PAOLE 8:2 - KITTA' MATANGKASA'

² U'rangi! Patampulo taungko Napimping Karaeng Allata'alanu lalang pa'jappang bella ammalo ri parang lompoa. Erokko Naso'ri Batara ilalang ri anjo pa'jappanga, sollanna akkulle Nacini' apa niaka lalang ri atinnu, siagang apaka lanuturukiji parenta-parentaNa yareka tena.

PAOLE 8:2 Referans Kwoze

YAKOBUS 1:3

Nasaba' nuassemmi, angkanaya punna attahangko ri tappa'nu mae ri Batara ri wattunnu nataba paccoba, wassele'na iamintu: a'jari mako tau sa'bara'.

1 PETRUS 1:7

Matu-matunna ngaseng anjo iamintu sollanna akkulle a'butti katappakkang tojeng-tojennu mae ri Batara yareka tena. Manna bulaeng akkullea panra' niuji tonji siagang pepe'. Jari, anjo katappakkannu la'bi lompoangangi anggaranna na bulaenga; jari musti niuji tongi sollanna a'jari jarre'. Siagang lanri kammana, lanipuji mako siagang lanipakala'biri' mako, kammayatompa lanipakatinggi mako sallang ri allo kabattuanNa ammotere' Isa Almasi.

PAOLE 8:16

Ri parang lompoa Nasareko manna untu' a'jari kanrenu, iamintu kanre tenaya naassengi boe-boenu. Nagaukangai Batara kammaya anjo lanri ero'nu naso'ri siagang nakellaina tuna pa'mai'nu, sollanna akkulle a'gau' baji' mae ri kau ri kale'bakkanna.

KALAPPASSANG 16:4

Nakanamo Batara ri Musa, “Kamma-kamma anne lappaturungA' kanre alla'bi-la'bi rapang bosi untu' ikau ngaseng. Tunggala' allo musti appasse'reko kanre untu' siganna'na nukanre siallo. Kammaminjo bateKu ero' anso'ri ummakKu, sollanna akkulle Kuasseng angkana apaka ma'nassa mannuruki tojenji ke'nanga ri sikamma parentaKu yareka tena.

PAOLE 2:7

U'rangi antekamma bateNa Karaeng Allata'alanu le'ba' ambarakkakiko lalang sikontu apa nugaukanga. Naparakaiko siapa sallonu lalang ri pa'la'bakkannu a'jappa ri anne parang lompoa. Nala'langngiko lalang anne patampulo taunga siagang Nasareko sikontu apa nuparalluanga.

2 PATTOTTORANG 32:31

Siagang ri wattunna battu sikamma tunisuroa battu ri Babel untu' ampakkuta'nangngangi antekamma batena appakalannasa' nammolle ri garrinna, nilappassammi Hizkia ri Batara untu' a'gau' ri ero'na, lanri ero'na niso'ri pa'mai'na.

KALAPPASSANG 15:25

Appala' doang dudumi Musa mae ri Batara. Nampa nipicinikiammo ri Batara sipolong kayu. Naallemi Musa anjo kayua nampa napasambila antama' ri je'neka, sa'genna a'jari la'ba anjo je'neka, nakkullemo niinung. Anjoremmi ri tampaka assare Batara paratorang-paratorang mae ri ke'nanga, siagang anjoreng tommi Naso'ri ke'nanga.

YAKOBUS 4:10

Paralluko ampakatunai kalennu ri dallekanNa Batara, sollannu Napakatinggi sallang Batara.

YOHANES 2:25

Tena naparallu nipauang ri passala'na massing rupataua, lanri Naassenna ngaseng apa niaka lalang ri atinna rupataua.

YAKOBUS 4:6

Mingka manna nakamma, la'bi terassangangi pangngamaseang Napassareanga Allata'ala mae ri katte na anjo cinnana roh niaka ri katte. Iaminjo saba'na na nia' todong tattulisi' lalang ri kittaka angkanaya, “Nimusui ri Allata'ala tau tampoa, mingka Nakamaseangi tau tunaya atinna.”

PAOLE 29:5

Patampulo taungi sallona Batara ampimpingko a'jappa ri parang lompoa, mingka tena na'jari toa pakeannu siagang sandala'nu.

LUKAS 18:14

Nakanamo Isa, “Patappa'mi angkanaya, ri wattunna ammotere' mange ri balla', iaminjo pasingara' simaya nitarima pappala'na ri Allata'ala. Jari teai pappala'na anjo tu Farisia. Nasaba' inai-nai ampakatinggi kalenna iami lanipakatuna. Na inai-nai ampakatunai kalenna, iami lanipakatinggi.”

AMOS 2:10

Le'ba' mako Kuerang assulu' battu ri Mesir, siagang Kururunganga allalo ri parang kassika patampulo taung sallona. Buttana tu Amori le'ba'mi Kupassareang mae ri kau a'jari pa'rasangannu.

YESAYA 2:17

Tau borroa lanipakatunai, siagang tau tampoa lanipadundui. Bataraji bawang nipakalompo.

PANGNGEBARANG 17:3

Bulaeng siagang pera' niuji' ri pepeka, mingka atinna taua niuji ri Batara.

PAMMUJI 136:16

Napimpingi umma'Na allalo ri parang lompoa; pangngamaseanNa sa'genna satunggu-tungguna.

