MIKHA 7:17 - KITTA' MATANGKASA'

¹⁷ Lakkaloloki ke'nanga ri buttaya rapang ulara'. Mallaki siagang annekkereki ke'nanga lassulu' battu ri pattahanganna ke'nanga, nampa battu mae ri Katte, o Karaeng Allata'alana ikambe.

MIKHA 7:17 Referans Kwoze

YESAYA 49:23

Sikamma karaenga larapangi mangge mae ri kau, na sikamma karaeng bainea a'jari amma' mae ri kau. La'su'juki ke'nanga ampakalompoko siagang napakatuna kalenna mae ri kau. Na lanuassemmo angkanaya iNakke anne Batara; tau manrannuanga ri Nakke tena nala'ba pa'mai'na.”

PAMMUJI 72:9

Pandudu' parang lompoa latunduki mae ri ia na su'ju' musua ri dallekang bangkenna.

PAMMUJI 18:45

Bansa-bansa maraenga tunduki mae ri nakke na mannuruki punna nalangngere' parentaku.

PAPPICINI' 3:9

U'rangi anne: Anjo tau a'jaria umma'na Billisika, paballe-balle nakanaya kalenna tu Yahudi, na sikontutojenna teai, laKupakkulantuki assu'ju' ri dallekannu ngaseng. Nalanaasseng ke'nanga angkanaya Kukamaseang ngasengko.

ZAKHARIA 14:5

Lalariko allalo ri anjo lappara' ka'bung ambage ruayai anjo buluka. Lalariko sangkamma boe-boenu ri wattunna ta'ge'goso' buttaya ri wattu ammarentana Uzia, iamintu karaenna Yehuda. Nampa battu Karaeng Allata'alaku, nirurungang ri sikontu malaekaka.

PIRAUNG 3:29

Parallui nipakatuna kalenta na nipassareang kalenta lanri nia'na ija panrannuang.

YEREMIA 33:9

Yerusalem la'jari karannuangKu siagang kalompoanna nyawaKu. Sikontu bansaya ri lino la'jari mallaki siagang annekkereki kammayatompa lappakalompoi ri Nakke, punna nalangngereki passala'na kabajikang Kugaukanga untu' pandudu'na Yerusalem, siagang kakalumanynyangngang Kupassareanga mae ri anjo kotaya.”

YEREMIA 16:16

Nakana Batara, “LakkiokKa' jai paboya juku' untu' anjakkalaki anne taua. Nampa lakkiokKa' jai pasoso' untu' assosoki ke'nanga ri sikamma monconga siagang buluka, siagang ri sikamma leang-leang batua.

YESAYA 65:25

Serigalaya siagang gimbalaka lasiagangi sipa'rukukang; singaya angnganre rarame sangkamma sapi, siagang ularaka tenamo bahayana. Ri sikontu bulu' matangkasakKu, tenamo lappakarugi siagang a'gau' ja'dala'.”

YESAYA 64:2

rapang pepe' amparinrayai kayua siagang ampa'rereai je'neka. Kipa'nyatami koasaTa mae ri musu-musunTa, sa'genna annekkere' bansa-bansaya ri dallekanTa.

YESAYA 60:14

Ana'-ana'na tau anjallakkangiako battui su'ju', ia le'baka anghinako la'dundui, lanigallarakko ‘KotaNa Batara’, ‘Sion, Kota Allata'ala Matangkasa'na Israel’.

YESAYA 59:19

KoasaNa siagang kala'biranNa lanakamallakkangi sikontu taua battu raya sa'genna kalau'. Labattui rapang binanga sarringa lo'loro'na, nipammarrunga ri anging kancang.

YESAYA 25:3

LanipujiKi' ri bansa-bansa makassaka, siagang lanikamallakkangKi' ri kota-kotana sikamma bansa pallaka.

PAMMUJI 9:20

Ammenteng maKi', o, Batara, adelimi bansa-bansaya, teaKi' lappassangi taua ampakaborroi kalenna.

1 SAMUEL 14:11

Ri wattunna napappicinikang kalenna ke'nanga mae ri tu Filistin ri anjo balla' jagaya, nakanamo anjo tu Filistinga, “Ciniki, nia' tu Ibrani assulu' battu ri kali'bong paccokkoanna!”

YOSUA 9:24

Appialimi ke'nanga angkana, “Nappakamma anjo ikambe lanri nalangngere'namo ikambe angkanaya anjo Karaeng Allata'ala kisombaya le'ba'mi Nasuro Musa, anjo atanNa, ampassareangi mae ri katte sikontu anne pa'rasanganga siagang ambunoi sikontu pandudu'na ri wattunna kialle anjo buttaya. Malla' dudumi ikambe angkana gassingka kibunoi ikambe; iaminjo saba'na nanagaukang ikambe sikammaya anne.

PAOLE 32:24

Lamatei ke'nanga lanri rammusu' na kacipurang, nialle ri kamateang lanri garring appakamalla'. Battui a'bakka olo'-olo' sekkeka, ulara' a'racunga ampakkunrarengi ke'nanga.

2 SAMUEL 22:46

Lanynya'mi kabaranianna ke'nanga; annenremmi siagang assulu'mi ke'nanga battu ri paccokkoanna.

2 PATTOTTORANG 17:10

Napa'jari malla' kabusuki Batara sikontu kakaraengang niaka ri tammulilina Yehuda untu' a'bundu' angngewai Karaeng Yosafat.

PAMMUJI 72:11

Sikontu karaenga lasu'juki ri dallekanna, sikontu bansaya a'jari ata-atanna.