YEHEZKIEL 28:16 - KITTA' MATANGKASA'

¹⁶ Tenamo sawenu napakamma a'balu-balu', siagang iaminjo angngerangko mange ri katerassanga siagang dosaya. Jari kubongka mako battu ri bulu' matangkasakKu, siagang malaeka' pajaganu angngembako battu ri tangnga-tangngana anjo paramata accillaka.

YEHEZKIEL 28:16 Referans Kwoze

HABAKUK 2:17

Nuta'bangi poko'-pokoka ri romanna Libanon, siagang kamma-kamma anne ikau kalennu lanita'bang. Nubunoi olo'-olo'na, siagang kamma-kamma anne napa'jari mallakko anjo olo'-oloka. Nakajariang kabusu' anjo kammaya lanri pammunoang siagang kapallakkang le'baka nugaukang mae ri pa'rasangang-pa'rasanganga, kota-kotaya siagang pandudu'na.

HABAKUK 2:8

Le'ba'mi nuella' jai bansa, mingka bansa-bansa akkullea ta'lappasa' langngellakko, lanri pammunoang le'baka nugaukang, siagang lanri kapallakkang le'baka nugaukang mae ri pa'rasangang-pa'rasanganga, kota-kotaya siagang pandudu'na.

YOHANES 2:16

Nampa Nakana ri anjo pabalu' jangang-jangang bodobangkenga, “Angka' ngasengi a'lampa anne. Teako pareki tampa' pa'danggangang Balla'Na BapakKu!”

YEHEZKIEL 8:17

Nakana Batara ri nakke, “He tau, nuciniki anjo mae? Anne tu Yehuda tenapa nasangga nasa'ring punna iaja anjo bawang apa appakaringi'-ringika nagaukang siagang panggaukang-panggaukang tenaya pangngamaseanna ri sikontu pa'rasanganga. Ba'lalo nagaukang tongi ke'nanga anrinni, lalang ri BallakKu siagang pila' natambai pole larroKu. Ciniki antekamma batena ke'nanga anghinA', ta'liwaka kodina.

PA'JARIANG 3:24

Nampa irayanganna anjo kokoa, ri dallekanna pakke'bu antamaya, nia'mo sipa'rappungang malaeka' pajaga, siagang nia'mo se're pa'dang a'rinraya pepe'na, amminroa ri kere-keremae, anjagai agang mangea ri anjo poko' assarea katallassang. Jari tenamo manna sitau akkulle antama' siagang a'reppese' anjoreng ri anjo pokoka.

PAPPICINI' 12:9

Nipela'mi anjo naga lompoa assulukang! Iami anjo ulara' toaya niarenga Billisi' yareka Roh Ja'dalaka, antipuai sikontu linoa. Nipela'mi naung ri linoa siagang sikontu malaeka'na.

ZEFANYA 1:9

LaKuhukkungi sikontu tau anggaukangai ibadaya sangkamma tau tenaya natappa' mae ri Nakke, siagang tau a'lukkaka kammayatompa tau ammunoa untu' ampirassi balla'na pinggawana ke'nanga siagang barang-barang nirampasa'.”

MIKHA 6:12

Tu kalumanynyanga ri kotanu najallakkangi tu kasi-asia, siagang ikau paballe-balle ngasengko.

MIKHA 2:10

Ambangung mako siagang a'lampamako, anrinni tenamo naamang. Dosa-dosana appabattui bala appakamalla'-malla' mae ri anne tampaka.

MIKHA 2:2

Punna ero' ke'nanga ri se'reang koko, narampasaki ke'nanga. Punna eroki ke'nanga ri se'reang balla' naalle passai. Baji' barang-baranga kammayatompa kaluargaya tena nia' amang.

AMOS 3:9

Pa'la'bangi pabattu mae ri tau ammantanga ri balla' karaenga ri Mesir siagang Asdod angkana, “A'rappung ngasengko ri moncong-moncong tammulilina Samaria, siagang parhatikangi karicuang lompoa kammayatompa pammaccokang nigaukanga anjoreng.”

HOSEA 12:7

Lanri kammana anjo, he ikau ngaseng jari-jarina Yakub, tappa' lalo mako mae ri Allata'alanu siagang ammotere' mako mae ri Ia. Attallasa' mako lalang pangngamaseang siagang kalambusang, siagang attayang mako siagang sa'bara' sa'genna angngalle tindakang Allata'alanu.

YEHEZKIEL 28:14

Malaeka' appakamallaka laKuboliki anjoreng untu' anjagaiko. Ammantangko irate ri bulu' matangkasakKu siagang a'jappako ri tangnga-tangngana batu paramata accilla'-cillaka.

YESAYA 23:9

Batara Kaminang Makoasaya, Iami angngalle kaputusang kamma anjo. Ia antappuki untu' ampa'le'baki kaborroanna pandudu'na mae ri sikamma wassele' le'baka nagappa ke'nanga, siagang napakatuna sikamma tau kaminang malompoa ri lino.

YESAYA 22:19

Lanri kammana laKupasulukko battu ri jabatannu siagang laKupanaungko battu ri pangka' tingginu.

PA'JARIANG 6:11

Mingka sikontu tau maraengannaya ja'dala' ngasengi ri paccini'Na Allata'ala. Jai sikali panggaukang palla' kajariang ri kere-keremae.

OBAJA 1:3

Nitipuko ri atinnu tampoa. Ibukotanu iamintu moncong batu makassa'; tampa' pammantangannu iratei ri coppo'na moncong tinggia. Lanri kammana anjo nakanamo pikkirannu, ‘Inai todong lakkulle antu'gurangki'?’