PAOLE 30:5 - KITTA' MATANGKASA'

⁵ Lakkullei nupatang ammotere' butta napammantangngia boe-boenu riolo. Siagang lanipa'jari la'bi salewangangko pole, kammayatompa pila' jaiangngangi bilannu na boe-boenu riolo.

PAOLE 30:5 Referans Kwoze

YEREMIA 29:14

Tojeng, lanubuntulukKa'. LaKupasse'reko battu ri tangnga-tangngana tunggala' bansaya siagang battu ri pa'rasangang tampa'nu nipasisa'la'-sala' nipela'. LaKuerangko ammotere' mange ri pa'rasangang kabattuannu anne, siagang laKupakabajiki ammotere' katallassannu. INakke, Batara, anne akkana.’

PAMMILANGNGANG 10:29

Nakanamo Musa mae ri ipara'na, iamintu Hobab ana'na Rehuel tu Midian, “La'lampai ikambe mange ri tampa' nakanaya laNapassareangi Batara mae ri kambe. Le'ba'mi Napa'janjiang Batara apa bajika mae ri tu Israel. Jari amminawang mako, tena tanigau' baji'nu ri kambe.”

PAOLE 7:13

LaNakamaseangko siagang laNabarakkakiko, sa'genna a'jari jai ana'nu na pila' katambang jainu. LaNabarakkaki sikamma kokonnu, sa'genna angngerang wassele' gandung, anggoro' siagang minynya' zaitun. LaNabarakkakiko sa'genna a'jari jai sapinu, bembenu siagang gimbala'nu. Sikontu anjo barakkaka lanutarimai ri pa'rasangang Napassareanga Batara mae ri kau, situru' janjinNa mae ri boe-boenu.

PAOLE 13:17

Anjo sikamma barang-barang nitunraia takkulleai nuboli' untu' kaparalluang kalennu, mingka musti niancuru' taba sikali. Jari lanaummi larroNa Batara siagang laNapappicinikammi pangngamaseanNa mae ri kau. Lamalammoro' pa'maiki mae ri kau siagang laNapa'jariko bansa malompo, sangkamma Napa'janjianga mae ri boe-boenu,

PAMMUJI 119:68

Saba' ikatte bajikKi' siagang bajiki Kigaukanga, ajaria' ri sikamma katantuanTa.

YEREMIA 30:3

Nasaba' lanarapiki sallang wattunna nalaKupa'jari baji' ammotere' katallassanna ummakKu Israel siagang Yehuda. LaKuerangi ammotere' ke'nanga mange ri pa'rasangang le'baka Kupassareang mae ri boe-boena ke'nanga. Anjo pa'rasanganga lanapatangi ammotere' ke'nanga. INakke, Batara, anne akkana.”

YEREMIA 33:9

Yerusalem la'jari karannuangKu siagang kalompoanna nyawaKu. Sikontu bansaya ri lino la'jari mallaki siagang annekkereki kammayatompa lappakalompoi ri Nakke, punna nalangngereki passala'na kabajikang Kugaukanga untu' pandudu'na Yerusalem, siagang kakalumanynyangngang Kupassareanga mae ri anjo kotaya.”

YEHEZKIEL 36:11

Pandudu'nu siagang olo'-olo'nu laKutambai sa'genna a'jari sanna' jaina, la'bi jaiangngangi narioloa, siagang lammana'-manaki naccucu ke'nanga sanna' jaina. Lattallasaki ke'nanga anjoreng sangkamma riolo, siagang Kupa'jari kalumanynyangi, kamma tenayapa nale'ba' nukasia' rioloanganna. Jari lanaassemmi ke'nanga angkanaya iNakkemi Batara.

YEHEZKIEL 36:37

Nakana Batara Kaminang Tinggia, “He bansa Israel, Kupa'biang mako ammotere' appala' tulung mae ri Nakke; laKutambai jainu, sanrapang pa'rappungang gimbalaka jaina.