ROMA 12:13 - KITTA' MATANGKASA'

¹³ Tulungi parannu tu Karisteng ampa'gannaki kaparalluanna, siagang pakate'nei atinnu antarimai julu tappa'nu tenaya nuassengi ke'nanga antama' ri balla'nu.

ROMA 12:13 Referans Kwoze

IBRANI 13:16

Teako takkaluppai a'gau' baji' siagang situlung-tulung, nasaba' iaminne kammaya koro'bang-koro'bang ampakasannangai atinNa Allata'ala.

2 KORINTUS 9:12

Nasaba' anne gau' baji' nugaukanga, tena naporo lappa'ganna' bawang mae ri kakuranganna Umma'Na Allata'ala. Passangalinna la'jari tongi passabakkang najai tau lappala' sukkuru' mae ri Allata'ala.

1 YOHANES 3:17

Punna nia' tau angkammai pa'barang-baranganna linoa, nampa nacini' paranna tau kakurangang, mingka taerokai antulungi anjo paranna tau, antekamma lakkulle nikana nakamaseangi Allata'ala?

IBRANI 6:10

Anjo Allata'ala teai Allata'ala tangngassenga adele'. TaNakaluppaiyai apa-apa le'baka nugaukang mae ri Ia siagang pangngamaseang le'baka nupappicinikang mae ri Ia ri wattunna nutulung sikamma julu tappatta, baji' na riolo, yareka na ri kamma-kammaya anne.

1 PETRUS 4:9

Paralluko massing sitoana baji' ri balla'nu, siagang teako akkunrarengi.

GALATIA 6:10

Jari, lalang nia'na ija kasampatang ri katte, paralluki' a'gau' baji' mae ri yangasenna rupataua, la'biangampa mae ri sikamma sari'battang julu tappatta.

IBRANI 13:2

Teako battala' pa'maiki antarimai ri balla'nu tau tenayapa nuassengi. Nasaba' lanri nugaukanna anjo kammaya, nale'ba' nia' tau antarimai malaekaka ri balla'na, na tanaassenga angkanaya malaeka' anjo natarimaya.

1 TIMOTIUS 3:2

Se'rea pamimping jama'ah, musti tau tena callanna, se'reji bainenna, naassengi napakalewa kalenna, annabai siagang angngassengi atorang; nangai annarimaya tau ri balla'na, akkullei angngajaraki taua;

1 TIMOTIUS 5:10

niassemmi angkanaya nangai a'gau' bajika, kammaya: le'ba'mi napakalompo baji' ana'-ana'na, nangai annarimaya toana a'bangngi ri balla'na, nalayani tau tappaka, siagang natulungi tau susaya; bodona kana, le'ba'mi nagaukang tojeng-tojeng a'rupa-rupaya jama-jamang baji'.

MATIUS 25:35

Nasaba' ri wattungKu cipuru' nusareA' kanre, ri wattungKu turere nusareA' je'ne inung. Ri wattungKu a'jari tau battu-battu nualleA' nupariballa'.

FILEMON 1:7

Pangngarimangnginnu mae ri sikontu umma'Na Allata'ala, sari'battang, napakarannui pa'maikku siagang napakalompoi sumangakku! Tassaleori ngasemmi sikontu Umma'Na Allata'ala lanri ikau.

TITUS 1:8

Musti nangai annarimaya tau ri balla'na, nangai apa-apa kabajikanga, naassengi napakalewa kalenna, lambusuki, tangkasaki siagang ta'atoroki lalang ri katallassanna.

2 KORINTUS 9:1

Sikontutojenna tenamo naparallu kutulisi' mae ri kau ngaseng lalang sura' anjo passala' sumbangang nikiringa mae ri Umma'Na Allata'ala niaka ri Yudea.

LAMPA-LAMPANA 10:4

Najanjammi Kornelius anjo malaekaka, nateai sipato' malla'na. Nakanamo, “Apa kutadeng Karaeng?” Appialimi anjo malaekaka nakana, “Nitarimami ri Allata'ala sikamma pappala' doannu siagang pa'mai' baji'nu, kammayatompa Nau'rangiko Allata'ala.

LAMPA-LAMPANA 4:35

nanapassareang mae ri sikamma tunisuroNa Allata'ala. Nampa nipa'bage-bageang anjo doeka mae ri sikamma tau kaparalluanga.

1 KORINTUS 16:15

Tantu massing nuassemmi Stefanus siagang sikontu tau niaka ri balla'na; iaminjo ke'nanga uru-uru a'jari tu Karisteng ri butta Akhaya. Attojeng-tojengi ke'nanga anjama untu' allayani umma'Na Allata'ala.

ROMA 12:8

Tau niaka pakkullena untu' ampakajarreki paranna tau, musti napakajarre' tojeng-tojengi paranna tau. Tau niaka pakkullena untu' assarei apa-apanna paranna tau, musti lammoro' pa'maiki, situru' siratannaya assare ri paranna tau. Tau niaka pakkullena untu' ammimping, musti ammimping tojeng-tojengi. Tau niaka pakkullena untu' ampappicinikangi pangngamaseanna mae ri paranna tau, musti napappicinikangi anjo pangngamaseanna situlusu' pa'mai'na mae ri paranna tau.

PAMMUJI 41:1

Untu' pamimping pakelong. Pammujina Daud.

2 SAMUEL 17:29

Angngerangi ke'nanga mangko', pamaja', siagang kasoro' untu' Daud siagang ana' buana, kammayatompa gandung, jelai, labu', gandung nisanggara', campe' eja, campe' eja lompoa, je'ne' bani, keju, dadi' siagang pirang kayuang gimbala'. Naassengi ke'nanga angkanaya cipuruki Daud siagang ana' buana, turerei siagang mangngangi lanri pa'jappang ri parang lompoa.

2 KARAENG-KARAENG 4:10

Bajiki punna apparekki' se're kamara' ca'di irate ri bageang ratena anne ballatta, siagang nisarei katinroang, mejang, kadera, siagang lampu sollanna akkulle a'bangngi anjoreng punna niaki battu angkunjungiki'.”

PANGNGEBARANG 31:20

Tena nagi'gili' mae ri tau kakuranganga; baji' pa'maiki mae ri parallua nitulung.

TITUS 3:14

Yangaseng taunta musti appilajaraki anggaukangi apa-apa bajika, sollanna akkulle massing nagappa apa-apa sannaka naparalluina ke'nanga; gassingka tena matu-matunna katallassanna ke'nanga.

3 YOHANES 1:5

Sari'battangku! Sanna' tamamminranu lalang jama-jamang nugaukanga mae ri paranta tu Karisteng; ba'lalo manna tau tenayapa nuassengi, nulayani tongi.