MIKHA 4:13 - KITTA' MATANGKASA'

¹³ Nakana Batara, “He pandudu'na Yerusalem, a'lampamako mange angngonjo'-onjokangi musunnu! LaKupakagassingko rapang sapi attanru' bassia siagang akkanuku tambagaya. Lanuancuruki jaia bansa, siagang kakalumanynyangngang wassele' narampasaka ke'nanga lanupassareangi mae ri Nakke, Batarana sikontu linoa.”

MIKHA 4:13 Referans Kwoze

DANIEL 2:44

Ri wattu ammarentana anjo sikamma karaenga, Allata'ala ri suruga lappaentengi se're kakaraengang lattahanga satunggu-tungguna siagang tenaya nakkulle lanibeta ri manna bansa battu kemae. Anjo kakaraenganga lanaancuru' tabasikali anjo sikamma kakaraengang maraenga.

YESAYA 23:18

Passawallang siagang gaji nagappaya talanabolikai, mingka lanapassareangi mae ri Batara. Sikamma tau anynyombaya mae ri Batara lanapakei anjo doeka untu' ammalli care-care siagang kanre naparalluanga ke'nanga.

YESAYA 18:7

Nia' sallang se're wattu nanipassareang passarea battu ri anjo pa'rasangang nilaloia ri sikamma binangaya mae ri Batara Kaminang Makoasaya, battu ri bansana makassaka siagang barania, battu ri sikamma tau tinggia siagang alusuka kalenna na nikamallakkanga ri sikontu linoa. Labattu ngasengi ke'nanga mange ri Bulu' Sion, ri tampa'Na Batara Kaminang Makoasaya nisomba.

1 KORINTUS 16:2

Punna allo Minggu, iamintu allo bungasaka, paralluko massing assare doe', situru' massing panggappanu. Boliki anjo doeka sa'gengku battu, sollanna punna battua', tenamo naparallu nipasse're pole.

ZAKHARIA 6:5

Appialimi angkana, “A'lampai ke'nanga mae ri appaka oloang ri wattu le'ba'na ke'nanga andallekang mae ri Batarana sikontu linoa.

ZAKHARIA 4:14

Nakanamo, “Iaminjo battuanna ruaya tau le'baka Napilei Batarana sikontu linoa siagang nijo'joka untu' a'jari palayanNa.”

YEREMIA 51:33

Tasalloami nanibeta ke'nanga siagang nionjo'-onjokang ri musua rapang gandung ri tampa' panggilinganga. INakke, Batara Kaminang Koasaya, iamintu Allata'alana Israel, anne akkana.”

PAMMUJI 68:29

Natuntuki Allata'ala kagassingannu; o, Allata'ala, pakajarreki apa le'baka Kigaukang mae ri kambe.

YOSUA 6:19

Sikontu barang-barang pera', bulaeng, tambaga, siagang bassia musti nisa'laki untu' Batara, nampa niboli' ilalang ri tampa' pammolikang barang-baranNa Batara.”

YESAYA 5:28

Ciduki ana' panana na sadiamo anrong panana ero' appabuccu'. Kanuku jaranna kamma batu pepe' terasa'na, siagang roda karetana tapputaraki rapang anging puttusu'.

PAMMUJI 72:10

Sikamma karaeng Tarsis siagang pulo-pulona langngerangi passare mae ri ia. Sikamma karaeng Arab siagang Etiopia battui angngerang passare.

PAOLE 33:25

Nila'langngi pakke'bu' lompo tambaga siagang bassi kota-kotana sollanna tuli salewangang tojeng-tojeng lalang tallasa'na.”

YESAYA 21:10

He bansaku Israel! Le'ba' mako nilissarrang siagang nionjo'-onjokang rapang lisere'-lisere' gandung. Kamma-kamma anne kupabattuangko kabara' baji', ia kulangngereka battu ri Batara Kaminang Makoasaya, Allata'alana Israel.

YEREMIA 51:20

Nakana Batara, “Babel, ikau rapangko palu-palu, sanjataKu untu' a'bundu'. Kupakeko antunrungi bansa-bansaya siagang sikamma kakaraenganga.

HOSEA 10:11

Riolo Israel sanrapangi sapi rungka le'baka nilati baji', na nangai allessoroka gandung. Tena naparallu Kusarei pisangngang salangganna ga'gaya. Mingka kamma-kamma anne le'ba'mi Kupattantu angkanaya musti anjama battalaki. Kusuroi Yehuda appa'jeko, siagang Israel Kusuroi a'nangkala.

HABAKUK 3:12

Lalang larroTa naKijappai sikontu buttaya; bambang nyawaTa angngonjo'-onjokangi bansa-bansaya.

PAMMUJI 24:1

Pammujina Daud. Batara pata sikontu linoa siagang bonena, linoa siagang sikontu ammantanga ilalang.

MIKHA 5:7

Tu Israel niaka ija ammantang ri alla'na bansa-bansaya lakontui singa ri tangnga-tangngana olo'-oloka ri romanga yareka ri tangnga-tangngana gimbalaka ri parang rukuka. Anjo singaya antamaki ri tangnga-tangngana anjo lokoang gimbalaka na naonjo'-onjokang siagang nakae-kae; tena akkulle allappassangi anjo sikamma gimbalaka.

ZAKHARIA 12:3

Mingka punna ta'rapi'mo anjo alloa, laKupa'jari Yerusalem sanrapang batu battalaka; manna pole bansa battu kemae ancobai angngangkaki langgappai bala. Sikontu bansaya ri lino lanapa'jari se'rei kalenna untu' ambunduki Yerusalem.

ZAKHARIA 12:6

Anjo alloa sikamma kaluarga Yehuda laKupa'jari rapang pepe' lalang ri pa'gompoang kayu tunua yareka sulo a'rinraya irawanganna gandung-gandung nikawarranga; lanaancuruki ke'nanga sikamma bansa-bansa niaka ri tammulilina. Mingka pandudu'na Yerusalem tuli ammantangi lalang ri kotaya siagang amang.