PAMMILANGNGANG 23:21 - KITTA' MATANGKASA'

²¹ Tena kaja'dallang nicini' ri kalenna Yakub; tena kasukkarrang nicini' ri tu Israel. Batara, Allata'alana ke'nanga, anrurungangi ke'nanga. Akkio' rannui ke'nanga angkana: Iami Karaeng!

PAMMILANGNGANG 23:21 Referans Kwoze

PAMMUJI 23:4

Manna kullalo ri ka'bung sassanga, tena kumalla' ri bahaya, saba' iKatte anrurunganga'. IKatte anjagaia' sanrapang pakalawaki anjagai gimbala'na siagang takkang na palu-palu lompo.

MATIUS 1:23

“Nia' sallang se're tulolo latianang siagang allassukang sitau ana' bura'ne. Anjo anaka lanigallaraki Imanuel.” (Imanuel iamintu bicara tu Ibrani, battuanna “Niaki Allata'ala anrurungangki'”.)

YEREMIA 50:20

Ri anjo wattua Israel siagang Yehuda latangkasaki battu ri dosaya, lanri laKupammopporangi sikamma tau le'baka Kupasalama'. INakke, Batara, anne akkana.”

YESAYA 38:17

Pacceku tappinrai a'jari kasannangang, iKatte ampasalamaka' battu ri bahayaya; Kipammopporangi sikamma dosa-dosaku.

PAMMUJI 46:11

Nakana, “Pammari a'bunduka; assengi, angkana iNakke anne Allata'ala, iNakke malompo ri alla'na bansa-bansaya, malompo ri sikontu linoa.”

YESAYA 33:22

Sikontu pakkakasa' niaka ri kappala'na ke'nanga tena ngaseng matu-matunna; sikamma sombala'na takkulleai nipaka'rang! Sikontu kakalumanynyanganna pasukang musua lanirampasaki, teai sipato' jaina, sa'genna manna tau pesoka anggappa ngaseng bageang. KalenNa Batara la'jari karaenta; Ia lammarenta, ampaentengi hukkunga siagang ampasalamakki' battu ri musua.

YESAYA 8:10

Apparekko rancana, mingka tena nia' anjari. Angngalle mako kaputusang, mingka tena matu-matunna, saba' ikambe Narurungangki' Allata'alana ikambe.

YESAYA 1:18

Nakana Batara, “Umba nanipa'le'ba' anne parkaraya. Manna pole nule'leng kamma uring napakamma dosa-dosanu, laKubissaiko sa'gennu a'jari kebo' sangkamma kapasa'. Manna pole najai siagang battala' dosa-dosanu, mingka laKupammopporang ngasengi.

ROMA 6:14

Takkullea mako nikoasai ri dosaya, nasaba' tenamo nurawanganna hukkung-hukkung agama Yahudia attallasa', passangalinna irawanganna mako pangngamaseanNa Allata'ala.

YESAYA 41:10

Teako mallakki, saba' iNakke anrurungangko, teako lussakki, saba' iNakke Allata'alanu. LaKupakajarrekko siagang laKutulungko, Kurenrengko lalang lima makassakKu.

PAMMUJI 118:15

Pilangngerimi pakkio' rannu ammetana ri kema-kemana umma'Na, “Nagaukangi Batara gau' malompoa!

PAMMUJI 97:1

Batarami Karaeng! Poro rannumi linoa, na ma'reja-reja pulo-puloa.

PAOLE 33:5

Ri wattu asse'rena Israel siagang pamimpinna, Batara a'jari Karaeng mae ri umma'Na.”

YEHEZKIEL 48:35

Sikontu anjo temboka la'buna 9 kilometere'. Na appakkaramula anjo wattua anjo kotaya naaremmi taua: “BATARA NIAKI ANJORENG!”

PAMMUJI 103:12

Antekamma bellana battu raya sa'genna kalau', kammaminjo bellana Napela' dosa-dosata.

