MARKUS 9:43 - KITTA' MATANGKASA'

⁴³ Punna passala' limannu nu'gau' dosa, polongi anjo limannu assala' salamakko, kala anggannaka rua limannu mingka antamakko ri naraka, ri pepe' a'rinraya satunggu-tungguna. [

MARKUS 9:43 Referans Kwoze

MATIUS 25:41

Nampa Nakana anjo Karaenga mae ri tau niaka ri sa'ri kairinNa, ‘Bellako anrinni, ikau ngaseng tau ja'dalaka! Antama' mako ri pepe' a'rinraya satunggu-tungguna, le'baka napasadiangko Billisika siagang sikamma malaeka'na!

IBRANI 12:1

Jari, ri passala'na ikatte, jai sa'bi angkulilingiki'! Lanri kammana mae mako, nanipela' ngaseng sikontu apa-apa ambattaliaki' siagang sikontu dosa tuli a'dakkika ri katte. Siagang mae mako nakituli appa'lumba mange ri dallekang.

MATIUS 5:22

Mingka anne kamma Kukana ri kau ngaseng, inai-nai larro ri paranna tau, laniadeli sallang; siagang inai-nai ampali'boi paranna tau musti niadeli ri dallekanna Pangadelang Agamaya. Siagang inai-nai ampakkanai paranna tau, ‘Tolo,’ siratangi nipela' antama' ri pepe'na narakaya.

GALATIA 5:24

Inai-nai a'jarimo taunNa Almasi, matemi sipa'-sipa' rupatauna siagang sikamma ero' napasu rupatauna.

MATIUS 3:12

Nia'mi pa'dinginga lalang limanNa, eroka Napake antapi sikontu berasaka sa'genna tangkasa'. Sikontu berasaka laNaboliki lalang ri pammolikanna, mingka sikamma awanga laNatunui lalang ri pepe' tenaya nalammari rinrana.”

TITUS 2:12

Anjo lammoro' pangngamaseanNa Allata'ala eroki angngajarakki' sollanna tenamo nasisala katallassanta siagang ero'Na Allata'ala, siagang tenamo naniturukiang kaerokanna pakkalinoanga. Niajarakki' sollanta niasseng ampakalewai kalenta, lambusu' siagang anynyomba mae ri Allata'ala lalang ri katallassanta.

KOLOSE 3:5

Lanri kammana, bunomi sikontu ero' pakkalinoannu, tuli ansusaiyai kalennu; kammaya pa'gau' bawanganga, kabamballanga, hawa napasua, cinnaya a'gau' ja'dala', siagang kangoang (nasaba' anjo angngoaya sangkammai siagang anynyombaya barhala).

ROMA 8:13

Nasaba' punna niturukiang ero'na sipa'-sipa' rupataua ma'nassa lamateko; mingka punna lanri koasaNa RohNa Allata'ala natuli nupamate panggaukang-panggaukang dosanu, ma'nassa lattallasakko.

LUKAS 14:13

Jari punna langnganre-nganreko, undammi tu kasi-asia, tu sala-salanga, tu pesoka, siagang tu butaya.

1 PETRUS 2:1

Lanri kammana, pela'mi sikontu apa ja'dalaka battu ri kalennu; tea' mako a'balle-ballei pole, siagang tea' mako assara-sarai. Teako pakimburui, siagang teako hinai parannu tau.

1 KORINTUS 9:27

Kupassareangi kalengku nilati terasa' sa'gengku akkulle a'jari kassa'. Ia nakuappakamma anjo sollanna tena nakajariang angkanaya inakke angkioki taua amminawang appa'lumba nakalengku nisorongboko.

LUKAS 14:21

Jari ammotere'mi anjo palayanga ampauangi karaenna angkanaya takkulleai ke'nanga battu. Sanna'mi larrona anjo karaenga. Nampa nakanamo ri palayanna, ‘A'lampako linta' mange ri agang-agang lompoa siagang ri agang-agang sepe'-sepeka ri kotaya. Kioki siagang erangi mae anrinni tau kasi-asia, tau sala-salanga, tau butaya, siagang tau pesoka.’

YESAYA 1:31

Rapangi rarame akkanrea lanri nitaba ri racci' bara pepe', kamma tomminjo sikamma tukoasaya lanipanraki lanri panggaukang-panggaukang kalenna tonji ke'nanga, iamintu kaja'dallanna ke'nanga. Nampa tena tau akkulle ampamari anjo kaancuranna.

YEREMIA 4:4

Ta'gala' jarreki janjinnu siagang iNakke, Batara, siagang sa'laki kalennu untu' iNakke, he pandudu' Yehuda siagang Yerusalem. Punna tena, lallumpai larroKu siagang la'rinrai rapang pepe' tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja'dala'nu.”

MATIUS 17:27

Mingka takkulleaki' ansusai nyawana anjo taua. Jari a'lampamako mange ammekang ri tamparanga. Allei juku' uru nubantunga. Nia' doe' lanugappa lalang ri bawana anjo jukuka, anggannaka lanipa'bayarrang sima sipa'rua! Allei anjo doeka, nampa nubayara' simata mange ri Balla'Na Batara!”

MARKUS 9:44

Anjoreng takkulleai mate rinrana pepeka, siagang takkulleai mate oloka.]

LUKAS 3:17

Nia'mi lalang limanNa pa'dinginga, untu' laNapake antapi sikamma berasaka sa'genna tangkasa'. LaNapasse'rei berasaka lalang ri pammolikanna; mingka awanga laNatunui ri pepe' tenaya nalammari rinrana!”