YEHEZKIEL 36:18 - KITTA' MATANGKASA'

¹⁸ Kupa'betteseki larroKu mae ri ke'nanga lanri jaina pammunoang le'ba' nagaukang ke'nanga ri anjo buttaya, kammayatompa nara'massi siagang barhala-barhalana ke'nanga.

YEHEZKIEL 36:18 Referans Kwoze

YEHEZKIEL 7:8

Tasalloami nanukasia' pangngalarroi lompoKu. LaKuadeliko situru' panggaukannu. LaKubalasaki mae ri kau sikontu panggaukang kodinu.

2 PATTOTTORANG 34:21

“A'lampako mange akkuta'nang ri Batara untu' inakke siagang untu' sikontu tu Israel siagang tu Yehuda niaka ija kamma-kamma anne ri passala'na bonena anne kittaka. Larroi Batara mae ri katte lanri tena nagaukangi boe-boeta sikamma apa niparentakanga lalang ri anne kittaka.”

PIRAUNG 4:11

Napa'betteseki larroNa Batara na Natunu Kota Sion sa'genna sillappara' buttaya.

PIRAUNG 2:4

Rapang musu ampabantangi panaNa Napalio-lio mae ri katte. Sikontu tau ningaia cappu' kabusu' Nabuno. Napasimbungi larroNa rapang pepe' antama' ri kota Yerusalem.

PAPPICINI' 14:10

anjo taua langnginungi anggoro'Na Allata'ala, iamintu anggoro' pangngalarroinNa le'bakamo nipanaung ri pangnginunganna; manna sike'de' tena nalanipakurang anjo anggoro' pangngalarroia! Yangasenna anjo taua lanisessai lalang ri pepeka siagang bara a'rinraya ri dallekanna malaeka'-malaeka' matangkasaka siagang ri dallekanNa anjo Ana' Gimbalaka.

NAHUM 1:6

Inai akkulle attahang punna larro Batara? Inai akkulle ta'lappasa' battu ri pangngalarroinNa? Napa'betteseki larroNa a'rinraya ancuruki batua a'jari limbu'bu' ri dallekanNa.

YEHEZKIEL 23:37

Nagaukangi ke'nanga a'gau' bawanga siagang ammunoa; a'gau' bawangi ke'nanga siagang barhala-barhalaya siagang nabunoi ana'-anakKu nalassukanga ke'nanga. Anjo ana'-anaka le'baki napassareang mae ri barhala-barhalana ke'nanga.

YEHEZKIEL 21:31

LaKupa'betteseki larroKu a'rinra-rinraya mae ri kau. Siagang laKupassareangko mae ri tau sekkeka, siagang le'baka nilati untu' ammanraki.

YEHEZKIEL 14:19

Nakulle kapang appabattuA' garring mae ri anjo pa'rasanganga, siagang Kupa'bettese' larroKu mae ri ia, sa'genna baji' tau kammayatompa olo'-oloka lamate ngasengi.

YEREMIA 44:6

Iaminjo saba'na naKutumpa lussakKu siagang pangngalarroingKu mae ri kota-kota Yehuda siagang agang-aganga ri Yerusalem. Yangasenna Kutunui sa'genna a'jari loro-loro siagang kalotoro' sangkamma akkullea nicini' kamma-kamma anne.

YEREMIA 7:20

INakke, Batara Kaminang Tinggia, lampitujui pangngalarroi lompoKu anne balla' panynyombanga, rupataua siagang olo'-oloka, kammayatompa poko'-poko' kayua siagang wassele' buttaya. La'rinra-rinrai larroKu rapang pepe' tenaya nakkulle nibuno.”

YESAYA 42:25

Jari nikasia'mi pangngalarroi heba'Na, sessa maki' lanri pa'bundukang lompo. PangngalarroinNa rapangi pepe' angkanrei Israel, mingka taniassengai kalenta, siagang tena nippilajara' battu ri apa le'baka nikasia'.

2 PATTOTTORANG 34:26

Mingka ri passala'na Karaeng Yosia, iaminne pasangku, Karaeng Allata'alana Israel: Ri le'ba'namo nulangngere' apa niaka tattulisi' lalang ri anjo kittaka,

2 PATTOTTORANG 34:25

Ma'bokomi ke'nanga ri Nakke siagang assaremi ke'nanga koro'bang mae ri rewata-rewata maraenga. Sikontu anjo apa nagaukanga ke'nanga napanaiki larroKu. LarroA' mae ri Yerusalem, siagang anjo larroKu takkulleai naung.

YEHEZKIEL 22:22

Sangkamma pera' nipassolonga lalang ri pattunuanga, kammatommi anjo batena lanipassolong ke'nanga ri Yerusalem. Jari naassemmi ke'nanga angkanaya iNakke, Batara, ampabattui pangngalarroingKu mae ri ke'nanga.”

YEHEZKIEL 39:23

Siagang sikontu bansaya lasadara' ngasemmi angkanaya tu Israel nikiringi mae ri butta pammelakkanga lanri dorakai ke'nanga mae ri Nakke. Kubokoimi ke'nanga siagang Kubalang parekangi nibeta ri musunna kammayatompa nibuno lalang pa'bundukang.

YEREMIA 16:18

LaKubalasaki dosana siagang kaja'dallanna ke'nanga siagang hukkungang a'lappi rua, lanri narantassimi pa'rasangangKu siagang jai barhala. Anjo barhala-barhalaya tena na'nyawa, sangkammai maya'.”

YEHEZKIEL 33:25

Lanri kammana Nasuroa' Batara Kaminang Tinggia ampabattui anne pasanNa mae ri ke'nanga angkana, “Angnganreko dageng niaka ija cera'na; nusombai barhalaya siagang nugaukangi ammunoa. Barani tojengko angngani anne buttaya angkana ikau pata.