YEHEZKIEL 23:37 - KITTA' MATANGKASA'

³⁷ Nagaukangi ke'nanga a'gau' bawanga siagang ammunoa; a'gau' bawangi ke'nanga siagang barhala-barhalaya siagang nabunoi ana'-anakKu nalassukanga ke'nanga. Anjo ana'-anaka le'baki napassareang mae ri barhala-barhalana ke'nanga.

YEHEZKIEL 23:37 Referans Kwoze

YEHEZKIEL 20:26

Kulappassangi ke'nanga anra'massi kalenna siagang koro'bang-koro'banna ke'nanga, ba'lalo ana' bungasa' bura'nena ke'nanga nakoro'bangkangi. Kammami anjo carana ke'nanga Kuhukkung sollanna naasseng ke'nanga angkanaya iNakkemi Batara.

YEHEZKIEL 16:38

LaKuhukkungko lanri passundallang siagang pammunoang le'baka nugaukang. Lalang nassuKu siagang larroKu laKuhukkung mateko.

YEREMIA 32:35

Ambangungi ke'nanga tampa'-tampa' pakkoro'bangngang untu' Rewata Baal ri Ka'bung Lappara' Hinom, nampa napassareang ana'-ana'na ke'nanga a'jari koro'bang mae ri Rewata Molokh. Padahala', tale'bakai Kusuro ke'nanga anggaukangi anjo kammaya, ba'lalo tale'bakai ammumba lalang ri pikkirangKu angkanaya lanagaukangi ke'nanga anjo panggaukang appakaringi'-ringi' kammaya siagang napa'jari dorakai tu Yehuda.”

YEREMIA 7:31

Se're tampa' pakkoro'bangngang niarenga Tofet le'ba'mi nabangung ke'nanga ri Ka'bung Lappara' Hinom untu' napake ampassareangi ana'-ana'na ke'nanga a'jari koro'bang nitunu. Padahala' iNakke tena le'bakai Kusuro anggaukangi anjo kammaya, ba'lalo tena le'bakai ammumba anjo pikkirang kammaya lalang ri pikkirangKu.

LUKAS 13:34

O, tuniaka ri Yerusalem, tuniaka ri Yerusalem! Nubunomi na'bi-na'bia! Nusambilami batu sa'genna mate sikamma tu Nasuroa Allata'ala! Pissiapa are mako ero' Kukalimbuki, sanrapang anrong janganga angkalimbuki ana'-ana'na irawanganna ka'nyi'na, mingka taeroka ngasengko!

MIKHA 3:10

Nubangungi Yerusalem, kotaNa Allata'ala, lalang pammunoang siagang tenaya naadele'.

HOSEA 4:2

Assumpai ke'nanga mingka tena narupai; paballe-ballei ke'nanga, ammunoi, a'lukkaki siagang a'gau' bawangi. Katambangi ka'ja'dallanga, siagang sitampe-tampei kajariang pammunoanga.

HOSEA 3:1

Nakana Batara ri nakke, “A'lampako pole siagang angngaiko pole sitau baine nangaia a'gau' bawang. Mangngaiko ri ia sangkamma iNakke mangngaiA' ri tu Israel manna pole nabokoiA' ke'nanga nanynyomba ri barhala-barhala maraenga siagang nangai assare kanrejawa kismis mae ri barhalaya.”

HOSEA 1:2

Ri wattunna uru a'bicara Batara mae ri bansa Israel tete ri nakke, Nakana Batara, “Hosea, a'buntingko siagang sitau baine nangaia assundala' nampa ana'-ana'nu la'jari sangkamma tongi anjo bainennu. UmmakKu sangkammai anjo bainennu; tena namajarre' pa'mai'na ke'nanga mae ri Nakke, siagang nabokoiA'.”

YEHEZKIEL 23:45

Mingka sikamma tau bajika lanaadeli anjo tau ruaya assari'battang, passabakkang a'gau' bawang siagang pammunoang, lanri sala memang tongi ke'nanga.”

YEHEZKIEL 23:39

Ri allo nabunona ana'-anakKu siagang napassareanna mae ri barhala-barhalaya, anjo tau ruaya massari'battang battui mange ri BallakKu nampa nara'massi!

