YEHEZKIEL 34:13 - KITTA' MATANGKASA'

¹³ LaKupasuluki ke'nanga battu ri tangngana bansa-bansaya siagang pa'rasangang-pa'rasangang maraeng, nampa Kupa'rappung siagang Kuerang mange ri pa'rasangang kalenna. LaKukalawaki ke'nanga ri sikamma monconga siagang ka'bunga ri Israel, siagang Kururungang mange ri parang ruku' nyamanga.

YEHEZKIEL 34:13 Referans Kwoze

YEHEZKIEL 11:17

INakke, Batara Kaminang Tinggia, ampaui angkana laKupa'rappungi ke'nanga battu ri sikamma pa'rasangang napammantangia ke'nanga tassiara', nampa Kupoterang butta Israel mae ri ke'nanga.

PAMMUJI 106:47

Kipasalamaki ikambe, o Karaeng Allata'alana ikambe, Kipa'rappungi ikambe battu ri alla'na bansa-bansaya, sollanna akkulle ikambe appala' sukkuru' siagang mammuji ri areng matangkasatTa.

YEREMIA 32:37

LaKupasse'rei anne bansaya battu ri sikontu pa'rasangang tampa'na ke'nanga Kupasisa'la'-sa'la' lanri larroKu siagang lussakKu mae ri ke'nanga. LaKuerangi ke'nanga ammotere' mae anrinni siagang Kukellai ammantang anrinni siagang amang.

AMOS 9:14

LaKupa'jari kalumanynyangi ammotere' ummakKu Israel. Lanabangungi ammotere' kota-kotana ke'nanga le'baka runtung, nampa ammantang ke'nanga anjoreng. Lanalamungi koko-koko anggoro'na ke'nanga, siagang nainung je'ne'na. La'lamung-lamungi ke'nanga, nampa nakanre wassele'na.

YEHEZKIEL 36:24

Battu ri tunggala' bansaya siagang pa'rasanganga, laKupa'rappungko nampa Kupoterangko mange ri butta kalennu.

YEREMIA 30:3

Nasaba' lanarapiki sallang wattunna nalaKupa'jari baji' ammotere' katallassanna ummakKu Israel siagang Yehuda. LaKuerangi ammotere' ke'nanga mange ri pa'rasangang le'baka Kupassareang mae ri boe-boena ke'nanga. Anjo pa'rasanganga lanapatangi ammotere' ke'nanga. INakke, Batara, anne akkana.”

YEHEZKIEL 39:27

LaKuerangi ke'nanga ammotere' battu ri sikamma pa'rasanganna musunna ke'nanga, siagang la'nassami katangkassangKu mae ri sikontu bansaya, lanri sikamma anjo panggaukangKu.

YEHEZKIEL 20:41

Punna le'bakko Kuerang assulu' battu ri pa'rasangang-pa'rasangang tampa'nu nipasisa'la'-sa'la', laKupasse'reko nampa Kutarima sikamma koro'bang nitununu. Nampa naassemmo sikontu bansaya angkanaya iNakke anne Allata'ala Kaminang Matangkasaka.

YEREMIA 23:8

passangalinna lanri iNakke, Allata'ala mattallasaka, angngerangai umma' Israel assulu' battu ri se'reang pa'rasangang ri bageang wara', siagang battu ri sikontu pa'rasangang maraeng tampa'na ke'nanga le'ba' Kupasiara'. Lammantangi ke'nanga ri butta passolongang cera'na.”

YEREMIA 31:8

Battu wara' Kuerang ke'nanga ammotere'; Kupasse'rei ke'nanga battu ri cappa'-cappa'na buttaya. Tau butaya siagang tau pesoka lamminawangi ri ke'nanga, kammayatompa baine beru ammanaka siagang tianang salloamo. Labattu ngasengi ke'nanga ammotere' jai sipa'gangngang mae anrinni ri pa'rasanganga.

YEREMIA 30:18

Nakana pole Batara: “Ikau, ummakKu laKukamaseangko siagang laKupakabajiki ammotere' katallassannu ri butta passolongang cera' kalennu. Lanibangungi ammotere' Yerusalem, siagang lanipakabajiki balla' karaenna.

YEHEZKIEL 38:8

Tena siapa taung sallona naKusuro maju ambunduki se'reang pa'rasangang siagang pandudu' le'baka nipa'rappung ammotere' battu ri alla'na bansa-bansaya nampa ammantang ri anjo pa'rasanganga siagang amang. Lanaempoi Gog daera monconna Israel, iamintu salloamo sino siagang a'jari loro, mingka kamma-kamma anne nipammantangngimi ri ra'ya' amanga katallassanna.

