ROMA 5:21 - KITTA' MATANGKASA'

²¹ Jari sangkamma angkanaya musti mateki' passabakkang nigaukanna dosaya, sangkamma tomminjo Nasare maki' oloang Allata'ala sollanta assibajiki ammotere' siagang Ia, lanri mangngamaseanNa mae ri katte. Na lanri baji'mi ammotere' passisambunganta siagang Allata'ala, laNasare tommaki' katallassang mannannungang tete ri Isa Almasi, Batarata.

ROMA 5:21 Referans Kwoze

TITUS 2:11

Nasaba' Napappicinikammi lammoro' pangngamaseanNa Allata'ala, sollanna Napasalama' sikontu rupataua.

ROMA 5:14

Mingka battu ri wattu jammanna Adam sa'genna jammanna Musa, nikoasai sikontu rupataua ri kamateanga. Ba'lalo, manna tau tenaya nasangkamma panggaukanna Abraham anggaukangi kasalanga, amminawang tommi nikoasai ri kamateanga. Adam a'jari pammatei mae ri Ia labattua sallang ri lino.

ROMA 8:10

Mingka punna nia'mo Almasi lalang ri kalennu, manna pole lamate tubunu passabakkang dosa, mingka lanri baji'na passisambungannu siagang Allata'ala, lanisareko ammotere' katallassang ri RohNa Allata'ala.

ROMA 6:23

Nasaba' pahalana dosaya iamintu kamateanga; mingka pangngamaseang Napassareang bawang-bawanga Allata'ala, iamintu katallassang sitojennaya siagang katallassang satunggu-tunggua lalang ri Isa Almasi, Batarata.

ROMA 6:14

Takkullea mako nikoasai ri dosaya, nasaba' tenamo nurawanganna hukkung-hukkung agama Yahudia attallasa', passangalinna irawanganna mako pangngamaseanNa Allata'ala.

ROMA 5:12

Lanri se're tau nantama'mo dosaya ri lino, siagang battu ri iaminjo dosaya ammumba kamateanga. Iaminjo na'la'bammo kamateanga mae ri sikontu rupataua, nasaba' doraka ngasemmi rupataua.

ROMA 5:17

Passabakkang se're tau doraka, na'la'bammo kamateanga tete ri anjo tau se'rea. Mingka la'biangampa lompona barakka'na mae ri rupataua passabakkang se'rea tau maraengannaya, iamintu Isa Almasi. LaNapa'la'bang bawang-bawangi pangngamaseanNa Allata'ala mae ri ke'nanga sa'genna akkulle ke'nanga assibajiki ammotere' siagang Allata'ala; lamakoasai ke'nanga ri anne linoa lanri Isa Almasi.

1 PETRUS 5:10

Mingka punna le'ba' mako sessa sinampe', KalenNa Allata'ala lampa'jari sukkukko. LaNapaentengko, siagang laNasareko kagassingang kammayatompa laNapakajarrekko. Nasaba' Iami Allata'ala sannaka baji'na pa'mai'Na; Iami le'baka angkiokko untu' angkasia' tongi kala'birang mannannunganga tete ri Almasi.

ROMA 6:16

Maka nuassenji angkanaya punna nupassareang kalennu mae ri se'reang tau nanugaukang apa ero'na, sikontutojenna napa'jari ata mako anjo tau nuturukia ero'na? Akkulleko a'jari ata mae ri apa langngeranga mae ri kamateanga, yareka a'jari ata mannurukia mae ri Allata'ala nalanri kammana assibajiki mako ammotere' siagang Allata'ala.

1 YOHANES 2:25

Na iaminne Napa'janjianga KalenNa Almasi mae ri katte: Katallassang sitojennaya siagang mannannunganga.

2 PETRUS 1:1

Natarimai sikamma sari'battangku, le'bakamo anggappa katappakkang sangkammaya baji'na katappakkanna ikambe. Le'ba' maki' Nasare katappakkang Isa Almasi, Iamintu Allata'ala siagang Karaeng Mappasalamatta, lanri Nagaukanna apa annabaya. Anne suraka battu ri nakke, iamintu Simon Petrus, atanNa siagang tunisuroNa Isa Almasi.

IBRANI 4:16

Lanri kammana, mae mako nakipa'baraniang kalenta andallekang ri Allata'ala, baji' pa'maika ammarenta. LaNakamaseangki' siagang laNabarakkakiki' Allata'ala sollanta akkulle anggappa pannulung ri sitabanna le'ba' wattunna.

ROMA 4:13

A'janjimi Allata'ala mae ri Abraham siagang sossoranna, angkanaya anne linoa la'jari warisi'nai Abraham. Na'janji kamma anjo Allata'ala teai lanri naturukinna Abraham hukkung-hukkung agama Yahudia, passangalinna lanri tappa'na mae ri Allata'ala sa'genna nitarimamo a'jari tau nikarannuang ri atinNa Allata'ala.

YOHANES 10:28

Kusarei ke'nanga katallassang satunggu-tunggua, natena nalapanra' ke'nanga sa'genna satunggu-tungguna. Tena manna sitau akkulle angngalle passai ke'nanga battu ri limangKu.

ROMA 6:12

Tea' mako pole pa'biangi nikoasai tallasa'nu ri dosaya ilalang ri anne linoa, sollanna tena nanuturukiangi ero' kaja'dallanna.

MATIUS 25:46

Jari lanihukkung ngaseng minjo taua sa'genna satunggu-tungguna. Mingka tau anggaukangai ero'Na Allata'ala, lanakasia'mi katallassang sitojennaya siagang mannannunganga.”

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.