PA'JARIANG 22:9 - KITTA' MATANGKASA'

⁹ Battui ke'nanga mange ri anjo tampa' le'baka Napau Allata'ala ri Abraham, ambangummi se're tampa' pakkoro'bangngang siagang napa'lonjo'mi anjo kayu tunuanga irateanganna. Nampa nasikko' anjo ana'na siagang napara'ba ri anjo tampa' pakkoro'bangnganga, ri tompo'na anjo kayu tunuanga.

PA'JARIANG 22:9 Referans Kwoze

YAKOBUS 2:21

Ciniki anjo boe-boeta Abraham. Nitarima bajiki ri Allata'ala lanri panggaukanna, iamintu ri wattunna napassareang ana'na, iamintu Ishak, mae ri Allata'ala irate ri tampa' pakkoro'bangnganga.

1 PETRUS 2:24

KalenNa Almasi ampisangi sikontu dosa-dosata irate ri kayu sallika, sollanta akkulle bebasa' battu ri kakoasanna dosaya, siagang nakiattallasa' situru' ero'Na Allata'ala. Loko'-loko'Nami Almasi ampamolleko ri garrinnu.

IBRANI 9:28

Kammatommi anjo Almasi. Sikaliji bawang nipassareang a'jari koro'bang, najai tau Natangkasi dosana. Labattu poleangi makapinruanna. Mingka teaimi untu' antanggongi dosaya; passangalinna untu' ampasalamaki sikamma tau antayangai kabattuanNa.

EFESUS 5:2

Paralluko attallasa' lalang ri pangngamaseanga, sangkamma todong Almasi mangngamaseangi mae ri katte. Nakoro'bangkangi KalenNa untu' ikatte, a'jari passare siagang koro'bang mabau', Nakarannuanga atinNa Allata'ala.

GALATIA 3:13

Mingka le'ba' maki' Napakabella Almasi battu ri pangngalarroiNa Allata'ala lanri hukkung-hukkung agamaya. Napassareammi KalenNa nituju ri pangngalarroia passabakkang ikatte. Nasaba' nia' tattulisi' lalang ri Kittaka angkanaya, “Cilakami tau mate nigentunga irate ri kayu sallika.”

LAMPA-LAMPANA 8:32

Iaminne anjo aya'-aya' nabacaya ri Kittaka, “Sanrapangi gimbala' nieranga lamange nisamballe, sanrapangi ana' gimbala' tenaya nassa'ra punna nigoncingi bulunna, kamma tomminjo tamakkana-kanana.

MARKUS 15:1

Ri bari'basa' dudua akkaro-karomi sipa'bicara sikontu hakinga ri Pangadelang Agamaya siagang imang-imang kapalaya, pamimping-pamimpinna tu Yahudia kammayatompa guru-guru agamaya. Nasikko'mi ke'nanga Isa nampa naerang mange napassareang ri Pilatus.

MATIUS 27:2

Nasikko'bokomi Isa, nampa naerang ke'nanga mange napassareang ri Pilatus, wakkele'na pamarenta Roma.

PAMMUJI 118:27

Batarami Allata'ala, malammoro' pa'maiki mae ri katte. Maju mako a'barrisi' siagang tangke kayu ri limannu, siagang kulilingi tampa' pakkoro'bangnganNa Batara.

PA'JARIANG 12:7

Napappicinikammi KalenNa Batara mae ri Abram na Nakana ri ia, “Iaminne pa'rasangang laKupassareanga mae ri sossorannu.” Nampa ambangummo Abram se're tampa' pakkoro'bangngang anjoreng untu' Batara, ia le'baka ampappicinikangi KalenNa mae ri ia.

PA'JARIANG 8:20

Appaentemmi Nuh se're tampa' pakkoro'bangngang ri Batara. Nampa angngallemi tassikayu-kayunna massing tassirupaya jangang-jangang siagang olo'-olo' maraengannaya ia hallalaka, nampa napassareang a'jari koro'bang nitunua irate ri anjo tampa' pakkoro'bangnganga.

PA'JARIANG 12:8

Le'baki anjo napatulusu'mi jappana a'lampa timboro', ri daera a'bontoa irayanganna kota Betel nampa akkema ri alla'na kota Betel siagang kota Ai. Betel ilaukang siagang Ai irayangngang. Ambangung tommi anjoreng tampa' pakkoro'bangngang nampa anynyomba ri Batara.

PA'JARIANG 13:18

Le'baki anjo napalette'mi kema pa'ballakkanna Abram, nampa mange ammantang ri ampi'na poko'-poko' kayu karamaka, iamintu tampa' passambayangang ri Mamre ri ampi'na Hebron. Nampa ambangummo anjoreng tampa' pakkoro'bangngang untu' Batara.

PA'JARIANG 22:8

Appialimi Abraham angkana, “KalenNa Allata'ala lampasadiai anjo ana' gimbalaka.” Nampa napatulusu' lampana ke'nanga.

PA'JARIANG 22:10

Le'baki anjo, naallemi ladinna naero' nasamballe anjo ana'na.

1 KARAENG-KARAENG 18:33

Nasusungimi kayu tunuang irateanna anjo tampa' pakkoro'bangnganga, nampa napolong-polong anjo sapi sikayua siagang napadongko' irateanna anjo kayua. Nampa nakana, “Bonei je'ne' appa' katoang sa'genna rassi, nampa tumpai anjo je'neka irateanna anjo koro'banga siagang kayua.” Le'baki nagaukang ke'nanga anjo kammaya,