PAMMILANGNGANG 29:12 - KITTA' MATANGKASA'

¹² Ri tanggala' sampulo allima bulang tuju, musti asse're ngasengko untu' anggaukangi ibadaya, siagang takkulleako anjama battala'. Lalang tuju allo musti apparekko passua'-suarrang untu' ampakalompoi Batara.

PAMMILANGNGANG 29:12 Referans Kwoze

YOHANES 1:14

Ma'rupataumi anjo Kanaya, ammantangi ri tangnga-tangngata, na nicini'mo kala'biranNa. Natarimai anjo kala'biranga salaku Ana' sitau-tauNa Manggea. Tete ri KalenNami nanicini' Allata'ala, siagang pangngamaseanNa mae ri katte.

YEHEZKIEL 45:25

Ri passua'-suarrang allo lompo Pa'ballakang Leko'-leko', ia nipakaramulaya ri tanggala' sampulo allima bulang tuju, tunggala' allo lalang tuju allo sikamma patugasaka musti assarei koro'bang sangkamma, iamintu koro'bang pammopporang dosa, koro'bang nitunu, koro'bang gandung siagang minynya' zaitun.”

NEHEMIA 8:18

Tuju alloi sallona ke'nanga assua'-suara'. Allo-allona nabacai Ezra bageang-bageang niaka lalang ri anjo kitta' HukkunNa Allata'ala. Ri allo makasagantuju appare'mi acara untu' antongkoki anjo passua'-suarranna ke'nanga, situru' paratorang Hukkunga.

NEHEMIA 8:14

Nagappami ke'nanga lalang ri anjo Hukkung Napassareanga Batara tete ri Musa, angkanaya Nasuroi Batara umma' Israelka ammantang lalang ri pa'balla'-ballakang untu' poro sinampekang, iamintu ilalang nisua'-suarrinna Balla'-balla' Leko' kayua.

KALAPPASSANG 34:22

Pakalompoi Allo Lompo Pakkattoang ri wattunnu lappakkaramula angkattoi uru wassele' gandunnu. Pakalompo tongi Allo Lompo Pa'ballakang Leko'-leko' Kayua ri kala'busang taunga, ri wattunnu angngalle wassele' rappo-rappoang.

KALAPPASSANG 23:16

Pakalompo tongi Allo Lompo Pakkattoang ri wattunnu appakkaramula angkattoi uru wassele'na kokonnu. Pakalompoi Allo lompo Pa'ballakang Leko'-leko' ri kala'busang taung, ri wattunna nupasse're wassele' koko anggoro'nu siagang koko rappo-rappoannu.

PAMMILANGNGANG 29:1

Ri tanggala' se're bulang tuju musti asse're ngasengko untu' anggaukangi ibadaya, siagang takkulleako anggaukangi jama-jamang battalaka. Anjo alloa musti nipasa'rai sikamma tarompeka.

PAMMILANGNGANG 29:13

Ri allo makase'rea passareangi mae ri Batara koro'bang nitunua iamintu sampulo antallu kayunna sapi laki, ruang kayu gimbala' laki rungka, siagang sampulo angngappa' kayunna ana' gimbala' laki umuru' tassitaunga, massing tenaya ngaseng callanna. Rasanna anjo koro'banga napakasannangi nyawaNa Batara.

1 KARAENG-KARAENG 12:32

Nampa natampakkang Yerobeam anjo imang-imanga ri Betel untu' anggaukangi tugasa'na anjoreng, nampa ia kalenna assare koro'bang mae ri anjo sapi-sapi bulaeng napareka. Nampa napattantu angkana tanggala' sampulo allima bulang sagantuju allo lompo untu' Israel, sangkamma allo lompoa ri Yehuda. Anjo alloa a'lampai Yerobeam mange ri Betel siagang assare koro'bang untu' ansuarri anjo allo lompo le'baka napattantu.

EZRA 3:4

Nasuarri tommi ke'nanga Allo Lompo Pa'ballakang Leko'-leko' Kayua, situru' paratoranga; nampa allo-allona ke'nanga tuli assare koro'bang nipattantua untu' anjo alloa.

KAIMANGNGANG 23:7

Lalanna anjo tuju alloa musti assareko koro'bang kanre-kanreang mae ri Batara. Ri allo makase'rea siagang makatujua ri anjo passua'-suarranga musti asse're ngasengko untu' anggaukangi ibadaya siagang takkulleako anggaukangi jama-jamang battalaka.

PAMMILANGNGANG 29:35

Ri allo makasagantujua musti asse're ngasengko untu' anggaukangi ibadaya siagang takkulleako anggaukangi jama-jamang battalaka.