MARKUS 5:13 - KITTA' MATANGKASA'

¹³ Niturukiammi ri Isa. Jari assulu'mi anjo roh-roh ja'dalaka, nampa antama' anjoreng ri bawi-bawia. Anjo bawia nia' ruassa'bu jaina. Lari ngasemmi anjo bawia, nampa a'lumpa' battu ri birinna ta'binga naung ri tamparanga, sa'genna tallang ngaseng.

MARKUS 5:13 Referans Kwoze

AYUB 2:6

Nakanamo Batara mae ri lapung Panggoda, “Baji'mi, gaukammi apa eroka nugaukang mae ri Ia, assala' teako bunoi.”

PAPPICINI' 20:7

Punna le'ba'mo anjo wattu sisa'bua taung, lanilappassammi anjo Billisika battu ri tarungkua,

PAPPICINI' 9:11

Nia' karaenna, amparentayai ke'nanga; na anjo karaenna ke'nanga iamintu malaeka' anjagayai tubiri'na kamateanga. Arenna ilalang bicara Ibrani iamintu Abadon; na lalang bicara Yunanina iamintu Apolion (battuanna “Pammanrakia”).

1 PETRUS 3:22

siagang lanri nai'Namo ri suruga. Kamma-kamma anne koasaI siagang Allata'ala siagang Naparentami sikontu malaekaka, sikontu tau anna'galaka koasa, kammayatompa sikontu kagassingang niaka lalang ri jama-jamang rohania.

YOHANES 8:44

Ia manggenu iamintu Billisika, naia eroka nuturuki iamintu ero'na manggenu. Battu ri uru-urunaji napabuno memang anjo Billisika. Tena le'bakai mae ri katojenganga, lanri tena katojengang ri kalenna. Punna a'balle-balle, anjo biasa memanji ri ia, nasaba' kamma memanjinjo sipa'na. Iami paballe-balle, siagang iami nakabattui sikontu balle-ballea.

MATIUS 8:32

Nakanamo Isa, “A'lampamako!” Assulu'mi anjo setang-setanga battu lalang ri kalenna anjo tau ruaya. Nampa a'lette' antama' anjoreng ri bawi-bawia a'lampa mange ambuangi kalenna naung ri tubirika ri tamparanga sa'genna tallang ngaseng.

AYUB 1:12

Nakanamo Batara ri lapung Panggoda, “Baji'mi, gaukammi apa eroka nugaukang mae ri sikontu kakalumanynyanganna Ayub, assala' teako pa'risi'!” A'lampami lapung Panggoda battu ri dallekanNa Batara.

1 KARAENG-KARAENG 22:22

Akkuta'nammi Batara angkana, ‘Antekamma carana?’ Appialimi anjo roh angkana, ‘La'lampa' nampa kupa'jari a'balle-balle ngaseng na'bi-na'bina Ahab.’ Nakanamo Batara, ‘Baji'mi, gaukammi anjo, lakkulleko antu anynyonyoki.’ ”

MATIUS 7:6

Teako assarei barang matangkasa' mange ri kongkonga, sollanna tena na'giling ri kau ambakkaiko. Tea tongko assarei mutiara mange ri bawia, sollanna tena naonjo'-onjokangi anjo mutiaraya.”

MARKUS 5:12

Napala'mi anjo roh-roh ja'dalaka ri Isa, nakana, “Suro ngasemma' antama' anjoreng ri bawi-bawia.”

MARKUS 5:14

Lari ngasemmi pakalawakinna anjo bawia, na napa'la'bang anjo kabaraka lalang ri kotaya siagang desa-desa niaka a'reppese' anjoreng. Jari assulu'mi taua mange anciniki anjo apa kajarianga.