PAOLE 29:18 - KITTA' MATANGKASA'

¹⁸ Jari, katutui sollanna tena lalo battu ri kau, bura'ne yareka baine, kaluarga yareka suku, ia niaka ammenteng anrinni, ta'giling battu ri Karaeng Allata'alata untu' anynyomba mae ri rewata-rewatana bansa maraenga. Anjo panggaukang kammaya rapangi aka' attimboa battu ri lamung-lamung paika siagang niaka racunna.

PAOLE 29:18 Referans Kwoze

IBRANI 12:15

Jagai sollanna tena manna sitau ambokoi kabajikang pa'mai'Na Allata'ala; sollanna tena nania' a'jari sanrapang lamung-lamung niaka racunna ri tangnga-tangnganu sa'genna appa'nia' kasukkarang siagang jai tau napanraki siagang racunna.

YEREMIA 9:15

Lanri kammana anjo, pilangngeri apa laKugaukanga, Batara Kaminang Koasaya, Allata'alana Israel: laKusarei ummakKu lamungang pai' untu' nakanre siagang racung untu' nainung.

IBRANI 3:12

Sikamma sari'battangku, tutu laloko, gassingka niakko kalase'rennu sanna' ja'dala'na pa'mai'na siagang tena natappa', sa'genna a'boko siagang napakabella kalenna battu ri Allata'ala assarea katallassang!

LAMPA-LAMPANA 8:23

Nasaba' kuassengi angkanaya sanna' assereatinu, siagang nipare' atako ri kaja'dallanga.”

AMOS 6:12

Maka akkullei lari jaranga irate ri bulu' batua? Niakka tau le'ba' ampa'jekoi tamparanga siagang sapi? Mingka ikau ngaseng le'ba'mi nuputara' bale' kaadelanga a'jari racung ammunoa, siagang annabaya a'jari sala.

HOSEA 10:4

A'bicara kosongi ke'nanga siagang appareki janji takontutojeng siagang anynyikkoki parjanjiang tenaya matu-matunna. Naputara' baleki hukkunga ke'nanga, sa'genna attimbomo tenaya naadele' rapang lamung-lamung a'racunga ri koko le'baka nibingkung.

PAOLE 29:19

Ri sikamma kau niaka anrinni ampilangngeri anjo tuntutang terasaka tea' laloko niakki appikkiri' angkanaya tuli labaji'na sarennu, manna pole nattojeng-tojeng ero' amboyai oloang kalenna. Anjo kammaya lanapanraki ngaseng jako, baji' natau ja'dalaka kammayatompa natau bajika.

PAOLE 32:32

Kamma Sodom siagang Gomora ja'dala'na musunna Israel, rapang poko' anggoro' pai' na'racunga rapponna.

PAMMUJI 69:21

Tappu' minasama' napakamma nihina, tenamo sumangakku. A'boya' pa'rikongang, mingka sia-siaji, a'boya' panynyaleori, mingka tena kunggappa.

YEREMIA 8:14

Nakana umma'Na Allata'ala, “Angngapa natena apa-apa nigaukang? Umba nakissama-sama a'lili mange ri kota-kota niaka pattahanganna, lappassang maki' anjoreng mate. Le'ba'mi Natappuki Karaeng Allata'ala, angkanaya musti panrakki'. Le'ba' maki' Nasare racung untu' niinung lanri dorakaki' mae ri Ia.

YEREMIA 23:15

Nakana Batara Kaminang Koasaya, “LaKusarei anjo sikamma na'bia ri Yerusalem lamung-lamung pai' untu' nakanre siagang racung untu' nainung, lanri passabakkang iaminjo ke'nanga nasikontu taua ri pa'rasanganga tenamo napakalompoA'.”

PAMMUJI 10:13

Angngapa tu ja'dalaka natuli nahina Allata'ala na nakana talanihukkungai ri Allata'ala?

YEREMIA 23:17

Mae ri sikamma tau taeroka ampilangngeri kana-kanangKu, tuli nakana ke'nanga, ‘Lasalamakko.’ Nampa mae ri sikamma tau kapala batua, nakana ke'nanga, ‘Tena nulanggappa bala.’ ”