PAOLE 30:3

laNakamaseang mako Karaeng Allata'alanu. LaNaerangko ammotere' battu ri bansa-bansa nupammantangngia nipasisa'la'-sa'la', nampa nipa'jari salewangangko ammotere' ri katallassannu.

PAMMUJI 37:3

Tappakko ri Batara, siagang gaukangi bajika, ammantang mako ri anjo pa'rasanganga siagang teako amminrai.

YESAYA 30:25

Ri allo nitammulilina tembo'-tembo' pattahanganna sikamma musunnu siagang nibuno sikamma taunna, sikamma monconga siagang buluka lappasuluki siapa are jaina kaloro'.

YEREMIA 50:19

LaKupoterangi tu Israel mange ri pa'rasanganna ke'nanga. Langnganrei ke'nanga battu ri wassele' buttana Bulu' Karmel siagang daera Basan. Lanipakabassoroki ke'nanga battu ri wassele' buttana daera Efraim siagang Gilead.

YEHEZKIEL 20:42

Punna Kuerangko ammotere' mange ri butta Israel, butta Kupa'janjianga mae ri boe-boenu, nuassemmi angkanaya iNakke Batara.

YEHEZKIEL 36:12

UmmakKu Israel, laKuerangi ammotere' untu' mange ampammantangngi ammotere' pa'rasanganna. Anjo buttaya la'jari napatangi ke'nanga siagang tuli lanagappai ke'nanga wassele'na, sa'genna ana'-ana'na ke'nanga tena nalamate cipuru'.

YEHEZKIEL 36:29

LaKupakabebasakko battu ri sikontu kara'massannu. LaKuparentakangi gandunga sollanna coppong timbona sa'gennu talanatujuamo kacipurang.

YEHEZKIEL 36:30

Lapila' Kupakacoppongi poko' rappo-rappoannu siagang wassele' koko-kokonnu, sa'genna tenamo nalanukasia' jammang kacipuranga, anra'massiai arennu ri tangnga-tangngana bansa-bansaya.

YEHEZKIEL 39:25

Nakana Batara Kaminang Tinggia, “Mingka kamma-kamma anne laKukamaseangi umma' Israel jari-jarina Yakub, siagang Kupa'jari kalumanynyang poleangi ke'nanga. Lanri kammana anjo Kujagaimi arengKu sollanna tuli nipakalompo.

MIKHA 4:6

Nakana Batara, “Lanarapiki sallang wattunna naKupa'rappung tau Kuhukkunga, iamintu ia ke'nanga angkasiakai sessaya ri pammelakkanga.

MIKHA 5:4

siagang lassarei kaamangngang. Punna battu tantara Asyur ambunduki pa'rasanganta siagang nalappo pattahanganta, lanipagio' kabusuki sikamma pamimpinta kassaka untu' ambunduki ke'nanga. Lanibetai tu Asyur ri pamimping-pamimpinta lanri kagassingang sanjata, nanipasalamakki' battu ri limanna ke'nanga.

ZEFANYA 3:13

Tu Israel niaka ammantang tassesa, tenamo nala'gau' ja'dala' pole manna ri nai; tenamo nala'balle-balle ke'nanga siagang tena tommo nalannipu. Lakalumanynyangi na salewangang tallasa'na ke'nanga, siagang tenamo nalamalla' manna pole ri nai.”

YESAYA 49:9

Tau nitarungkua Kusuroi assulu'; tau niaka lalang ri sassanga Kuerangi mae ri singaraka. Ba'lalo manna ri bulu' a'gondoloka tena nalakakurangang ke'nanga, ri sikontu oloanna nia' sadia kanre.

YEREMIA 33:12

Nakana Batara Kaminang Koasaya, “Anne pa'rasangang siagang kota-kotana sangkammaya parang lompo, tena nipammantangngi ri tau yareka olo'-olo'. Mingka manna nakamma, ri bokoangallo lania' ammotere' parang-parang ruku' tampa'na taua akkalawaki gimbala'.

MIKHA 2:12

Nakana pole Batara, “He umma' Israel niaka ija tassesa! Ma'nassa laKupa'rappungko siagang Kupasse'reko rapang gimbala' ammotereka mae ri barana. Rapang parang ruku' rassia siagang gimbala', kamma tomminjo pa'rasangannu larassi siagang tau jai.