PAPPICINI' 13:2 - KITTA' MATANGKASA'

² Anjo olo'-oloka sangkammai kucini' macang burika, na bangkenna sangkammai bangkeng beruang, kammayatompa muncenna sangkammai munceng singa. Nampa napassareang anjo nagaya kagassingang kalenna mae ri anjo olo'-oloka; kammayatompa empoang kala'biranna siagang kakoasang lompona nasareang tommi.

PAPPICINI' 13:2 Referans Kwoze

PAPPICINI' 20:2

Nampa najakkala' anjo nagaya, anjo ulara' toaya – iamintu Billisika yareka Roh Ja'dalaka – nampa nasikko' untu' sisa'bu taung sallona.

PAPPICINI' 17:12

Anjo sampuloa tanru' nucinika iamintu sampuloa karaeng, tenayapa nappakkaramula ammarenta. Mingka lanisarei ke'nanga koasa untu' ammarenta a'jari karaeng siagang anjo olo'-oloka poro sijang sallona.

PAPPICINI' 12:9

Nipela'mi anjo naga lompoa assulukang! Iami anjo ulara' toaya niarenga Billisi' yareka Roh Ja'dalaka, antipuai sikontu linoa. Nipela'mi naung ri linoa siagang sikontu malaeka'na.

1 PETRUS 5:8

Paralluko tuli tutu siagang a'jaga-jaga! Nasaba' anjo Billisika iami musunnu. A'lampai anrai'-kalau' sanrapang singa nye'nyereka amboyai apa akkullea nalollong.

PAPPICINI' 19:20

Nijakkala'mi anjo olo'-oloka siagang sikontu na'bi takontutojenga, iamintu le'baka appare' panggaukang appakalannasa' ri dallekanna anjo olo'-oloka. (Iaminjo gau'-gau' appakalannasaka napake anjo olo'-oloka antipui anjo tau le'baka ngaseng nabatei anjo olo'-oloka, siagang anjo tau anynyombaya mae ri patunga.) Nampa nipela' attallasa' anjo olo'-oloka siagang na'bi balle-ballea antama' ri tamparang pepe' a'rinra-rinraya siagang bara.

PAPPICINI' 13:4

Nasombami ke'nanga anjo naga le'baka assarei kakoasang anjo olo'-oloka. Kammayatompa anjo olo'-oloka nasomba tommi ke'nanga. Nakanamo ke'nanga, “Tenamo sangkammanna anne olo'-oloka! Tenamo akkulle angngewai a'bundu'.”

PAPPICINI' 12:15

Jari appasappuru'mi battu ri bawana anjo nagaya sanna' jaina je'ne' mae ri anjo bainea, sollanna akkulle ammanyu'.

PAPPICINI' 12:13

Ri wattunna naasseng kalenna anjo nagaya angkana nipela'mi naung ri buttaya, appakkaramulami naondang anjo baine le'baka allassukang ana' bura'ne.

PAPPICINI' 16:10

Nampa natumpami bonena pammoneanna anjo malaeka' makalimaya mae ri empoang kala'biranna anjo olo'-oloka. Na'jari sassang ngasemmo sikontu pa'rasangang naparentaya anjo olo'-oloka, namassing nakokko'mo lilana rupataua napakamma pa'risi'.

AMOS 5:19

Kaadaanna rapangi tau laria battu ampilari singaya, nampa assibuntulu' siagang beruang. Yareka kontui tau ammotereka mae ri balla' nappatungkulu' siagang limanna mae ri temboka nampa nipitto' ri ulara'!

YEREMIA 13:23

Maka akkullei tau le'lenga ampinrai kalenna, yareka macanga ampelaki ballanna? Tantu tena! Kammatommi anjo ikau biasaya a'gau' ja'dala', tena olonu lakkulle anggaukangi bajika.

YEREMIA 5:6

Lanri kammana minjo nalanibuno ke'nanga ri singa battua ri romanga, siagang nikae-kae ri serigala battua ri parang lompoa. A'dete'mi mange-mange macang a'ballanga amboyai lanakanrea ri ampi'na kota-kotana ke'nanga, na sikamma tau assuluka nabakkai ngaseng nakanre. Kajariang ngasengi anjo sikammaya lanri jainamo dosana ke'nanga, siagang a'mole-molemi nabokoi Allata'ala.

YESAYA 5:29

Ammarrungi sa'ranna tantarana rapang sa'ranna singaya, beru le'baka angngokko' apa najakkala', nampa naerang lari, nampa tena akkulle allappassangi.

PANGNGEBARANG 28:15

Tau ja'dalaka ammarenta ri tau kakuranganga, sanrapangi singa ammarrunga sa'ranna yareka beruang a'bakkaya.

PANGNGEBARANG 17:12

Bajikangngangi assibuntuluka siagang anrong beruang tappelaka ana'na, kala assibuntuluka siagang tau sibuka siagang kadongokanna.

PAMMUJI 22:21

Kipakabellai pa'danga battu ri nyawaku, Kipasalamaka' battu ri pangngokko'na kongkonga.

2 KARAENG-KARAENG 2:24

Assailemi Elisa na naciniki ke'nanga siagang nasumpai ke'nanga lanri arenNa Batara. Anjo memang wattua nia'mo ruang kayu macang gana assulu' battu lalang ri romanga nampa nakae-kae kalenna patampulo anrua tau battu ri anjo ana'-anaka.

HABAKUK 1:8

Jaranna la'bi gassingi lari na macanga, siagang la'bi sekkeki na serigala cipuruka. Pasukang a'jaranna battui ri pa'rasangang-pa'rasangang bellaya; battui ke'nanga rapang balangkoa' antamberoi apa najakkalaka.

AMOS 3:12

Rapang sitau pakalawaki anggappayai ammotere' bangkenna mami yareka sipolong mami tolinna gimbala'na le'baka nikanre ri singa, kamma tomminjo sike'de' dudu mami lammantang battu ri pandudu'na Samaria attinro baji'-bajika pakkasia'na ri katinroang ga'gana.”

HOSEA 11:10

Nakana Batara, “UmmakKu lamminawangi ri Nakke punna ammarrung sa'rangKu rapang singa siagang Kupannekkere' musunna ke'nanga. Lakkaro-karoi ummakKu nia' battu lau' untu' anynyomba ri Nakke.

2 TIMOTIUS 4:17

Mingka Narurunganga' Batara. Nasarea' kagassingang sa'gengku akkulle ambirittakangi sikontu anjo Kabara' Bajika, sollanna akkulle nalangngere' ngaseng bansa-bansa maraenga. Siagang ta'lappasa'ma' battu ri bahayana kamateanga.

PAPPICINI' 2:13

Kuassengi angkana kemaeko ammantang. Lalangko ammantang ri tampa' kakoasanna Billisika. Tamamminrayako mae ri Nakke. Ba'lalo, ri wattunna nibuno Antipas ri Billisika ri dallekannu, iamintu sa'biKu tamamminraya, tena todong nanussassala' angkanaya tappakko mae ri Nakke.

PAPPICINI' 13:12

Ri dallekanna anjo olo'-olo' bungasaka ammakei kakoasang lompo iamintu kakoasang natarimaya battu ri anjo olo'-olo' bungasaka. Sikontu buttaya siagang sikontu tau ammantanga ri tompo'na napassa ngasemmi anynyomba mae ri anjo olo'-olo' bungasaka sumpaeng, anjo piayamo bokka' lompona.