PA'JARIANG 24:14 - KITTA' MATANGKASA'

¹⁴ Lakukana sinampe' ri kalase'renna ke'nanga, ‘Tulunga' nanupanaung bongkinu, siagang saresa' je'ne' inung.’ Punna appiali sinampe' angkana, ‘Angnginung maki', siagang untata pole lakusare ngaseng tongi je'ne' inung!’ iaminjo Napile Batara untu' atanTa Ishak. Punna kajariang anjo kammaya, lakuassemmi angkanaya baji' pa'mai'mi Batara mae ri karaengku Abraham.”

PA'JARIANG 24:14 Referans Kwoze

HAKING-HAKING 6:37

Punna kamma padeng, ri tompo'na anne buttaya, iamintu tampa' biasaya napakkattoi ase gandung ikambe, nia'mo bulu gimbala' kupadongko', punna ammuko, na ia bawang anne bulu gimbalaka nabasai je'ne' rammang natena nabasa buttana, iaminjo a'jari butti angkanaya erokKi' ampakea' untu' allappassangi umma' Israel.”

HAKING-HAKING 6:17

Appialimi Gideon angkana, “Punna Nangai tojenga Batara, Kisarema' se're pammatei manassana angkanaya Batara memang amparentakangi anne passuroa mae ri nakke.

PA'JARIANG 15:8

Mingka akkuta'nammi Abram nakana, “O Batara Kaminang Tinggia, antekamma batena nakkulle kuasseng angkanaya inakke lampatangi anne buttaya?”

YESAYA 7:11

“Palaki sollanna nasareko pammatei Karaeng Allata'alanu, tanranna battua irawa ri lino kamateanga yareka tanra battu ratea ri langika.”

PANGNGEBARANG 19:14

Ballaka siagang barang-baranga akkullei nagappa battu ri manggena, mingka baine cara'deka iami passareNa Batara.

2 SAMUEL 5:24

Punna nulangngere' sa'ra tau a'barrisika irate ri coppo'na anjo poko'-pokoka, maju mako, nasaba' iNakke la'jappa ri dallekannu untu' ambetai tantara Filistin.”

HAKING-HAKING 18:5

Nakanamo ke'nanga ri ia, “Punna kamma padeng, tulunsai ikambe nukkuta'nang mae ri Allata'ala, maka la'matu-matuji anne pa'lampanna ikambe yareka tena?”

ROMA 1:10

Sanna'mi kupala'na ri Allata'ala, tapporo Nakellaia' battu angkunjungi ngasengko.

2 SAMUEL 20:9

Angkanai Yoab mae ri Amasa, “Antekamma kabaraka gang?” Nampa nata'gala' janggo'na Amasa siagang lima kananna, sangkamma angkanaya eroki ambaui.

1 SAMUEL 20:7

Punna nakana karaenga, ‘Baji'mi,’ laamammi kusa'ring. Mingka punna larroi, assemmi angkanaya le'ba'mi napattantu ma'nassa erokka' nacilakai.

PA'JARIANG 24:44

Punna eroki assarea', nampa nasare todong angnginung sikamma untaku, iaminjo poro Napilea Batara untu' a'jari bainenna ana'na anjo karaengku.’

PA'JARIANG 24:13

Kicinikia', niakka' ammenteng ri ampi'na anne bungunga. Sinampe' mami nania' tuloloa battu ri kotaya untu' angngalle je'ne'.

PA'JARIANG 24:15

Ilalang appala' doanna anjo, nia'mi battu Ribka, iamintu sitau tulolo sannaka ga'gana, angngerang bongki irate ri salangganna mange anjoreng ri bungunga. Iami ana'na Betuel. Na ia tau toana anjo Betuel iamintu Nahor siagang Milka. Na anjo Nahor, iami daenna Abraham. Mangemi Ribka anjoreng ri bungunga nampa nabonei bongkina, nampa a'jappa ammotere'.

PA'JARIANG 24:18

Appialimi anjo tuloloa angkana, “Angnginung maki' bapa',” nampa napanaung linta' bongkina battu ri salangganna. Nata'gala'mi anjo bongkia nampa nasare angnginung anjo suroa.

PA'JARIANG 24:19

Le'baki angnginung anjo suroa, nakanamo anjo tuloloa, “Erokka' anynye'ro' je'ne' nampa kusare todong je'ne' inung sikamma untata, sollanna akkulle angnginung ngaseng anjo olo'-oloka sa'genna bassoro'.”

PA'JARIANG 24:43

Tuli lammentengku anrinni ri ampi'na anne bungunga. Punna nia' se're tulolo battu untu' angngalle je'ne', lakupalaki ri ia sollanna nasarea' je'ne' inung.