YEHEZKIEL 33:27 - KITTA' MATANGKASA'

²⁷ Lanri iNakke, Allata'ala mattallasaka, Batara Kaminang Tinggia, sikamma anjo tau ammantanga anjoreng ri rumbangnganga ri kotaya lamate nibunoi. Ia ke'nanga ammantanga ri paranga lanikanrei ri olo'-olo' sekke'. Ia accokkoa ri bulu'-buluka siagang ri sikamma leanga lamate garringi.

YEHEZKIEL 33:27 Referans Kwoze

YEREMIA 42:22

Lanri kammana anjo u'rangi: ri anjo pa'rasangang eroka nubattui untu' ammantang, lamateko lalang pa'bundukang, yareka lanri kacipurang, yareka lanri garring.”

1 SAMUEL 13:6

Nampa a'bakkamo ke'nanga maju, ambunduki hebaki tu Israel, sa'genna nia'mi lalang bahaya lompo tu Israel. Accokkomi sipa'gang tu Israelka lalang ri kali'bong batua ri monconga yareka ri alla'-alla'na batu karanga, yareka lalang ri bungunga siagang kalo'bang lalanga ri buttaya.

YEHEZKIEL 39:4

Irate ri daera moncong-monconna Israel, lamate Gog siagang sikontu tantarana kammayatompa sikontu naaganga sita'gala'; nampa maya'-maya'na ke'nanga laKupassareangi mae ri jangang-janganga siagang olo'-olo' sekkeka untu' nakanre.

YEHEZKIEL 33:24

“He tau, anjo sikamma tau ammantanga ri rumbanna kota-kotaya ri butta Israel nakanai, ‘Abraham anggappai anne sikontu buttaya, padahala' ia poro kale-kalennaji bawang. Ikatte anne jaiki', jari anne buttaya ikatte pata.’ ”

YEREMIA 44:12

Siagang punna nia' battu ri tu Yehuda ammantanga tassesa, tuli ero'na a'lampa mange ri Mesir untu' ammantang anjoreng, lapanra' kabusuki ke'nanga. Kabusu'na ke'nanga, lompo ca'di, lamatei ri Mesir lalang pa'bundukang yareka lanri kacipurang. Lamallaki taua anciniki ke'nanga, siagang lanihinai ke'nanga ri taua. Arenna ke'nanga lanipakei a'jari pattunra.

YEREMIA 41:9

Anjo bungunga iamintu bungung lompo napare' Karaeng Asa ri wattunna nibunduki ri Baesa karaeng Israel.

YESAYA 2:19

Ri wattu ammentenna Batara siagang Napage'goso' buttaya, lantamaki taua ri sikamma kali'bong batu niaka ri bulu'-bulu' batu karanga, yareka angngekei kali'bong antama' ri buttaya sollanna ta'lappasa' ke'nanga battu ri pangngalarroinNa siagang koasa kala'biranNa Batara. Punna battu anjo alloa, lanibokoi bawammi sikamma barhala-barhala peraka siagang bulaeng napareka nampa nasomba ke'nanga, na'jari balao mami siagang pa'nyikia mami pata.

1 SAMUEL 24:3

Anrapi'mi Saul ri ampi'na siapa area bara gimbala' ri biring aganga. Anjoreng nia' todong se're kali'bong, nampa antama'mo Saul untu' a'jambang. Kabutulang sikali Daud siagang ana' buana niaki accokko lalang anjoreng ri kali'bonga, mingka la'bi bageang lalangngangi pole.

1 SAMUEL 23:14

Le'baki anjo ammantammi Daud ri kali'bong-kalibong niaka ri monconga, ri parang lompona Zif. Tuli niondang mange-mangemi ri Saul, mingka tanipassareangai mae ri anjo karaenga.

1 SAMUEL 22:1

Nampa nabokoi Daud kota Gat na mange accokko ri se'reang kali'bong ri ampi'na kota Adulam. Ri wattunna sikamma daenna siagang kaluargana nalangngereki angkana niaki anjoreng, battumi ke'nanga mae ri ia.

HAKING-HAKING 6:2

Lanri malla' duduna tu Israel mae ri tu Midian, sa'genna mangemi ke'nanga accokko lalang ri kali'bong batu, yareka ri tampa'-tampa' amanga ri moncong-monconga.

YEHEZKIEL 14:21

Nakana Batara Kaminang Tinggia, “LaKupabattui appaka hukkungang kaminang hebaka mae ri Yerusalem untu' angngancuruki baji' narupataua kammayatompa olo'-oloka. Anjo appaka hukkungang iamintu: bundu', kacipurang, olo'-olo' sekke' siagang garring.

ZEFANYA 1:2

Nakana Batara, “LaKuputtai sikontu-kontuna apa niaka ri tompo'na buttaya: