PA'JARIANG 44:15 - KITTA' MATANGKASA'

¹⁵ Nakanamo Yusuf, “Apa ngaseng anne nugaukanga? Apaka tena ngaseng nuassengi angkana inakke anne akkullei kuasseng ngaseng panggaukang ja'dala'nu lanri nia'na pangngassengangku?”

PA'JARIANG 44:15 Referans Kwoze

KALAPPASSANG 32:1

Ri wattunna nacini' bansa Israel angkanaya sallo dudumi Musa natanaungapa ammotere' Musa battu ri monconga, mingka tuli ammantanna rate, battumi ke'nanga allipungi Harun na nakana ri ia, “Taniassengai angkana apa kajariang ri Musa, anjo tau angngerangaki' assulu' battu ri Mesir; jari papparekammi ikambe se're rewata akkullea ampimpingi ikambe.”

PA'JARIANG 39:8

Mingka taerokai Yusuf. Nakanamo Yusuf ri ia, “Pammopporanga' Ibu'. Le'ba'mi napappirannuang ngaseng Potifar sikontu apa-apanna mae ri nakke. Tenamo naparallu ampikkiriki apa-apa niaka lalang ri anne ballaka.

PA'JARIANG 21:26

Nakanamo Abimelekh, “Takuassengai angkana inai anggaukangi anjo kammaya. Tena le'bakai nupau mae ri nakke; nampami anne kulangngere' anjo passalaka.”

PA'JARIANG 4:10

Nakanamo Batara, “Angngapa nugaukangi anjo panggaukang palla' kammaya? Akkio'-kioki cera'na andi'nu battu rawa ri buttaya, sanrapang sa'ra annuntuka pa'balasa'.

PA'JARIANG 3:13

Akkuta'nammi Karaeng Allata'ala ri anjo bainea angkana, “Angngapa nugaukangi anjo kammaya?” Appialimi angkana, “Nitipua' ri ularaka, sa'genna kukanre anjo rappoa.”

PA'JARIANG 44:16

Appialimi Yehuda angkana, “Apa akkulle nagaukang ikambe karaeng? Antekamma batena ikambe akkulle assassala' yareka ampattojengi kalenna ikambe? Nasungkemi Allata'ala kasalanna ikambe. Kamma-kamma anne ikambe anne a'jari ata ngaseng maki' mae ri katte, karaeng; teai ri ia bawang kipanggappaya anjo cangkiri' peraka.”