MATIUS 16:4 - KITTA' MATANGKASA'

⁴ Teai sipato' ja'dala'na siagang dorakana ngaseng taua ri anne jammanga. NusuroA' anggaukangi gau' appakalannasaka. Mingka manna sirupa gau' appakalannasa' tena todong lanipicinikiangko, pantaranganna gau' appakalannasa' le'baka kajariang ri kalenna Na'bi Yunus.” Le'baki akkana kamma Isa, a'lampami ambokoi ke'nanga.

MATIUS 16:4 Referans Kwoze

YUNUS 1:17

Lalanna anjo wattua appabattumi Batara sikayu juku' sannaka lompona angnga'luki Yunus. Jari ammantammi Yunus lalang ri battanna anjo jukuka tallu allo tallu bangngi.

MARKUS 8:38

Punna nia' tau siri'-siri' angngakuiA' siagang pangngajarangKu ri anne jammang sannaka dorakana siagang ja'dala'na, tena todong Naero' Ana' Ma'rupataua angngakui sallang punna battui siagang koasaNa ManggeNa, nirurungang ri malaeka'-malaeka' matangkasa'Na.”

MARKUS 8:12

Akkunraremmi Isa nampa appiali Nakana, “Apa saba'na anne taua ri jammanga nasuroA' appa'nia' gau' appakalannasa'? Tena! Tena nalaKupa'niakkang pammatei kammaya ke'nanga!”

MATIUS 15:14

Tea' mako jampangi anjo tu Farisia. Anjo ke'nanga sangnging pamimping-pamimping buta. Na punna tau buta ammimping tau buta, tena tatu'guru'na rua-rua naung ri solonganga.”

PA'JARIANG 6:3

Nakanamo Batara, “Tena naKupa'biangi rupataua attallasa' satunggu-tungguna; musti matei ke'nanga. Appakkaramula ri kamma-kammaya anne tenamo nakkulle la'bi ri 120 taung umuru'na.”

LAMPA-LAMPANA 18:6

Mingka lanri tuli nigeakkinna siagang tuli nicallana Paulus ri taua, napatu'du'mi bangkenna siagang napaba'basa'mi pakeanna sollanna a'lesang limbu'bu'na; iaminjo a'jari pammatei siagang pappakainga' ri kasalanna ngaseng ke'nanga. Nakanamo Paulus, “Punna cilakako, passala' kasalannu ngaseng tonji! Pantarang limangkuko! Pakkaramula ri kamma-kammaya anne la'lampa mangema' ri bansa-bansa maraenga.”

HOSEA 9:12

Mingka manna pole nania' ana'-ana' nilassukang siagang nipakalompo, laKuallei ke'nanga; tena manna sitau laKulappassang attallasa'. Cilaka ngaseng mako ikau, he bansa Israel, punna Kubokoi ngaseng mako!”

HOSEA 4:17

Umma' Israel niallemi pa'mai'na ri barhalaya. Lanri kammana anjo lappassammi ke'nanga kamma.

LAMPA-LAMPANA 2:40

Kammaminjo napakasingaraka Petrus mae ri ke'nanga. Siagang ilalang a'rupa-rupa bicara maraengang, napakainga' tommi ke'nanga sollanna napakabella kalenna ke'nanga battu ri anne bansa ja'dalaka laNahukkunga sallang Allata'ala.

YESAYA 57:3

Mingka ikau ngaseng tau dorakaya, battu mako mae untu' niadeli! Tena nubajikangngang na pabale'-bale' mataya, siagang tau nangaia a'gau' bawang kammayatompa baine pagau' salaya!

YUNUS 1:1

Ri se'reang allo a'bicarai Batara mae ri Yunus, ana'na Amitai.

MATIUS 16:5

Wattunna battumo ana'-ana' gurunNa Isa ri ba'leanna tamparanga nampami naasseng angkanaya nakaluppai ke'nanga angngerang roti.