PAMMUJI 46:7

A'gunturu'mi Allata'ala, na ancuru' taba sikali linoa; gegere'mi bansa-bansaya, runtummi sikamma karaenga.

PAMMUJI 32:5

Nampa kumangakuimo dosaku mae ri Katte, tenamo kasalangku kucokkoi. Kutappukimi ri pa'maikku untu' angngakui mae ri Katte, na Kipammopporang ngasemmo sikontu dosaku.

PAMMUJI 32:2

Mate'nei taua, ia tenaya nirekengi kaja'dallanna ri Batara, siagang tenaya nangai annipu.

2 PATTOTTORANG 13:12

Ikatte pamimpinta iamintu Allata'ala KalenNa siagang sikamma imang niaka anrinni. Sadiami ke'nanga appasa'ra tarompe' untu' a'jari pammatei ri katte lamaju ambundukiko. He, tu Israel, teako angngewai ri Batara, Allata'alana boe-boenu! Takkulleako ammeta!”

HAKING-HAKING 6:13

Appialimi Gideon angkana, “Kipammopporanga' Batara! Punna kontutojeng angkanaya nirurungangi ikambe ri Batara, angngapa nania' ngaseng anne kammaya antujui ikambe? Kemaeji anjo sikontu le'baka Nagaukang Batara riolo, siagang nacaritaya boe-boena ikambe antekamma bateNa Batara ampasuluki ke'nanga battu ri Mesir? Kamma-kamma anne nibokoimi ikambe ri Batara. Nabalang parekammaki' nikoasai ri bansa Midian.”

KALAPPASSANG 34:9

Nakana, “O Batara, punna ma'nassa nia' tojeng pangngellainTa mae ri nakke, kupalaki, poro amminawang laloKi' siagang ikambe. Anne bansaya memang kapala batui, mingka Kipammopporang laloi kaja'dallanna siagang dosana ikambe, siagang poro Kitarima laloi ikambe salaku umma' kalenTa.”

KALAPPASSANG 13:21

Punna allo niaki Batara a'jappa ri dallekanna ke'nanga lalang ri benteng rammanga; na punna bangngi a'jappai ri dallekanna ke'nanga lalang ri benteng pepeka untu' ampicinikiangi ke'nanga oloang. Lanri kammana anjo akkullei ke'nanga a'jappa allo bangngi.

2 KORINTUS 6:16

Apa passisambunganna Balla'Na Batara siagang balla'na barhalaya? Ikattemi anne sanrapang Balla'Na Batara, iamintu Allata'ala attallasaka. KalenNa Allata'ala angkana, “LammantangA' ri tangnga-tangngana ke'nanga, na Kusikatallassang siagang ke'nanga. La'jariMa' Allata'ala mae ri ke'nanga, na la'jarimo ke'nanga ummakKu.

2 KORINTUS 5:19

Ia biritta napabattua ikambe iamintu angkanaya Napa'jari assibajikimi Allata'ala rupataua mae ri KalenNa, tete ri Almasi. TaNabilangai sikontu kasalang le'baka nagaukang rupataua mae ri KalenNa. Na ikambemi Nasuro Allata'ala ambirittakangi anjo kabaraka.

2 KORINTUS 2:14

Mingka appala' sukkurukki' mae ri Allata'ala! Lanri Iami tuli ampimpingi ikambe amminawang lalang ri barrisi' passua'-suarrang pammetanNa Almasi lanri asse'rena ikambe mae ri Ia. Nipakemi ikambe ri Allata'ala ampa'la'bangi biritta ri passala'na Almasi, sanrapang bau' a'la'banga rasanna ri kere-keremae.

ROMA 8:1

Kamma-kamma anne tenamo hukkungang lantabai tau assileokamo katallassanna siagang Isa Almasi.

YESAYA 12:6

Akkio' rannuko he pandudu'na Sion, akkelongko siagang rannu. Allata'ala matangkasa'na Israel, sanna' la'biri'na, ammantangi ri tangnga-tangnganu ngaseng.”