PAMMUJI 106:7

Wattunna ri Mesir tena napahangi boe-boena ikambe; tanapahangai bate pare' malompoTa. Nakaluppai pangngamaseang alla'biTa, ri ampi'na Tamparang Alara' angngewai ke'nanga mae ri Kaminang Tinggia.

PAMMUJI 81:7

“Le'ba'mi Kualle erangnganga ri salanggannu, naKulappassang karanjeng pisangngang niaka ri limannu.

PAMMUJI 77:11

Nampa kukanamo, “Iaminne ampa'risi pa'maikku, angkanaya tenamo namakoasa Kaminang Tinggia.”

AYUB 33:17

PattujunNa, sollanna ammari taua a'gau' dosa na napammari ke'nanga nikanaya borro.

2 PATTOTTORANG 33:12

Lalang nakasia'namo anjo sessaya napakatunami kalenna ri dallekanNa Karaeng Allata'alana, nampa appala' doang appala' pannulung.

PAOLE 13:3

tea' laloko erokki amparhatikangi. Napakei Karaeng Allata'alanu anjo taua untu' anso'riko, lanri ero'Na Nacini' angkanaya apaka ma'nassa mangngamaseang tojengko mae ri Batara yareka tena.

PAOLE 7:18

Mingka teako mallakki mae ri ke'nanga; u'rangi apa le'baka Nagaukang Karaeng Allata'alanu mae ri karaeng Mesir siagang sikontu ra'ya'na.

PAOLE 1:33

Ia niaka a'jappa ri dallekannu ampa'boyangko tampa' untu' akkema. Ia anjo'jokangko oloang punna bangngi lalang rupa benteng pepe', siagang a'rupa benteng rammang punna allo.”

PAOLE 1:3

Ri tanggala' se're bulang sampulo asse're lalang taung makapatampulona le'ba'na nabokoi ke'nanga butta Mesir, napabattumi Musa mae ri anjo bansaya sikontu apa Nasuro pabattua Batara mae ri ke'nanga.

PA'JARIANG 22:1

Siapa are wattu ribokoanganna Naso'rimi Allata'ala kajarrekanna tappa'na Abraham. Nakio'mi Allata'ala anjo Abraham angkana, “Abraham!” Appialimi Abraham angkana, “Iye' Batara.”

PAPPICINI' 2:23

Sikamma ana' gurunna laKubuno ngaseng tongi, sollanna nasadari ngaseng jama'aka angkanaya iNakkemi anne angngasseng ngasengi pikkiranna siagang nawa-nawanna rupataua. LaKubalasa' ngasengko situru' massing-massing panggaukannu.

2 PATTOTTORANG 33:19

Lalang ri kitta' Pau-pauanna Na'bi-na'bia nia' tongi nicata' pappala' doanna Manasye siagang papialinNa Allata'ala mae ri anjo pappala'na, kammayatompa carita ri passala'na dosa-dosa nagaukanga lalang tenanapa natoba', tampa'-tampa' panynyombang barhala siagang patung-patung Dewi Asyera napareka, siagang barhala-barhala nasombaya.

KALAPPASSANG 16:35

Anjo mannaya a'jari kanrena tu Israel patampulo taung ribokoanganna, sa'genna battu ke'nanga mange ri Kanaan, tampa' pammantangang situlina ke'nanga. (

KALAPPASSANG 20:20

Appialimi Musa angkana, “Teako mallakki. Nabattu Allata'ala kaero'nuji Naso'ri sollanna nutuli mannuruki mae ri Ia, siagang tena nudoraka.”

PAMMILANGNGANG 14:33

Patampulo taungi ana'-ana'nu la'jappa ri parang lompoa. Lanri tena namajarre' pa'mai'nu, lasessai ana'-ana'nu, sa'genna matemo tau kala'busanga ri kau.

HAKING-HAKING 2:22

LaKupakei anjo bansa-bansaya untu' ancobai bansa Israel, sollanna akkullei Kuasseng angkanaya maka ero'ji yareka tenamo naero' ke'nanga anturuki sikamma parentaKu.”

HAKING-HAKING 3:4

Nia'mi ke'nanga anjoreng untu' a'jari paccoba mae ri bansa Israel. Lanri kammana akkullemi niasseng angkanaya maka naturukiji tu Israel parenta-parenta le'baka Napassareang Batara mae ri boe-boena ke'nanga tete ri Musa.

NEHEMIA 9:19

Mingka manna ri paranga taKibokoiai ke'nanga, lanri sukkutTa ri pangngamaseang. TaKipalesangngai ammotere' benteng allung siagang pepe', angngului ri jappana ke'nanga allo bangngi.

YEHEZKIEL 20:19

INakkemi Karaeng Allata'alanu. Turuki hukkung-hukkungKu siagang parenta-parentaKu.

PAOLE 32:7

U'rangi le'ba' laloa, ri jammang riolo, carita nibolika lalang pangngu'rangi. Kuta'nangi anjo passalaka mae ri tutoanu, na napau ke'nanga mae ri kau.

PAMMUJI 103:2

Pujimi Batara, he nyawaku, teako kaluppai sikontu kabajikanNa!

YEREMIA 2:6

Tenamo najampangiA'; iNakke, le'baka angngului ke'nanga ri aganga, siagang angngerangi ke'nanga assulu' battu ri Mesir allalo ri parang kassika, daera roso' a'lekko-lekkoa, butta kalotoro' siagang jaia bahayana – parang tenaya nanipammantangngi siagang tenaya nanipanumaloi!