LUKAS 5:8 - KITTA' MATANGKASA'

⁸ Ri wattunna nacini' Simon anjo kajarianga, su'ju'mi ri dallekanNa Isa. Nampa nakana, “Bokoima' Batara! Nasaba' inakke anne tau doraka'!”

LUKAS 5:8 Referans Kwoze

YESAYA 6:5

Nampa kukanamo, “Bala! Tenamo panrannuangku inakke, lanri ra'masa'na bawaku napakamma dosa, na kuammantang ri tangngana bansa kammaya todong cilakana. Mingka manna nakamma, mata kalengku anciniki Karaenga, iamintu Batara Kaminang Makoasaya!”

PAPPICINI' 1:17

Ri wattunna kucini', su'ju'ma' naung ri dallekanNa sangkamma tau matea. Mingka Napadongko'mi lima kananNa ri kalengku nampa Nakana mae ri nakke, “Teako mallakki! INakkemi uru-urua siagang iNakkemi kala'busanga.

HAKING-HAKING 13:22

Nakanamo Manoah ri bainenna, “Ma'nassa lamateki' nasaba' le'baki nicini' Allata'ala!”

KALAPPASSANG 20:19

Nakanamo ke'nanga ri Musa, “Ikaumo a'bicara mae ri kambe, nalanapilangngeri ikambe. Teami na Allata'ala a'bicara mae ri kambe, gassingka mateji ikambe.”

1 SAMUEL 6:20

Nampa nakanamo panduduka ri Bet-Semes, “Inai akkulle attahang ri dallekanNa Batara, Allata'ala Matangkasaka? Kemaei akkulle niantara' anne Pattia sollanna bella battu ri katte?”

MATIUS 17:6

Nalangngere'na ana'-ana' gurunNa Isa anjo sa'raya, teaimi sipato' malla'na ngaseng, sa'genna tassu'ju'mi ke'nanga naung ri buttaya.

YOHANES 11:32

Ri wattunna battumo Maria mange ri tampa'na Isa siagang nacini'mi Isa, akkulantu'mi Maria ri dallekanNa Isa na nakana, “O Batara, ka'de' naKinia' anrinni anjo wattua, mattantu tenapa namate sari'battangku.”

MATIUS 8:8

Mingka appialimi anjo perwiraya nakana, “Tea' maKi' mangei ri ballakku Bapa'. Nasaba' tena nakusiratang Kibattui ri ballakku. Kiparentakang mami bawang, ma'nassa la'jari baji'mi antu pajamaku.

MATIUS 2:11

Antama'mi ke'nanga ri pammantanganna anjo Anaka. Nabuntulu'mi anjo Anaka siagang Maria amma'Na. Su'ju'mi ke'nanga anynyomba ri anjo Anaka. Nampa massing nasungke roko'-roko'na ke'nanga, namassing assare koro'bang, iamintu bulaeng, kamanynyang, siagang mur.

1 KARAENG-KARAENG 17:18

Nakanamo anjo jandaya ri Elia, “AtanNa Allata'ala, angngapa nakigaukang anne kammaya mae ri nakke? Apaka battuki' mae untu' a'jari saba' naNau'rangi Allata'ala dosaku, sa'genna musti mate anakku?”

2 SAMUEL 6:9

Mingka malla' tongi Daud ri Batara siagang nakanamo, “Kamma-kamma anne antekamma batena akkulle kuerang anjo Patti Parjanjianga?”

1 KORINTUS 13:12

Anne apa nicinika ri kamma-kammaya anne, sanrapangi apa-apa nicinika lalang ri carammeng tenaya natangkasa'. Mingka sallang, lasingara' ngasengi nicini'na. Kamma-kamma anne tenapa kuasseng ngasengi apa-apaya; mingka sallang lasukkuki kuassenna, sangkamma sukku' Naassengku Allata'ala.

LUKAS 5:7

Jari appala' tulummi ri agang-aganna ke'nanga niaka ri biseang maraenga. Battumi agang-aganna ke'nanga nampa nabonei juku' biseanna ke'nanga. Rassi rua-ruai anjo biseanna ke'nanga, sa'genna a'birimmo tallang anjo biseanga napakamma jaina juku'.

LUKAS 5:9

Lannasa'mi Simon siagang sikamma tau naaganga anciniki anjo juku' kammaya jaina, nagappaya ke'nanga.