PAMMILANGNGANG 24:20 - KITTA' MATANGKASA'

²⁰ Nampa nacini' tommi Bileam tu Amalek lalang paccini'na. Jari napabattumi anne boto kammaya, “Battu ri sikontu bansaya ri lino, tu Amalek kaminang makoasa. Mingka kale'bakkanna anjo bansaya, lalanynya' tongi sa'genna satunggu-tungguna.”

PAMMILANGNGANG 24:20 Referans Kwoze

KALAPPASSANG 17:14

Nakanamo Batara ri Musa, “Tulisiki anne passala' pammetanga sollanna tuli niu'rangi. Paui mae ri Yosua angkanaya iNakke ampanraki anjo tu Amalek.”

ESTER 9:14

Nampa appasulu'mo parenta karaenga untu' anggaukangi anjo pappala'na Ester. Nipasulu'mi sura' parentaya untu' kota Susan, nampa nigentummi anjo sampuloa maya'na ana'na Haman.

ESTER 3:1

Siapa are wattu ribokoanganna angngangka'mi Karaeng Ahasyweros sitau kapala pamarenta, iamintu niarenga Haman. Anjo Haman, ana'na Hamedata, turungang battu ri Agag.

1 PATTOTTORANG 4:43

Nabunoi ke'nanga sikamma tu Amalek niaka tassesa, nampa appakkaramula anjo wattua ammantang tulimi ke'nanga anjoreng.

1 SAMUEL 30:17

Ammukona, ri wattu ammumbana alloa, nibundukimi ke'nanga ri Daud, na sa'genna bangngi ke'nanga a'bundu'. Pantaranganna patambilangnganga tau rungka laria a'dongko' unta, tena manna sitau anjo musua akkulle ta'lappasa'.

1 SAMUEL 30:1

Ruangallo ribokoanganna, Daud siagang ana' buana ammotere'mi mange ri Ziklag. Ri wattunna battu ke'nanga mange anjoreng, narapikammi ke'nanga angkanaya nabundukimi tu Amalek bageang timboranna pa'rasangang Yehuda nampa nabunduki Ziklag. Tena nabunoi ke'nanga manna pole sitau. Mingka natunu ngasengi ke'nanga sikontu kotaya sa'genna la'busu', nampa napannarrusu' jappana ke'nanga na naerang sikamma tubai'-bainea, ana'-anaka siagang pandudu' maraengannaya. Najakkala' tommi ke'nanga kaluargana Daud siagang sikamma kaluargana ana' buana, kammayatompa ruaya bainenna Daud, iamintu Ahinoam siagang Abigail. Sanna'mi si'nana pa'mai'na Daud siagang ana' buana, nampa tenamo ammarina angngarru' ke'nanga sa'genna mangngang.

1 SAMUEL 14:48

A'bunduki siagang barani nampa nabeta tu Amalek, kammayatompa nalappassangi tu Israel battu ri kakoasanna paellaka.

HAKING-HAKING 6:3

La'biangampa anjo pole sitabang a'lamung-lamung tu Israel pamarria battumi tu Midian siagang tu Amalek, kammayatompa tu maraengannaya battu ri parang kassika ambunduki tu Israel.

KALAPPASSANG 17:16

Nakana Musa, “Ta'galaki tinggi-tinggi banderaNa Batara! KalenNa Batara a'bundu' angngewai tu Amalek sa'genna satunggu-tungguna!”

KALAPPASSANG 17:8

Nampa battumo tu Amalek ambunduki tu Israel ri Rafidim.

PAMMILANGNGANG 24:7

Anggappai je'ne' bosi alla'bi-la'bi, anggappai jai je'ne' bine lamunganna. Lamala'biriki karaenna, la'biangang na Karaeng Agag, na lanipakala'biri' kakaraenganna.

PAMMILANGNGANG 24:19

Nia' battu ri Yakub lammumba sitau tumakoasa angngancurukai sikamma musu-musunna.”

PAMMILANGNGANG 24:24

Mingka lania' pasukang battu ri Siprus, lanabetai tu Asyur siagang Heber, nampa laancuru' todong anjo pasukanga.”

1 SAMUEL 15:2

LaNahukkungi tu Amalek lanri boe-boena ke'nanga naewai tu Israel ri wattunna battu tu Israel ri Mesir.