LUKAS 20:22 - KITTA' MATANGKASA'

²² Jari Kipau sabeki ri kambe, angkanaya, maka akkullei taua a'bayara' sima mae ri karaenga yareka tena, situru' atoranna agamata?”

LUKAS 20:22 Referans Kwoze

NEHEMIA 9:37

Sikontu wassele' nigappaya ri anne buttaya musti nipassareangi mae ri sikamma karaenna pa'rasangang. Sikamma anjo tukoasaya Kiangkaki irateanna ummatTa, a'jari hukkungang dosana ikambe mae ri Katte. Ammarentai ke'nanga ri ero'-ero' pa'mai'na mae ri kambe siagang olo'-olo' piarana ikambe. Lanri kammana minjo nasessamo ikambe, sangnging pa'risi' siagang kasusaang nikasia'!”

LAMPA-LAMPANA 5:37

Le'baki anjo, ri wattunna nisuro bilang ngaseng tuma'buttaya, nia'mo pole tau niareng Yudas, iamintu tau battu ri Galilea. Nasaba' lompona pangaruna, jai tommi tau amminawang ri ia. Mingka mate nibuno tommi, siagang tassia'-siara' ngasemmi tau amminawanga ri ia.

MATIUS 17:25

Appialimi Petrus nakana, “A'bayaraki.” Ri wattunna ammotere' Petrus, nikuta'nammi ri Isa angkana, “O Simon, antekamma panggappanu? Inai musti a'bayara' sussung yareka sima, mae ri pammarentana anne linoa? Ra'yaka yareka tu battu pantarang pa'rasangang?”

NEHEMIA 5:4

Siagang nia'mo pole angkana, “Le'baki ikambe angnginrang doe' untu' nipa'bayarrang ri sima napattantua karaenga untu' kokonna siagang koko anggoro'na ikambe.

EZRA 9:7

Battu ri boe-boena ikambe sa'genna kamma-kamma anne, ikambe ummatTa dorakai ri Katte. Lanri kammana anjo, nasikamma karaenna siagang imanna ikambe nibetami ri karaenna bansa-bansa maraenga. Nibunoi ikambe, niellaki, siagang nierangi mange nipela'. Nihina tojeng-tojemmi ikambe, sangkamma kaadaanga anne alloa.

EZRA 4:13

Punna akkulle nabangung ammotere' anjo kotaya siagang le'ba' nabangung tembo'-tembo' kalli'na, talaerokami pandudu'na a'bayara' paja', sa'genna kurammo panggappanna kakaraenganga.

PAOLE 17:15

Parhatikangi baji'-baji', sollanna anjo tau nuangkaka a'jari karaeng iamintu tau Napilea Karaeng Allata'alanu. Anjo taua musti tau battu ri bansanu; teako angngangkakki bansa maraeng a'jari karaennu.

LUKAS 20:21

Jari a'lampami anjo tau le'baka nigaji, mange akkuta'nang ri Isa nakana, “O Pa' Guru! Naassengi ikambe angkanaya annaba ngasengi sikamma anjo Kipaua siagang Kipangngajarranga. Naasseng tongi ikambe angkanaya Kipangngajarrangi silambusu'na apa Nakaerokanga Allata'ala mae ri rupataua, lanri tena naKipasimmara'-maraengi taua.

LUKAS 20:23

Mingka Naassengi Isa akkala' salana ke'nanga. Lanri kammana, Nakanamo ri ke'nanga,

LUKAS 23:2

Anjoreng ri dallekanna Pilatus, nitudumi Isa ri ke'nanga. Nakana ke'nanga, “Anne taua nirapikangi Napasala oloangi ra'yaka. Naajara' salai taua sollanna tena naero' taua a'bayara' sima ri Karaenga, lanri Nakanana KalenNa Iami Almasi, Karaenga.”

ROMA 13:7

Jari bayaraki mae ri pamarentaya apa siratanga nubayara' ri ia. A'bayarakko sima punna siratangko a'bayara' sima; siagang a'bayarakko sussung punna siratangko a'bayara' sussung. Musti nubilang lompoi tau siratang nubilang lompo siagang musti nupakala'biriki tau siratanga nupakala'biri'.