PAPPICINI' 12:7 - KITTA' MATANGKASA'

⁷ Nampa a'jarimo pa'bundukanga ri suruga. A'bundu'mi Mikhael siagang malaeka'-malaeka'na angngewai anjo nagaya. Nangngewamo anjo nagaya, nibantu ri malaeka'-malaeka'na todong, angngewai Mikhael.

PAPPICINI' 12:7 Referans Kwoze

YUDAS 1:9

Manna kalenna Mikhael, iamintu kapalana malaekaka, tale'bakai a'gau' kamma anjo. Ri wattunna a'besere' siagang Billisika passabakkang inai langgappai maya'na Musa, tena nabarani Mikhael angngadeli siagang bicara hina Billisika. Angkanaji bawang Mikhael, “LaNapakainga' lompoko Batara!”

DANIEL 12:1

Nakanamo pole anjo malaeka' ammakea pakeang lenang, “Ri anjo wattua lammumbai malaeka' lompoa iamintu Mikhael pajagana bansanu. Nampa lania' wattu kasukkarang tenaya sanrapanna baku' nia'na bansa-bansaya. Mingka sikontu tau battua ri bansanu, ia niaka tattulisi' arenna lalang ri kitta'Na Allata'ala, lanipasalamaki.

2 PETRUS 2:4

Manna malaeka'-malaeka' dorakaya tena todong nalata'lappasa' battu ri hukkunganNa Allata'ala. Lanipela' tongi ke'nanga antama' ri naraka. Nipantamaki ke'nanga ri tampa' sassanga, nanitahang anjoreng sa'genna narapi' Allo Pangadelanga.

EFESUS 6:12

Nasaba' teai rupataua bawang laniewa, passangalinna kagassinganna pole setang-setang makoasaya ri anne jammang ja'dalaka. Ia laniewaya iamintu kagassinganna pole roh-roh ja'dalaka, makoasaya todong ilalang ri anne linoa.

PAPPICINI' 20:2

Nampa najakkala' anjo nagaya, anjo ulara' toaya – iamintu Billisika yareka Roh Ja'dalaka – nampa nasikko' untu' sisa'bu taung sallona.

DANIEL 10:13

Malaeka' pajagana kakaraengang Persia naewa' nia' ruampulo asse're allonna. Nampa Mikhael, kalase'renna pamimping malaekaka, battu antulunga'. Kubokoimi anjoreng, ri Persia.

PAPPICINI' 12:9

Nipela'mi anjo naga lompoa assulukang! Iami anjo ulara' toaya niarenga Billisi' yareka Roh Ja'dalaka, antipuai sikontu linoa. Nipela'mi naung ri linoa siagang sikontu malaeka'na.

2 TESALONIKA 1:7

Na untu' ikau angkasiakai pa'risika ri kamma-kammaya anne – kammayatompa ri kambe – laNasareki' kasalewangang Allata'ala, punna battu sallang Batara Isa, manaunga battu ri suruga ampa'nyatai KalenNa siagang malaeka'-malaeka' lompoNa

2 KORINTUS 12:7

Mingka sollanna tena nakua'jari tampo dudu lanri ri anjo pappicini' lompoa, le'baka kucini', nisarema' sirupa garring antama' ri kalengku. Anjo garringa akkullei napake Billisika. Nisarea' anjo garringa a'jari pa'ba'bala' ri kalengku, sollanna tena nakua'jari tampo.

PAPPICINI' 13:7

Nipa'biang tommi angngewai siagang ambetai Umma'Na Allata'ala. Kammayatompa nipassareammi ri ia kakoasanga mae ri sikontu sukua, pa'rasanganga, bahasaya, siagang bansa-bansaya.

MATIUS 16:27

Tasalloami Nabattu Ana' Ma'rupataua siagang kakoasanNa ManggeNa, nirurungang ri malaeka'-malaeka'Na. Iaminjo wattua naNabalasa' massing panggaukanna rupataua.

MATIUS 13:41

LaNasuroi malaeka'-malaeka'Na Ana' Ma'rupataua ampasse're ngasengi sikontu tau a'jari passabakkanga na'gau' dosa taua, kammayatompa sikontu tau a'gau' ja'dalaka.

PAMMUJI 78:49

Napa'betteseki kalarroanNa anrinra kamma pepe' nampa Napabattu se're pasukang malaeka' kamateang sa'genna a'jari tappu' pa'minasa ke'nanga.

MATIUS 26:53

Maka tenapa nuassengi angkanaya punna erokKa', akkullei Kupala' ri ManggeKu sollanna Nasuro battu silalonna memang surudadu malaeka'Na, sampulo anrua sa'bu battu angngalleiA'?

MATIUS 25:41

Nampa Nakana anjo Karaenga mae ri tau niaka ri sa'ri kairinNa, ‘Bellako anrinni, ikau ngaseng tau ja'dalaka! Antama' mako ri pepe' a'rinraya satunggu-tungguna, le'baka napasadiangko Billisika siagang sikamma malaeka'na!

MATIUS 24:31

Nipasa'rami tarompe' lompoa. Na Nasuromo malaeka'-malaeka'Na Ana' Ma'rupataua ampa'rappungangi umma'Na battu ri sikontu linoa, battu raya sa'genna kalau', kammayatompa battu timboro' sa'genna wara'.”

YESAYA 55:4

Sikontutojenna, ia laKupa'jari pamimping siagang panglima, sa'bi kakoasangKu mae ri sikamma bansa-bansaya.

YESAYA 34:5

Napasadiami pa'danNa Batara ri suruga, na kamma-kamma anne latattabami anjo pa'danga mae ri bansa Edom, le'baka nitappuki hukkunganna laniancuru'.

IBRANI 2:10

Memang siratang memang tongi Allata'ala – le'baka ampa'niaki sikontu apa-apaya situru' apa Nakaerokanga – ampa'jari Isa Pappasalama' sukkuka tete ri kasessanga. Lanri kammanami anjo nakkullemo jai tau Nakio' Allata'ala amminawang nipakalompo siagang Isa. Nasaba' Iami panynyungke oloang mae ri ke'nanga untu' akkulle nipasalama'.

PAPPICINI' 12:8

Mingka nibetami anjo nagaya. Tenamo nanipa'biangi ammantang ri suruga siagang malaeka'-malaeka'na.