YEHEZKIEL 24:24 - KITTA' MATANGKASA'

²⁴ Jari inakke, Yehezkiel, la'jari conto mae ri kau: lanugaukangi sangkamma apa kugaukanga kamma-kamma anne. Nakana Batara, angkanaya punna kajariang anjo passalaka, lanuassemmi angkanaya Iami Batara Kaminang Tinggia.”

YEHEZKIEL 24:24 Referans Kwoze

YEHEZKIEL 4:3

Angngalleko panci bassi siagang rapammi anjo rinring bassi; padongkoki anjo pancia ri alla'nu siagang kota Yerusalem. Nampa a'dalle' mangeko ri anjo kotaya, sanrapang angkana ikau angkurungi. Iaminjo la'jari pangngebarang mange ri bansa Israel.

YEHEZKIEL 12:11

Pakasingaraki mae ri ke'nanga angkanaya anjo apa nugaukanga a'jari pangngebarangi mae ri apa lakajarianga mae ri ke'nanga, iamintu: la'jari ke'nanga tau nipela' siagang tau nitahang.

YEHEZKIEL 6:7

Kemae-kemae nia' tau nibuno, na sikamma tau salamaka lanaassemmi angkanaya iNakke Batara.

YESAYA 20:3

Ri wattunna nitammulilimo kota Asdod ri musu, Nakanamo Batara, “Tallung taummi atangKu Yesaya assolara' siagang tammakea pa'lapa' bangkeng. Iaminne a'jari pammatei ri apa lakajarianga mae ri tu Mesir siagang tu Sudan.

YOHANES 16:4

Mingka kamma-kamma anne Kupaumi anjo passalaka mae ri kau, sollanna punna kajariammo sallang, akkullei nuu'rangi angkanaya le'ba' memang mako Kupauang.” “Tena naKupauang memangko anne passalaka battu ri uru-uruna, nasaba' nia' ijA' anrurungangko.

YOHANES 14:29

Kupau memammi kamma-kamma anne ri kau ngaseng, lalang ri tenanapa nakajariang. Sollanna punna kajariammo sallang, la'jari tappa' ngaseng mako.

YOHANES 13:19

Kupabattumi anne passalaka ri kau ngaseng, ilalang tenanapa nakajariang. Sollanna punna kajariammo sallang, latappa' ngaseng mako angkanaya iNakke minne nikanaya INAKKE NIA'.

LUKAS 21:13

Mingka iaminjo la'jari kasampatang ri kau ambirittakangi Kabara' Bajika, battua ri Allata'ala.

YEHEZKIEL 25:17

LaKuhukkung lompoi ke'nanga siagang laKupa'betteseki larro boli'-bolikKu sa'genna sangga pakkasiakKu. Punna napisa'ringi ke'nanga pangngalarroingKu, naassemmi ke'nanga angkanaya iNakkemi Batara.”

YEHEZKIEL 25:14

BansaKu Israel laKupakei untu' ampa'balassi Edom; siagang Edom lanihukkungi situru' kahebakkanna pangngalarroingKu. Lanaassengi Edom angkanaya antekamma kasia'na nitujua ri pangngalarroingKu. INakke, Batara, anne akkana.”

YEHEZKIEL 25:11

LaKuhukkungi Moab, nampa naassemmo angkanaya iNakkemi Batara.”

YEHEZKIEL 25:7

Lanri kammana anjo laKupassareangko mae ri jaia bansa, ia langngellaki siagang anrampasaki apa-apannu. LaKupanrakiko, sa'gennu takkulleamo a'jari se're bansa, siagang tena tommo pa'rasangang kalennu. Nampa nuassemmo angkanaya iNakkemi Batara.”

YEHEZKIEL 25:5

Kota Raba la'jari tampa' pakkalawakiang unta, siagang sikontu pa'rasangang Amon la'jari tampa' pakkalawakiang gimbala'. Jari nuassemmi angkanaya iNakkemi Batara.’ ”

YEHEZKIEL 17:24

Sikontu poko' niaka ri pa'rasangang lanapahangi angkanaya iNakke Batara. Poko' tinggia Kuta'bangi; poko' tenaya natinggi Kupattimboi a'jari tinggi nai'. Poko' copponga Kupa'jari kalotoro'; na poko' kalotoroka Kupaccu'laki siagang a'bakka'. INakke, Batara, anne akkana; na sikontu kanangKu la'rupa kabusuki.”

YEHEZKIEL 7:27

Lappiraungi karaenga, tappu' panrannuangi ana' bura'nena karaenga siagang lannekkereki napakamma malla' ra'yaka. LaKuhukkungko situru' sikontu panggaukannu, kammayatompa Kuadeliko sangkamma batenu angngadeli parannu tau. Jari lanuassemmi angkanaya iNakke Batara.”

YEHEZKIEL 7:9

Tena nalaKukamaseangko yareka tena nalaKupammopporangko. LaKuhukkungko situru' sikontu panggaukang kodi le'baka nugaukang. Jari nuassemmi angkanaya iNakke Batara siagang iNakke anghukkungko.”

YEREMIA 17:15

Nakana taua ri nakke, “Kemae ngasenji anjo pa'garatta'Na Batara? Lappassammi Nagaukang kamma-kamma anne!”

YESAYA 8:18

Annemi inakke siagang ana'-ana' Napassareanga Batara mae ri nakke. Batara Kaminang Makoasaya ammarenta ri Bulu' Sion, ansuroi ikambe battu a'jari pammatei mae ri umma' Israel.

YEHEZKIEL 20:44

Punna le'ba' mako Kupakamma anjo lanri kalompoanNa arengKu, na tena nasimbattala' panggaukang kodinu kammayatompa panggaukang ja'dala'nu, nuassemmi ikau tu Israel angkanaya iNakke Batara. INakke Batara Kaminang Tinggia anne akkana.”