarurungangko RohNa Allata'ala; siagang teako turukiangi ero'na sipa'-sipa' rupataunu.

ZAKHARIA 12:10

Nampa jari-jarina Daud siagang pandudu'na Yerusalem laKupa'jari tunangai mangngamaseang pa'mai'na siagang nangai appala' doanga. Lanaciniki ke'nanga anjo tau le'baka nacoka ke'nanga, nampa nakarruki rapang tau angkarruki ana' sitau-tauna matea. Langngarruki ke'nanga pacce pa'mai'na, rapang tau ammoteranga ana' bungasa'na.

YESAYA 59:21

LapparekKa' parjanjiang siagang ikau ngaseng: Kusareko koasangKu siagang ajarangKu sa'genna satunggu-tungguna. Pangngajarrangi mae ri ana'-ana'nu sollanna akkulle todong ke'nanga ampangngajarrangi situlusu'na mange ri jari-jarina kamma-kamma anne sa'genna satunggu-tungguna.”

1 PETRUS 1:22

Lanri mappilangngerinnu mae ri pangngajaranNa Allata'ala, parallui nutangkasi kalennu siagang nukamaseang julu tappa'nu situlusu'na pa'mai'nu. Lanri kammana, paralluko massing sikamaseang lalang sikalepu pa'mai'nu,

ROMA 8:9

Mingka ikau ngaseng teako mannuruki ri sipa'-sipa' rupataua lalang tallasa'nu. Punna mattantu RohNa Allata'ala angngatoroki kalennu, mattantu lamannurukiko ri RohNa Allata'ala lalang tallasa'nu. Inai-nai tena ri kalenna RohNa Almasi, anjo taua teai taunNa Almasi.

LUKAS 11:13

Manna pole ja'dala' ngasengko, mingka angngasseng tonjako assare apa-apa baji' mae ri ana'nu. La'biangampa Manggea ri suruga! LaNapassareangi RohNa mae ri tau appalaka ri Ia!”

2 TESALONIKA 2:13

Sikamma sari'battangku nikamaseanga ri Batara! Musti tuli appala' sukkuruki ikambe mae ri Allata'ala passabakkang ikau ngaseng; nasaba' battu ri uru-uruna memang naNapile mako Allata'ala untu' nipasalama'. Anjo, RohNa Allata'ala anggaukangi mae ri kau; sollannu nipa'jari umma'Na Allata'ala matangkasaka; siagang lanri tappa'nu mae ri biritta tojenga battua ri Allata'ala.

KOLOSE 2:6

Nutarimami Isa Almasi a'jari Bataranu. Lanri kammanami anjo paralluko asse're siagang Ia lalang ri katallassannu,

GALATIA 5:5

Mingka untu' ikambe, manrannuang maki' mae ri pannulunNa RohNa Allata'ala; na lanri tappatta mae ri Almasi, Nasare maki' oloang assibajiki ammotere' siagang KalenNa.

YEHEZKIEL 11:20

Jari lamannurukimi ke'nanga ri paratorang-paratorangKu siagang majarreki ke'nanga anggaukangi sikontu parentaKu. Ke'nanga la'jari ummakKu siagang iNakke la'jari Allata'alana ke'nanga.

YEHEZKIEL 43:11

Nampa punna siri'-siri'mo ke'nanga lanri sikamma panggaukanna ke'nanga, pakasingariammi ke'nanga rancanana anne BallakKu, iamintu: modele'na, sikamma pakke'bu' antama'na siagang assulu'na, susunang bangunanna, sikontu paratoranna siagang hukkung-hukkunna. Tulisi' kabusuki anjo untu' ke'nanga sollanna akkulle nacini' ke'nanga siagang naparhatikang carana angngatoroki sikamma yangasenna, kammayatompa naturuki sikontu paratoranna.

PAOLE 30:8

Lamannurukiko mae ri Batara ammotere' siagang lanupajappai sikontu parentaNa kupassareanga mae ri kau anne alloa.

PAMMUJI 105:45

sollanna mannuruki anjo umma'Na ri hukkung-hukkunNa na napinawang parenta-parentaNa. Nipujimi Batara!

YEREMIA 32:40

LapparekKa' parjanjiang mannannungang siagang ke'nanga. Tena Kulammari a'gau' baji' mae ri ke'nanga. LaKupa'jari mallaki ke'nanga siagang mappakalompoi ri Nakke lalang sikontu nyawana sollanna tena nabella ke'nanga ri Nakke.