YEHEZKIEL 20:31

Ba'lalo sa'genna anne alloa nura'massi kalennu lanri angngerannu passare siagang nutunui ana'-ana'nu salaku koro'bang mae ri barhala-barhalaya. Nampa barani ijako appala' pangngunju' battu ri Nakke? Lanri iNakke, Allata'ala mattallasaka, Batara Kaminang Tinggia, tena nalaKupa'biangko appala' pangngunju' battu ri Nakke.

YEHEZKIEL 16:45

Memang, ikaumi ana' bainena amma'nu. Tena nangai bura'nenna siagang ana'-ana' kalenna. Ikau sangkammako sikamma sari'battang bainenu tenaya todong nangai bura'nenna siagang ana'-ana'na. Ikau siagang sari'battannu, iamintu kota-kota niaka ri tammulilinu amma'nu tu Het siagang manggenu tu Amori.

YEHEZKIEL 16:32

Ikau sangkammako baine ampa'gau' salangi tu bura'nenu nu'gau' bawang siagang bura'ne maraeng.

YEREMIA 7:9

A'lukkakko, ammunoko, a'gau' bawangko, sa'bi balle-balleko, assareko koro'bang mae ri Rewata Baal, siagang anynyombako mae ri rewata-rewata tenaya nanuassengi.

YEREMIA 7:6

Tea' mako manjallakkangngi pole mae ri bansa maraenga, ana'-ana' kukanga, siagang janda-jandaya. Teako ammunoi tau tena salana ri anne pa'rasanganga. Teako anynyombai ri rewata-rewata maraenga, nasaba' anjo kammaya langngerangi kapanrakang mae ri kau.

YESAYA 1:15

Punna nupatara limannu appala' doang, tena Kuero' amparhatikangi. TaKujampangiai angkana siapa jaina pappala' doannu, taerokA' ampilangngeri, nasaba' iaminjo limannu jai sikali tau nabuno.

2 KARAENG-KARAENG 24:4

la'biangampa lanri sikontu pammunoang nagaukanga mae ri sikamma tau tenaya nasala. Tena Naero' Batara ampamopporangi Manasye lanri anjo panggaukang-panggaukang kammana.

2 KARAENG-KARAENG 21:6

Ana' kalenna napassareang a'jari koro'bang nitunu. Nagaukang tongi Manasye gau'-gau' sanroa, a'jari paciniki, ammakei pangngissengang, siagang appalaki pangngunju' mae ri roh-roh tanicinika. Sanna' dorakana mae ri Batara sa'genna napanai'mo larroNa Batara.

2 KARAENG-KARAENG 17:17

Napassareangi ana'na ke'nanga a'jari koro'bang nitunu mae ri rewataya. Ammakei ke'nanga pangngissengang siagang appalaki pangngunju' battu ri sanro-sanroa ia akkullea sipa'bicara siagang roh-roh tenaya naniciniki. Teai sipato' batena anggaukang ngasengi anjo apa-apa tenaya Nangai Batara,

PAOLE 12:31

Tea' laloko palembai carana anjo bansa-bansaya anynyomba ri rewata-rewatana ke'nanga untu' anynyomba ri Karaeng Allata'alanu, nasaba' anjo ke'nanga punna anynyombai nagaukangi apa-apa pallaka siagang Nakabirisia Batara. Ba'lalo manna ana'na ke'nanga natunui ke'nanga irate ri tampa' pakkoro'bangnganga salaku koro'bang untu' rewata-rewatana ke'nanga.

KAIMANGNGANG 18:21

Teako passareangngi kalase'renna ana'nu untu' nikoro'bangkang lalang ri panynyombanga mae ri Rewata Molokh, lanri anjo panggaukang kammaya nahinai arenNa Allata'ala, Bataranu.

2 KARAENG-KARAENG 23:10

Tofet, iamintu tampa' panynyombanga mae ri rewataya ri Ka'bung Lappara' Hinom, napanraki tongi. Lanri kammana anjo tenamo tau akkulle ampassareangi ana'na untu' a'jari koro'bang mae ri Rewata Molokh.