MARKUS 1:27 - KITTA' MATANGKASA'

²⁷ Sikontu taua lannasa' sikalimi anciniki anjo passalaka. Sa'genna massing nakanamo para ia ke'nanga, “Idende' apami kutadeng anne? Iaminne pangngajarang beru! Lanri kakoasanNa siagang kala'biranNa na Nasuro roh-roh ja'dalaka assulu', siagang amminawang turu' anjo roh-roh ja'dalaka mae ri Ia!”

MARKUS 1:27 Referans Kwoze

LUKAS 9:1

Nakio'mi Isa sampuloa anrua ana' gurunNa. Nampa Nasare ke'nanga koasa untu' ambongkai setanga, siagang amballei tau garringa.

MARKUS 7:37

Nalannasa' ngasemmo taua allangngereki. Nakana ke'nanga, “Napa'jari baji' ngasemmi tau garringa! Ba'lalo Napa'jarimi allangngere' tau tongoloka, siagang a'bicara tau pepea!”

MATIUS 15:31

Lannasa' sikali sikontu tau niaka anjoreng, lanri nacini'na tau pepea akkullemi a'bicara, tau tempanga a'jari baji'mi, tau pesoka a'jappami, siagang tau butaya accini'mi. Ammuji-muji ngasemmi ke'nanga ri Allata'alana bansa Israel.

MATIUS 9:33

Nabongkami Isa assulu' anjo setanga battu lalang ri kalenna anjo tau pepea; sa'genna akkulle memammo silalonna a'bicara anjo tau pepea. Lannasa' ngasemmi tau jaia anciniki anjo kajarianga. Nakanamo ke'nanga, “Tena le'bakapaki' accini' kajariang kammaya anjo lalang ri pa'rasangang Israel!”

LUKAS 4:36

Lannasa' ngasemmi taua, siagang massing nakanamo ke'nanga para ia, “Teai sipato' kana-kananNa anne taua. Lanri koasa siagang pangaru kana-kananNa na Nasuro assulu' setanga, nassulu' tojeng setanga!”

MARKUS 10:32

Sitabangi a'jappa Isa siagang ana'-ana' gurunNa mange ri Yerusalem. Ri dallekangi Isa a'jappa, nalussa' ngaseng ana'-ana' gurunNa. Kammayatompa tau niaka amminawang ri bokoNa Isa malla' ngaseng tommi. Nampa Nakio'mo pole ana'-ana' gurunNa Isa mange anynya'la', na Napauang ke'nanga apa lakajarianga sallang ri KalenNa Isa.

MARKUS 10:24

Lannasa'mi ana'-ana' gurunNa allangngereki anjo apa Napaua Isa. Mingka Nakanamo pole Isa, “Ana'-anakKu, sukkara' memangi taua a'jari umma'Na Allata'ala!

MATIUS 8:9

Nasaba' manna inakke amminawang turu' tonja' ri parentana komandang irateangangku. Irawangangku nia' todong siapa are kupimping surudadu, amminawang turuka todong ri parentaku. Punna nia' surudadu kusuro angkana, ‘A'lampako,’ tena ta'lampana. Yareka punna kukana ri maraenganga, ‘Maeko anrinni,’ tena tabattuna mae; kammayatompa punna kuparenta tunisuro-suroku angkana, ‘Gaukangi anne!’ tena tanagaukanna anjo kupassuroanga.”

MARKUS 1:26

Naparuntang-runtang sanna'mi roh ja'dalaka anjo taua, nampa ammarrang lompo siagang assulu' battu ri kalenna anjo taua.

MARKUS 1:28

Linta'mi tassiara' mange-mange kabara'na Isa ri sikontu daera Galilea.

MARKUS 16:5

Antama'mi ke'nanga ri anjo jeraka. Nia'mo nacini' ke'nanga sitau tu rungka ammempo lalang ri sa'ri kananna jeraka, ammake juba sannaka kebo'na. Na ta'bangkamo ke'nanga anciniki.

MARKUS 16:6

Nakanamo anjo tu rungkaya, “Teako mallakki! Kuassengi angkanaya Isa, anjo tu battua ri Nazaret, siagang le'baka nisalli' battu nuboya. Mingka cini'mi tenami anrinni ri tampa'Na niboli'. Le'ba'mi attallasa' poleang.

LAMPA-LAMPANA 17:19

Nampa naerang ke'nanga Paulus mange ri passirapakkanga irate ri Bonto Areopagus. Battui mange anjoreng, nakanamo ke'nanga ri Paulus, “Eroki ikambe angngassengi anjo pangngajarang berua nupabattua.