NEHEMIA 5:15 - KITTA' MATANGKASA'

¹⁵ Sikamma guburnur rioloangnganga nainakke, nabattalli ra'yaka lanri natuntuki ke'nanga battu ri ra'yaka 40 jaina doe' pera' lalanna siallo untu' kanre siagang anggoro'na ke'nanga. Ba'lalo, manna pagawe-pagawena ke'nanga najallakkang tonji ra'yaka. Mingka inakke taeroka' appakamma lanri mallaka' ri Allata'ala.

NEHEMIA 5:15 Referans Kwoze

NEHEMIA 5:9

Nampa kukanamo pole, “Kodi anjo panggaukannu! Mustina mallakko lalang tallasa'nu mae ri Allata'ala. Lanri kammana, anjo musunta tenaya allata'alana, tenamo nusarei kasampatang untu' anghinaki'.

YESAYA 50:10

He ikau ngaseng ampakalompoai Batara, siagang ampilangngeriai kananna atanNa, nakulle sassangi agang nuoloa, siagang tena caya ansingariko; mingka tappa' laloko mae ri Batara; tanjengko mae ri Allata'alanu.

PANGNGEBARANG 16:6

Tau tenaya namminra nyawana mae ri Allata'ala lanipammopporangi; tau mappilangngeria lanipalili battu ri sikontu kaja'dallanga.

2 KORINTUS 11:9

Punna kakuranganga' anjo wattua, tena le'bakai nia' tau battu ri kau kususai manna sitau. Sikamma apa-apa kuparalluanga napa'ganna' ngasengi sari'battang battua ri jama'ah Makedonia. Kukatutui sollanna tena nakususaiko, manna na passala' kaparalluang apa-apa mamo. Na tuli kukatutuina anjo kammaya.

MATIUS 5:47

Na punna agannuji bawang nujamakki, apa la'bina kabajikannu? Kamanna tau kapereka nagaukang tonji kammaya.

AYUB 31:23

Tena kula'gau' kammanjo, saba' hukkunganNa Allata'ala sanna' Napakamalla'na pa'maikku.

2 KORINTUS 12:13

Ri passala apaya nukurang nijampangi sangkamma jama'ah-jama'ah maraenga? Kaminang jaina ri passala' iaji anne: Angkanaya tena nakususaiko untu' angngongkosia'. Pammopporanga' ri anjo kasalangku!

PANGNGEBARANG 29:12

Punna naparhatikang pamarentaya kabara' balle-ballea, la'jari ja'dala' ngasengi sikontu pagawena.

PAMMUJI 147:11

Ia Nangaia Batara iamintu tau mappilangngeria, tau tuli manrannuanga ri pangngamaseanNa.

PAMMUJI 112:1

Pujimi Batara! Mate'nei tau mappilangngeria, mangngaia ri sikamma parentaNa Batara.

1 SAMUEL 8:15

Kokonnu siagang koko anggoro'nu lanapitabai sima, iamintu bage sampulona battu ri wassele'na, nampa napassareang mange ri sikamma perwira tantarana siagang sikamma pagawena.

PA'JARIANG 20:11

Appialimi Abraham angkana, “Kupikkiriki angkanaya tena sikali tau malla' ri Allata'ala anrinni, sa'genna akkullea' nabuno taua ia eroka mae ri bainengku.

PA'JARIANG 42:18

Ri makatalluna alloa nakanamo Yusuf ri ke'nanga, “Inakke tau mallaka' siagang tau mannurukia' ri Allata'ala. Lakulappassangko, mingka nia' se're sara'na.

NEHEMIA 5:16

Sikontu pakkulleku kupamange ngasengi ri usaha untu' ambangungi anjo temboka nampa tena kunggappa tampa' manna sike'de' a'jari pa'balasa' mae ri nakke, manna pole nasikontu pambantuku anjama tongi untu' anjo pambangunanga.

YEREMIA 32:9

Jari kuballimi anjo tampaka battu ri Hanameel, sampulo antuju doe' pera' ballinna. Akkio'ma' siapa are sa'bi, siagang ri dallekanna ke'nanga kutekemmi sura' pammallina, nampa kusare segele' siagang kutimbangi doe'na.

PIRAUNG 5:8

Niparentai ikambe ri tau siratanga a'jari ata; natena tau makoasa allappassangi ikambe battu ri kakoasanna ke'nanga.