MATIUS 9:27 - KITTA' MATANGKASA'

²⁷ A'lampami Isa battu anjoreng ri tampaka. Na ri tangngana aganga, nia'mo rua tau buta ampinawangi. Akkio'-kioki ke'nanga angkana, “O, Ana'na Daud, Kikamaseangi ikambe anne!”

MATIUS 9:27 Referans Kwoze

MATIUS 15:22

Nia'mo sitau baine tu Kanaan niaka anjoreng ri daeraya battu mae ri Isa akkiok-kio' angkana, “O Ana'na Daud, Kikamaseanga'! Napantamakki setang ana' baineku. Sanna' dudumi sessana!”

MATIUS 11:5

accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, kammayatompa nibirittakammi Kabara' Baji' battua ri Allata'ala mae ri tu kasi-asia.

MATIUS 17:15

Angkanami anjo taua, “O Bapa', Kikamaseang laloi anakku. Natabai garring mate-mate jangang. Nateai sipato' sanna'na garrinna. Pammate sanna'na garrinna sa'genna biasai tu'guru' antama' ri pepeka yareka antama' ri je'neka.

YOHANES 7:42

Kania' tattulisi' lalang ri Kittaka angkanaya anjo Karaeng Mappasalamaka sossoranna Daud siagang labattu anjorengi mae ri Betlehem, iamintu kamponna Daud.”

LUKAS 7:21

Anjo wattua, sitabangi jai tau Naballei Isa, siagang jai roh ja'dala' Nabongka; kammayatompa jaimi tau buta Napa'jari accini'.

MARKUS 11:10

Ammenteng kassa'mi pamarentahanNa labattua, pamarentahanna Daud boeta. Pujimi Allata'ala Kaminang Tinggia!”

MARKUS 9:22

A'mole-molemi anjo roh ja'dalaka ero' ambunoi, naalle natu'gurang antama' ri pepeka siagang antama' ri je'neka. Mingka punna akkulleKi' antulungi, Kikamaseang sai siagang Kitulung sai!”

MATIUS 21:9

Nampa a'jappa anjo tau jaia ri dallekanNa siagang ribokoNa Isa. Akkiok-kio'mi ke'nanga angkana, “Nipakalompoi Ana'na Daud! Nibarakkakimi battua lalang arenNa Batara! Nipujimi Allata'ala Kaminang Tinggia!”

MATIUS 1:1

Iaminne pattottorang boe-boeNa Isa Almasi, sossorang battua ri Daud, siagang sossorang battua ri Abraham. Punna nisusungi battu ri Abraham sa'genna Daud, iaminne areng-arenna ke'nanga:

MATIUS 21:15

Mingka larromi imang-imang kapalaya siagang guru-guru agamaya nacini'na Nagaukang Isa anjo gau' appakalannasaka. Larro tommi ke'nanga nalangngere'na ana'-anaka akkiok-kio' lalang ri Balla'Na Batara angkana, “Nipakalompoi Ana'na Daud!”

ROMA 9:5

Iami ke'nanga sossoranna boe-boeta. Battu ri bansanami ke'nanga assala' kabattuanNa Almasi, ri wattu battuNa a'jari ma'rupatau ri lino. Iami kaminang mala'biri' ri sikontuna taua. Nipujimi Allata'ala satunggu-tungguna! Aming.

LUKAS 20:41

Akkuta'nangi Isa ri ke'nanga Nakana, “Antekamma nakkulle nikana angkanaya anjo Karaeng Mappasalamaka sossoranna Daud?

LUKAS 17:13

na'gora angkana, “O, Isa! O, Batara! Kikamaseangi anne ikambe!”

ROMA 1:3

Naia bonena anjo Kabara' Bajika iamintu ri passala'na Ana'Na Allata'ala, Batara Isa Almasi. Lalang rupatauna, Iami sossorang battu ri Daud;

MATIUS 9:28

Ri wattunna antama' Isa ri se'reang balla', battumi anjo ruaya tau buta mae ri Isa. Akkuta'nammi Isa ri ke'nanga Nakana, “Maka nupatappaki angkanaya akkulleko Kubajiki sa'gennu accini'?” Appialimi ke'nanga angkana, “Iye' tappaki ikambe!”

MATIUS 20:29

Ri wattunna nabokoimo ke'nanga Yerikho, jaimi tau amminawang ri Isa.