KALAPPASSANG 3:12

Appialimi Allata'ala angkana, “INakke lantulungko. Napunna nuerammo assulu' anjo bansaya battu ri Mesir, lanugaukang ngasemmi ibadaya mae ri Nakke ri anne monconga. Iaminjo a'jari butti angkana iNakke assuroko.”

PAMMILANGNGANG 14:18

‘INakke, Batara, tena Kulinta' larro. Kupappicinikangi pangngamaseangKu siagang tamamminraKu malla'bi-la'bia. Kupammopporangi tau dorakaya siagang tau angngewayA'. Mingka manna nakamma, kasalanna tau toaya laKubalasaki mae ri ana'-ana'na siagang cucu-cucunna, sa'genna jari-jari lapisi' makatalluna siagang makaappa'na.’

PAMMILANGNGANG 14:19

Kamma-kamma anne, o Batara, lanri lompona pangngamaseanTa siagang lanri majarretTa mae ri janjinTa, kupalaki, Kipammopporang laloi dosana anne taua ngaseng, sangkamma le'ba'na Kipammopporang ke'nanga baku' nabokoina ke'nanga butta Mesir.”

PAOLE 9:24

Baku'nu kuasseng, tuli tenana numappilangngeri mae ri Batara.

PAOLE 31:23

Nampa Nakana Batara mae ri Yosua, ana'na Nun, “Paralluko majarre' pa'mai' siagang barani Yosua! Ikau lampimpingi bansa Israel ampatamakki pa'rasangang Kupa'janjianga mae ri ke'nanga, siagang iNakke lantulungko.”

PAOLE 32:5

Mingka ikaumi bansa tenaya namajarre' pa'mai'nu, bansa jaia jekkonna siagang dosana, tenayamo nanibilangngi umma'Na.

KAIMANGNGANG 9:24

Ti'ring Napanaummi Batara pepeka nanakanre sa'genna la'busu' koro'bang nitunua siagang bageang-bageang niaka jannana irate ri tampa' pakkoro'bangnganga. Nacini'na umma' Israel anjo kammaya, a'gora-gora rannumi ke'nanga nampa su'ju' anynyomba.

PAMMILANGNGANG 9:22

Lalang nia'na anjo rammanga irateanganna KemaNa Batara, apaka ruangallo, sibulang, sitaung yareka la'bi, sikamma tomminjo sallona ke'nanga ammantang ri anjo tampaka. Punna nai' anjo rammanga, nampami a'lampa ke'nanga.

PAMMILANGNGANG 16:3

A'lampa ngasemmi siagang ke'nanga mange andallekang ri Musa siagang Harun nampa angkana, “Angganna'mi anjo sikammaya Musa! Sikontu umma' Israel nisa'laki untu' Batara. Nampa niaki Batara ri tangnga-tangngata ngaseng. Mingka angngapa nanukana kalennu la'bi tinggiangangko na umma'Na Batara?”

1 SAMUEL 25:28

Kipammopporangi kacapakkanna atanta. Mattantu Batara laNaangkakki' siagang turunganta a'jari karaeng mae ri Israel, nasaba' a'bundukki' untu' Batara; siagang tena nalakigaukang kaja'dallanga lalang sikontu tallasatta.

PAMMUJI 99:2

Tamaka makoasaNa Batara ri Sion; malompoi irateanganna sikontu bansaya.

PAMMUJI 135:21

Pujimi Batara ri Sion, ri Yerusalem, tampa' pammantanganNa. Pujimi Batara!

YESAYA 33:21

LaNapappicinikangi Batara kala'biranNa mae ri katte. Lattallasakki' ri biring binanga luaraka, tenaya nakkulle nasombali musua.

YO"EL 2:27

Jari nuasseng ngasemmi, he Israel, angkanaya niakKa' ri tangnga-tangnganu, siagang angkanaya iNakkemi Batara, Allata'alanu. Tena Allata'ala maraeng, pantarangannaya iNakke KalengKu. Tenamo nalanipakasiri' poleang ummakKu!”