YEHEZKIEL 31:16 - KITTA' MATANGKASA'

¹⁶ Ri wattunna Kupanaung anjo pokoka ri linona tau matea, sa'ra tu'guru'na lanapannekkereki bansa-bansaya. Sikontu poko'-pokoka ri Eden siagang poko'-poko' nipilea ri Libanon, ia anggappaya je'ne' allumpa-lumpa, siagang naungamo ri lino kaminang rawaya lasannangi nyawana lanri tu'guru'na anjo poko' kayua.

YEHEZKIEL 31:16 Referans Kwoze

YESAYA 14:15

Kale'bakkanna nipaloposokko antama' ri bageang kaminang lantanga ri lino tau matea.

YEHEZKIEL 26:15

Nakana Batara Kaminang Tinggia ri kota Tirus, “Pandudu'na daera biring tamparanga lannekkereki napakamma malla' punna nalangngerekko ammarrang lanri nibetanu siagang sa'ra akkio'na tau nibunoa.

YESAYA 14:8

Poko' eru siagang poko' camara Libanon larannumi lanri tu'guru'mi anjo karaeng pallaka, ri wattunna a'lampamo tenamo tau lassuro ta'bangi ke'nanga!

HAGAI 2:7

Sikontu bansaya laKupata'bangkai siagang pa'barang-baranganna ke'nanga lanierangi mae, sa'genna larassi BallakKu battu ri kakalumanynyangnganna ke'nanga.

HABAKUK 2:17

Nuta'bangi poko'-pokoka ri romanna Libanon, siagang kamma-kamma anne ikau kalennu lanita'bang. Nubunoi olo'-olo'na, siagang kamma-kamma anne napa'jari mallakko anjo olo'-oloka. Nakajariang kabusu' anjo kammaya lanri pammunoang siagang kapallakkang le'baka nugaukang mae ri pa'rasangang-pa'rasanganga, kota-kotaya siagang pandudu'na.

YEHEZKIEL 31:9

INakkemi ampa'jari ga'gai siagang tangke-tangke la'bu na coppong. Sikontu poko' kayua ri kokonNa Allata'ala assereati ngaseng mae ri ia.

YEHEZKIEL 27:28

Sikamma pakappala'nu ammarrangi napakamma malla' nilangngereki accalli' ke'nanga ri biring-biring tamparanga.

PAPPICINI' 11:13

Na anjo wattua ta'ge'goso' sanna'mi buttaya. Ancuru'mi bage sampulona anjo kotaya, siagang nia'mo tuju sa'bu jaina tau mate napakamma anjo ta'ge'goso'na buttaya. A'jari malla' sikali ngasemmi tau maraenganga, nampa mammuji ke'nanga mae ri kalompoanNa Allata'ala ri suruga.

NAHUM 2:3

Pannangkisi'na musua ejai tanja'na, nampa pakeanna kontui cera'. Sadiami musua untu' a'bakka. Rapang pepe', accillaki bassi karetana. Sikontu jaranna a'lumpa'-lumpaki.

YEHEZKIEL 31:18

Anjo poko' kayua a'jari pangngebarangi mae ri karaeng Mesir siagang bansana. Tena poko' kayu ri Eden kammaya anjo tinggina siagang la'biri'na. Mingka kamma-kamma anne, sangkamma todong poko'-poko' kayu ri Eden anjo poko' kayua lanaung tongi ri linona tau matea nampa asse're siagang ke'nanga tenaya natappa' ri Allata'ala, siagang sikamma tau matea lalang pa'bundukang. INakke, Batara Kaminang Tinggia, anne akkana.”

YEHEZKIEL 31:14

Kabusu'na anjo sikammaya kajariangi sollanna appakkaramula anne wattua, tenamo pole poko' kayu lattimbo kamma anjo tinggina; tenamo coppo' poko' kayu lanrapi' nai' ri rammanga manna pole nanggappa je'ne' allumpa-lumpa. Kabusu'na musti matei sangkamma rupatau biasaya, nampa asse're siagang sikamma tau naungamo ri linona tau matea.”

YEHEZKIEL 26:10

Tamaka jaina jaranna ke'nanga, sa'genna bate bangkenna appa'niaki limbu'bu' anri'ba' angkalimbukiko. Sa'ra galutturu'na pasukang a'jaranga, iamintu a'besoka bokong siagang kareta pa'bundukang, lanapa'galatturuki tembo'-tembo'nu ri wattunna naolo ke'nanga sikamma pakke'bu' lompoa nantama' ri anjo kota runtungamo.

YEHEZKIEL 14:22

Ebara' angkana nia' ta'lappasa' siagang napasalamaki ana'-ana'na, parhatikangi ke'nanga punna battui ke'nanga mae ri kau. Ciniki antekamma ja'dala'na ke'nanga, nanuassemmo angkanaya coco' sikali tindakangKu anghukkungi Yerusalem.

YEREMIA 50:46

Punna tu'guru' Babel, nia' lakalangngerang sa'ra sannaka gegere'na, sa'genna ta'goccang sikontu linoa; sikamma sa'ra ammarranna panduduka lakalangngerangi mae ri bansa-bansa maraenga.”

YEHEZKIEL 14:23

Nampa nupahang tommo angkanaya anjo sikontu tindakangKu nia' alasanna. INakke Batara Kaminang Tinggia anne akkana.”

YEHEZKIEL 31:3

Ikau rapangko poko' camara Libanon gammaraka rassi tangke coppong leko'na na ga'ga. Poko'na lambusuki na lompo coppo'na narapiki rammanga.

YEHEZKIEL 31:8

Poko'-poko' camara ri Eden, kokonNa Allata'ala takkulleai nipasangkamma siagang ia. Tena camara akkulle ambetai, tena poko' kayu la'bu kamma tangkenna. Tojeng, ri kokonNa Allata'ala tena poko' kayu sangkamma ia ga'gana.