MARKUS 10:40 - KITTA' MATANGKASA'

⁴⁰ Mingka passala' inai lammempo ri sa'ri kanangKu siagang ri sa'ri kairingKu, anjo teai Nakke lampattantui. Allata'ala lampattantui angkana inai-nai lammempo ri anjo tampaka.”

MARKUS 10:40 Referans Kwoze

MATIUS 25:34

Nampa laNakana anjo Karaenga mae ri anjo tau niaka ri sa'ri kananNa, ‘Mae ngaseng mako kau tu nibarakkakia ri ManggeKu. Antama' mako ri Tampa' le'baka nipasadiang memangko ri uru nia'na linoa.

MATIUS 20:23

Nakanamo Isa, “Memang akkullejako ampisa'ringi passessa laKupisa'ringia. Mingka inai sallang lammempo ri sa'ri kairingKu siagang ri sa'ri kanangKu, teai iNakke lampattantui. Anjo tampaka lanipassareangi ri tau le'bakamo Napattantu Manggea.”

IBRANI 11:16

Mingka ma'nassami angkanaya nakkuki ke'nanga ri se'reang pa'rasangang la'bi bajika, iamintu pa'rasangang niaka ri suruga. Lanri kammana minjo natena nasiri'-siri' Allata'ala nikio' Allata'ala ri ke'nanga. Nasaba' le'ba'mi Napasadiang Allata'ala ke'nanga se're kota untu' ke'nanga.

YOHANES 17:24

Bapa', erokKa' angkanaya sikamma anjo tau Kipassareanga ri Nakke, lassiagang ngasengA' anjoreng ri tampa' Kupammantangia, sollanna akkulle nacini' ke'nanga kala'birangKu. Iamintu kala'birang Kipassareanga mae ri Nakke, lanri Kikamaseang memamMa' ri tenanapa nanipa'jari anne linoa.

YOHANES 17:2

Le'ba'mi Kipassareang mae ri AnatTa koasaya irateanna sikontu rupataua, sollanna akkulle Nasare katallassang mannannungang sikamma tau Kikellaia nisare.

MATIUS 13:11

Appialimi Isa Nakana, “Nasaba' ikau nisare ngaseng mako pangngassengang sollanna nupahang rahasiana ri passala' antekamma batena ammarenta Allata'ala. Mingka anjo ke'nanga tanisareai.

LAMPA-LAMPANA 1:7

Appialimi Isa Nakana, “KalenNa ManggeKu lampattantui allonna siagang wattunna. Anjo tena naparallu nuasseng, nasaba' anjo lalang koasaNai Manggea.