YEHEZKIEL 20:40 - KITTA' MATANGKASA'

⁴⁰ Nasaba' ri butta Israel, ri coppo' bulukKu matangkasaka, ikau ngaseng, bansa Israel lanynyombako mae ri Nakke. Anjoreng lasannangi nyawaKu mae ri kau siagang erokKa' antarimai koro'bang-koro'bannu, passare-passarenu kaminang bajika siagang passare-passare nusa'laka.

YEHEZKIEL 20:40 Referans Kwoze

YESAYA 56:7

“LaKuerangko mange ri Sion, mange ri bulu' matangkasakKu, na Kusareko karannuang ri balla' sambayangKu. LaKutarimai sikamma koro'bang nupassareanga ri tampa' pakkoro'bangngangKu. BallakKu laniarengi balla' pappala' doangang untu' sikontu bansaya.”

MALEAKHI 3:4

Na sangkamma riolo lamangngellaimi Batara mae ri koro'bang-koro'bang nipassareanga mae ri Ia ri umma' Yehuda siagang Yerusalem.

YESAYA 60:7

Bembe siagang gimbala' battua ri Kedar nierangi mae ri kau sadiai gimbala' laki battua ri Nebayot untu' ibadanu. Anjo koro'banga napakasannangi atinNa Batara napaccayai Balla'Na rassia kala'birang.

1 PETRUS 2:5

Ikau sanrapang ngasengko batu-batu mattallasaka. Lanri kammana paralluko ampassareangi kalennu untu' nipake ambangung Balla' rohaniNa Allata'ala. Lalang kammana anjo a'jari mako imang-imang mae ri Allata'ala lalang ri katallassannu; siagang tete ri Isa Almasi angngerang mako koro'bang rohani mae ri Allata'ala, iamintu koro'bang nitarima bajika ri atinNa Allata'ala.

IBRANI 13:15

Lanri kammana, tete ri Isa, paralluki' tuli mammuji-muji ri Allata'ala; iaminjo a'jari koro'bang sukkurutta mae ri Ia, nipassareanga lalang kana-kana nipaua untu' ampakala'biriki arenNa.

YEHEZKIEL 43:27

Punna le'ba' anjo tuju alloa, sikamma imanga musti appakkaramulai assare irate ri anjo tampa' pakkoro'bangnganga iamintu koro'bang nitunu siagang koro'bang pappasiamakkang untu' ummaka. Jari lasannangi nyawaku mae ri kau ngaseng. INakke, Batara Kaminang Tinggia, anne akkana.”

YEHEZKIEL 17:23

Ri moncong kaminang tinggi ri Israel Kupatinting. Anjorengi laccu'la' siagang a'rappo nampa a'jari poko' camara sannaka porena. Sangka' rupa jangang-jangang la'ru'mung anjoreng siagang a'la'lang irawanganna.

YESAYA 66:23

Tunggala' Bulang Beru siagang allo Pammari-marianga labattui sikontu umma' rupataua untu' anynyomba ri Nakke ri Yerusalem.

PAPPICINI' 21:10

Nikoasaima' ri RohNa Allata'ala, siagang naeramma' anjo malaekaka nai' ri tompo'na moncong sannaka tinggina. Napicinikiamma' kota Yerusalem, anjo kota matangkasaka. Anjo kotaya turungi battu ri Allata'ala, battu ri suruga,

PAPPICINI' 12:1

Nampa nia' nicini' ri langika apa-apa sannaka appakalannasa'na. Nia' sitau baine ammakeang mataallo ammenteng irate ri bulanga. Ri ulunna nia' songko' niaka bintoenna sampulo anrua.

MALEAKHI 1:11

NipakalompoA' ri sikamma bansa-bansaya ri sikontu linoa. Kere-keremae nitunui dupaya untu' ampakalompoi arengKu siagang nipassareangi sikamma koro'bang siratanga, ba'lalo sikontu bansaya napakalompoA'.

OBAJA 1:16

Irate ri bulu' matangkasakKu le'ba'mi nainung ummakKu inungang pangngebarranna hukkunganna. Mingka inungang mae ri bansa-bansaya ri buttaya anne la'bi paikangngangi pole. Takkulleai naliliang ke'nanga anjo hukkunganga. Musti nainungi ke'nanga sa'genna la'busu', nampa lalanynya' ke'nanga tena bate-batena.”

YEREMIA 31:12

Labattui ke'nanga mange ri Bulu' Sion accaya nicini' rupanna, akkelong a'rannu-rannu lanri sikontu passareKu mae ri ke'nanga, iamintu gandung, minynya', anggoro', sapi siagang gimbala'. Rapang ke'nanga koko ga'ga gannaka ri je'ne, siagang tena kakurangang apa-apa.

YESAYA 66:20

Battu ri anjo sikammaya pa'rasangang, lanaerangi ammotere' ke'nanga sikamma sari'battang julu bansanu, a'jari hadia mae ri Nakke. Lanaerangi ke'nanga sikamma anjo taua mange ri bulu' matangkasakKu ri Yerusalem, a'dongko' jarang, keledai, unta, kareta siagang bendi, kamma biasaya nagaukang tu Israel punna a'lampa ke'nanga mange ri Balla'Na Batara ri Yerusalem untu' assare passare gandung lalang pammoneang tangkasa'.

PAMMUJI 2:6

Nakana, “Ri Sion bulu' matangkasakKu le'ba' Kulanti' karaeng nipileKu.”

ROMA 8:23

Ba'lalo teai linoa bawang akkunrareng; passangalinna manna ikatte akkunrareng tongi lalang atinta. Le'ba'mi nitarima RohNa Allata'ala. Iaminjo passare uru-uruNa Allata'ala. Mingka attayangijaki', sollanna nilappassang todong sikontu batangkalenta ri Allata'ala siagang Napa'jariki' ana'-ana'Na.

2 SAMUEL 24:23

Napassareang kabusuki anjo sikammaya mae ri karaenga siagang nakana, “Dasi-dasi naNatarima Karaeng Allata'ala passareta karaeng.”

YEHEZKIEL 17:22

Iaminne kananNa Batara Kaminang Tinggia, “Battu ri poko' camara tinggia, laKukattiliki pucu'na nampa Kutepo' sipappa' tangke lolona; Kulamungi anjo tangkea ri moncong tinggia nai' ri rammang.

YEHEZKIEL 28:14

Malaeka' appakamallaka laKuboliki anjoreng untu' anjagaiko. Ammantangko irate ri bulu' matangkasakKu siagang a'jappako ri tangnga-tangngana batu paramata accilla'-cillaka.

YEHEZKIEL 40:2

Lalang se're paccini', Naeranga' kucini' Allata'ala mange ri butta Israel nampa nabolikka' ri moncong tinggia. Ri dallekangku nia' kucini' sipa'gompoang bangunang santanjaka se're kota.

YEHEZKIEL 43:12

Iaminne sipa' kalenna Balla'Na Batara: Sikontu tampaka ri tammulilina ri coppo'na buluka sanna' matangkasa'na.”

ZEFANYA 3:11

Anjo wattua, he ummakKu, tenamo nuparallu pole siri'-siri' lanri le'ba'nu angngewa mae ri Nakke. LaKubongkai sikamma tau tampoa siagang borroa, siagang tenamo nulangngewa mae ri Nakke irate ti bulu' matangkasakKu.